A loita do persoal de mantemento do CHUO cumpre catro meses
Os traballadores de Ferrovial, concesionaria do servizo, están en folga dende o 26 de febreiro
A loita do persoal do servizo de mantemento do Complexo Hospitalario Universitario de Ourense (CHUO) vén de cumprir catro meses. Onte, como cada mércores, volveron mobilizarse polos arredores do centro sanitario en demanda dunhas melloras nas condicións de traballo que rematen coa discriminación laboral que padecen con respecto aos empregados/as doutros hospitais da provincia. Ademais, dende o pasado 26 de febreiro manteñen unha folga indefinida que están dispostos a soster até que Ferrovial atenda as súas reclamacións.
