SOS Sanidade Pública tende a man a Núñez Feixóo para que sente a negociar

Representantes da plataforma fixeron entrega dunha solicitude de entrevista no rexistro

Nacional -

Representantes da plataforma SOS Sanidade Pública presentaron esta mañá un escrito no rexistro xeral da Xunta de Galiza solicitando unha entrevista co Presidente da Xunta e en demanda da retirada do proxecto de lei de reforma da Lei Galega de Saúde, que entenden que prexudica profundamente o sistema sanitario público. Ademais a plataforma tende a man para que se abra un proceso de negociación para, entre os distintos sectores, abordar a problemática que padece a sanidade pública galega.

SOS Sanidade Pública remitiu hai días, por correo electrónico, á secretaria do Presidente da Xunta, unha petición de entrevista da que non obtiveron resposta. Hoxe a plataforma presentaba esa solicitude por escrito e vía rexistro entendendo que “tras da gran manifestación do pasado día 4 de febreiro, de rexeitamento da contra-reforma da Lei Galega de Saúde e do deterioro da sanidade pública galega, debería intentarse a negociación destas peticións”.

A este respecto o portavoz de SOS Sanidade Pública, Manuel Martín, explicou que a plataforma non pretende manter inamovíbel a Lei Galega de Saúde senón que está disposta a mellorarala pero “non empeorala como pretende a administración”.

Fronte a isto chamou a intentar consensuar estratexias e políticas para buscar solucións “ao gravísimo problema que ten a sanidade pública en Galiza”. Unha situación da que responsabilizou ás políticas de recortes e desmantelamento impostas pola Xunta de Galiza, sob pretexto da crise económica.

Martín asegurou que desde SOS Sanidade Pública enténdese que neste proceso de negociación debe estar o goberno de Galiza, a consellaría de Sanidade, mais tamén deben estar as organizacións sindicais, a Xunta de Persoal e as organizacións políticas e cidadás.

Man tendida

Por iso reiterou que a plataforma de manter a man tendida á negociación porque “cremos que a sanidade pública está nunha situación moi preocupante”. Unha man tendida que agardou “que o goberno saiba recollela”.

Volver