O 80% do persoal de Arenal Perfumerías da Coruña secunda un novo día de folga por unhas condicións dignas
Arredor dun 80% do persoal das tendas de Arenal Perfumerías na provincia da Coruña secundou a nova xornada de folga convocada onte para reclamar un acordo que mellore as condicións salariais e laborais, tras os paros desenvolvidos os pasados días 24 de novembro e 23 de decembro. Coincidindo co paro, as traballadoras levaron a cabo unha concentración na tenda da rúa San Andrés ás 11:00 horas e logo marcharon até o establecemento da praza de Catro Camiños. Xa pola tarde, un nutrido piquete informativo percorreu distintas tendas da empresa na cidade.
Dende a CIG-Servizos lembran que Arenal aplica o convenio estatal de perfumerías, que contempla unhas condicións moi inferiores ás do convenio provincial de comercio vario. De feito, máis do 70% do persoal (formado na súa maioría por mulleres) cobra o SMI, malia que a empresa (fusionada con varias transnacionais do sector e en pleno proceso de expansión) rexistra beneficios millonarios.
Neste contexto, a representación da CIG e UGT (que ostentan a maioría absoluta do comité con 6 e 2 representantes respectivamente) leva meses tentando que a dirección sente negociar un acordo de melloras salariais e laborais para que as traballadoras poidan cobrar o mesmo que as compañeiras do sector reguladas polo convenio provincial do comercio vario, de condicións moi superiores.
Porén, a dirección segue sen querer negociar nin atender as demandas das co cadro de persoal, polo que as mobilizacións continuarán até lograr unhas condicións salariais e laborais dignas. Nos vindeiros días as traballadoras analizarán a situación en asemblea e decidirán os seguintes pasos a dar co obxectivo de que a empresa atenda as súas lexítimas demandas.
