O persoal de Atento mobilízase nunha tenda de Movistar para informar das condicións nas subcontratas de atención telefónica

Coincidindo cunha nova xornada de paros na plataforma da Coruña

A Coruña -

Dende o pasado 28 de maio as traballadoras e os traballadores da plataforma de Atento na Coruña están realizando paros e mobilizacións todos os luns para esixir unhas condicións laborais dignas. A pesar do éxito das protestas (que incluíu dúas xornadas de folga de 24 horas), a empresa só se reuniu nunha ocasión co comité, mais sen achegar ningunha solución nin abrir vías de negociacións. Ao contrario, hai uns días Atento daba unha nova mostra da súa política represiva despedindo un traballador que previamente estivera de baixa por enfermidade.

Este luns, o persoal continúa cos paros laborais de unha hora por quenda e as mobilizacións, desta volta cun reparto de folletos informativos diante da tenda que Movistar (compañía para a que Atento presta servizos de atención telefónica) ten na Praza de Pontevedra, co obxectivo de explicar as usuarias e usuarios cales son as condicións "de explotación" que teñen que aturar e "como funcionan realmente as empresas coas que traballan as compañías de telefonía".

Enfermar por ir traballar

A representación social leva aos denunciando o acoso e as presións ás que Atento somete ao seu persoal "e que fan que caiamos enfermos e enfermas, tal e como se reflicte nos elevados índices de absentismo e como está demostrado na avaliación de riscos psicosociais", apunta a secretaria do comité, Mónica Díaz (CIG).

Porén, lonxe de pór solucións, "a resposta da empresa á folga de 24 horas foi despedir a un compañeiro por ter collido dúas baixas de curta duración nun ano", denuncia Díaz. "Esta é a maneira na que Atento respecta os nosos dereitos e así pretenden, coa política do medo, que a xente veña traballar enferma, incluídas as persoas que enferman por culpa de como nos trata a empresa".

Para a secretaria do comité resulta lamentábel que a Inspección de Traballo non teña actuado de xeito contundente para pór freo ás prácticas laborais da empresa, malia todas as denuncias presentadas. Lembra que o persoal está sometido a constantes presións, impóñenselle uns obxectivos inalcanzábeis, sen tempo de tramitación, con exceso de carga de traballo, coas aplicacións funcionando de xeito inadecuado, con controis permanentes, sancións inxustas, etc.

"Pero sabemos cales son os nosos dereitos e non imos renunciar a eles", subliña Carrodeguas, quen adiante que as mobilizacións continuarán o vindeiro luns. "Que teñan claro que non imos ceder mentres Atento non solucione este conflito".

A responsabilidade de Movistar

A secretaria do comité apuntou á responsabilidade de Movistar, "que é o cliente para o que traballamos. Cando alguén chama ao 1004 ou 1002 somos nós quen collemos as chamadas, por iso tamén queremos que a xente saiba en que condicións temos que facer o noso traballo".

Neste senso, a representación social explica que o persoal de Atento ten un máximo de 5 minutos para atender cada chamada, con independencia da dificultade do problema a tratar. "O único que lles importa é que vendamos un produto ou que acabe rápido unha chamada para facturar pola seguinte".

"Temos que atender o máis rápido posíbel para poder vender  algún produto. E se intentamos resolver o problema da/o cliente sen venderlle nada, amoéstannos, sanciónanos e incluso poden despedirnos usando as gravacións das chamadas escollidas ex professo", explican.

No caso do departamento de soporte técnico, sinalan que a maioría das veces o servizo é deficiente porque "temos que adiviñar cal que o problema, xa que as aplicacións necesarias non funcionan, e ao tempo o xefa ou xefa estanos berrando porque tardamos moito en atender. Movistar quere que colguemos a chamada para pasar a seguinte cliente e Atento penalízanos se abrimos moitas avarías ou se a valoración que nos pon a clientela non é alta".

Volver