A Xunta abandona os nosos sectores produtivos mentres favorece un modelo industrial “colonial”

Asembleas e concentracións da CIG contra a Lei de Fomento Industrial

Nacional -

Diante das graves consecuencias que terá a aprobación -pola vía de urxencia- da Lei de Fomento da Implantación de Iniciativas Empresariais que o Partido Popular pretende impor en Galiza, a CIG ten convocadas asembleas de delegados/as para o vindeiro día 3 de outubro en todas as comarcas. A central sindical pretende así avaliar o alcance desta medida coa que o Goberno de Feijóo pretende facilitar, mesmo con subvencións públicas, que empresas de fóra asalten o noso territorio -aínda que teñan custos ambientais e sociais- mentres deixa ao pairo os nosos sectores produtivos.

Deixa sen protección o interese xeral coas modificacións que introduce nos procesos de tramitación administrativa de determinados proxectos para que a Consellaría de Industria impoña o seu criterio por enriba de calquera outra, convertendo de facto a Dirección Xeral de Minas como segundo organismo con máis poder sobre o territorio, só por debaixo do Consello da Xunta. 

O PP pretende darlle vía libre ás empresas que queiran instalarse no noso país

Para a CIG, con esta Lei o Goberno do PP presidido por Feijóo pretende desregular, rebaixando e mesmo eliminando requisitos de protección do medio ambiente, de conservación do patrimonio, sociais e demais para dar vía libre a, entre outras, empresas mineiras e pasteiro-enerxéticas que queiran instalarse en Galiza.

Non apoia os nosos sectores produtivos

Pola contra, mentres favorece a instalación de empresas foráneas de calquera natureza, esquece introducir medidas de apoio e impulso aos nosos sectores produtivos que permitan a recuperación e consolidación do tecido empresarial galego, favorecendo así o crecemento económico de Galiza e a creación de emprego en condicións dignas.

A consecuencia inmediata da aprobación desta lei será a redución dos controis medio ambientais, da participación cidadá e dos requisitos administrativos convertendo así a Galiza no paraíso no que calquera empresa dedicada a actividades industriais e económicas problemáticas poida instalarse.

Horarios e lugares das mobilizacións do 3 de outubro
  • A Coruña: ás 12.30h no edificio da Xunta de Galiza de Monelos.
  • Ferrol: ás 12h diante do edificio da Xunta de Galiza
  • Compostela: ás 12:30h na Praza de Galiza.
  • Lugo: ás 12h diante do edificio da Xunta de Galiza
  • Ourense: ás 12h diante do Edificio da Xunta
  • Pontevedra: ás 12:30h na Praza da Peregrina.
  • Vigo: ás 11:45h manifestación dende a Rúa Vázquez Varela até o edificio da Xunta.

Volver