A CIG-Saúde exixe do Sergas que lle solicite ao Ministerio o incremento de prazas de MIR e de EIR

Denuncia que a oferta actual é insuficiente e non garante as necesidades do sistema sanitario

Nacional -

CIG-SAÚDE exixe do SERGAS que tome en consideración os datos publicados nos Planos de Ordenación de Recursos Humanos, mediante a Orde de 8 de maio de 2012 e a Orde 5 de decembro de 2013, nas que se contemplaban todas as xubilacións previstas desde o ano 2010 até o 2017. Solicita ademais que a consellaría demande do Ministerio de Sanidade o incremento das prazas en Formación polo sistema de Residencia de Médico/a Interno/a Residente (MIR) e Enfermeiro/a Interno/a Residente (EIR) que se ofertan na Galiza, para atender as necesidades reais que ten o SERGAS de cobertura de profesionais.

A secretaria nacional da CIG-Saúde, María Xosé Abuín, explica que as prazas de médico/a de Familia son as que cobren os postos de atención primaria, urxencias hospitalarias, urxencias sanitarias 061, atención a domicilio e o Centro de Transfusións de Galiza, entre outros. “Se collemos os datos publicados polo propio SERGAS sobre xubilacións e prexubilacións producidas entre o período 2010-2017 e os datos de envellecemento de profesionais sanitarios, as prazas de MIR de Familia que se convocan son claramente insuficientes para cubrir a taxa de reposición dos/as profesionais que se xubilan e as ausencias que se puideran producir”.

A isto engade que, no caso de Pediatría, arredor dun 30% de nenos/as son atendidos/as, en Galiza, por médicos de adultos. “Se ben é verdade que se está producindo un descenso de poboación pediátrica, a consecuencia das nefastas políticas do PP que están provocando un crecemento vexetativo negativo, na actualidade as prazas de pediatría teñen que se adecuar á poboación existente”.

As prazas de MIR convócanse cada ano e cada ano haberá que compaxinar profesionais e oferta para garantir a atención sanitaria atendendo ás necesidades da poboación.

Enfermería

No referente a enfermería, a CIG-Saúde demanda que a oferta de enfermeira/o especialista en Obstetricia Xinecoloxía (Matronas) sexa suficiente para tender ás mulleres en idade fértil deste país garantindo o acceso universal ao Programa da Muller.

Abuín denuncia que Galiza “é das poucas comunidades que tampouco oferta prazas de enfermeira/o especialista en Xeriatría”, por iso demanda tamén a oferta destas prazas na convocatoria de 2017, que sairá no mes de setembro.

A CIG-Saúde entende que diante desta situación a consellaría de Sanidade tiña que negociar co Ministerio, que é quen publica a Orde porque, se non se adaptan as prazas de formación ás necesidades asistenciais, “en breve o SERGAS non disporá de persoal para cubrir a taxa de reposición por xubilacións, as quendas, gardas ou as ausencias deste persoal”.

Non podemos ter a atención primaria como porta de entrada para o sistema sen profesionais para atendela, conclúe.

 

  Datos xubilacións SERGAS. Plan de Ordenación RRHH SERGAS

XUBILACIÓNS

ANO 201/13

ANO 14/17

TOTAL

Pediatría e áreas especificas

69

96

165

Medicas/os Familia

97

218

315

Matronas

22

43

65

Media de idade maiores de 50 anos 54.77% das/os traballadoras/es

 

 

Nº de Prazas en Formación que se convocan polo sistema de Residencia  no SERGAS. BOE 13 de setembro de 2016

Pediatría  e áreas especificas

20 prazas

Médicas/os Familia

90 prazas

Matrona

17 prazas.

 

Volver