Manuel Grandal: "Ferrolterra non necesita actos de paripé, necesita solucións urxentes"

A CIG mobilízase en Fene con motivo da presenza de Feijoo no estaleiro

Ferrol -

Con motivo da participación do presidente da Xunta no acto de entrega dos primeiros "jackets" que se constrúen en Navantia Fene para Iberdrola, a CIG de Ferrol realizou unha concentración diante do estaleiro para denunciar a situación dramática da comarca e a ausencia de medidas que permitan a súa recuperación económica, faciliten a xeración de emprego de calidade e poñan freo á sangría demográfica.

"Non é de recibo que Feijoo pase por aquí só para facer actos de paripé, cando levamos anos demandando que se apliquen políticas de discriminación positiva para esta comarca, que segue a ser a máis deprimida do país", censuraba o secretario da CIG de Ferrol, Manuel Anxo Grandal, ao remate da protesta coa que a central sindical recibiu o presidente da Xunta ás portas do estaleiro de Fene.

Grandal lembrou que Ferrolterra ten a taxa de paro máis alta de todo o país, a taxa de actividade máis baixa e que mesmo a caída demográfica en bisbarras como a de Ortegal é das máis acusadas. "Esta é a realidade da nosa comarca. Precisamos políticas que nos permitan saír deste buraco, non inauguracións nin paripés", insistiu.

Na protesta reflectíronse as reivindicacións da varios colectivos, como a loita das auxiliares do naval contra a precariedade e por unhas condicións dignas, a do persoal de Masol Iberia Biofuel polas melloras laborais e salariais, ou o conflito das traballadoras e traballadores da administración de Xustiza, que leva preto dun mes en folga indefinida, para esixir o remate das discriminacións que sofren e pola dotación do persoal necesario para ofrecer un servizo de calidade.

Renovación do estaleiro e infraestruturas

O responsábel da CIG-Ferrol apuntou que o naval público segue a ser o motor económico da comarca e mentres o goberno autonómico de Andalucía aposta e inviste en plans de futuro para o sector, o Goberno da Xunta desenténdense dunha actividade que se para Galiza é estratéxica, "para esta comarca é vital".

"Ferrolterra precisa solucións que dependen de decisións políticas da Xunta e do Estado, e entre elas, que se aproben os orzamentos xerais do Estado (dado o alto grao de dependencia que ten a comarca dos mesmos) para desbloquear o proxecto das famosas fragatas F-110 e pór en marcha a remodelación dos estaleiros. E a partir de aí poder traballar na reindustrialización e na diversificación económica da comarca", aseverou Grandal.

A este respecto, insistiu na necesidade inmediata de afrontar a renovación do estaleiro como única garantía de futuro da construción naval na ría e que executen as infraestruturas tan longamente demandadas. "Estas actuacións son vitais e teñen que ser inmediatas. Ou se fan ou a comarca vai a pique", concluíu.

Volver