Concentración en apoio a 5 traballadores xulgados por participar nun piquete na folga xeral de 2010

Dende a CIG de Lugo denuncian represión sindical e a desproporción da pena que se solicita

Lugo -

A CIG de Lugo desenvolveu este luns unha concentración en apoio a cinco traballadores que van ser xulgados pola súa participación nun piquete informativo durante a folga de setembro de 2010. Dende a central sindical enténdese que os feitos denunciados constitúen unha represalia sindical e responden a unha estratexia de criminalizar o labor dos piquetes, polo que se demanda o arquivo da causa.

O secretario de Organización da CIG de Lugo-A Mariña, Lois Neto, cualificou de absolutamente desproporcionadas as penas que se solicitan, xa que para catro dos traballadores pídense penas de prisión por delito de atentado, mentres que a outro operario atribúeselle un delito de faltas.

Os feitos xulgados sucederon durante a noite da folga xeral do 29 de setembro de 2010, no marco dunha carga policial contra un piquete informativo. Un grupo de traballadores foi identificado e denunciado automaticamente pola policía. Agora, sete anos despois, cinco compañeiros van ser xulgados pola súa participación no piquete e por exercer o seu lexítimo dereito á folga.

A vista prevista para a mañá de onte quedou finalmente adiada até o próximo 13 de novembro.

Volver