Buscar novas
O comité da central de emerxencias 112 denuncia o desleixo da Xunta con este servizo
A AXEGA non proporcionou máscaras nin información ao persoal
O comité de empresa do CIAE 112 Galiza denuncia a “falta de responsabilidade con este servizo por parte da Xunta” que, ao seu entender, “deixa patente a indiferenza da AXEGA coas persoas que todos os días vimos traballar para sacar adiante as emerxencias do país”. Denuncia ademais que nin sequera se atenderon as súas propostas preventivas, que permitirían garantir, en caso de contaxio, que o servizo continuase funcionando para atender todas as chamadas das e dos usuarios.
Segundo explican, na central onde se atopan o 112 e o 061 traballan arredor de 50 persoas por quenda entre os dous servizos, nun lugar onde non hai fiestras e compartindo todo o espazo. Entenden que debería ser “prioritaria a máxima precaución para evitar o contaxio que se puidera dar entre o persoal, en caso de haber algún positivo no Covid-19”.
Proposta de medidas preventivas
Porén, ante a “inacción” por parte da Xunta de Galiza, propoñen varias medidas preventivas, “xa que unha situación extraordinaria require solucións tamén extraordinarias”.
A súa primeira proposta é restrinxir o acceso á central só as persoas que se viran na obriga de traballar presencialmente, fomentando o teletraballo para o resto da plantilla (administración, prensa, formación...), evitando así riscos innecesarios.
Xunto a isto propoñen dividir o persoal que traballa en cada quenda, en dous grupos independentes entre si entre as salas de San Marcos e A Estrada, para reducir á metade o risco de contaxio. En todo caso, ante a información de que habería unha terceira sala na Estrada, demandan que se acondicione de inmediato para poder garantir a separación neses dous grupos.
Falta de información
O comité asegura que descoñece se está feita a avaliación de riscos. “Sabemos que hai un plan pero descoñecemos os pormenores do mesmo”, explica a presidenta do comité de empresa, Isabel Moares. Como tampouco saben como está de avanzada a posibilidade de teletraballar en caso de que a situación así o requirira e, no caso de haber un positivo, tampouco saben como terían que actuar, nin que prevé facer a AXEGA de se producir esta situación.
A sensación que hai, segundo Moares, é que semella que a administración se está deixando levar polos acontecemento e tomando as decisións en función disto, cando o que tiñan que facer era “tomar as medidas precisas nunha situación tan delicada”.
A presidenta do comité asegura que levan días reclamando información e todas as medidas preventivas necesarias para evitar contaxios e corentenas que mermarían o servizo. Lembra que “estamos a falar dun traballo especializado que non podería desenvolver ningunha persoa sen preparación previa, algo imposible de facer neste intre. Aínda así, recibimos o silencio por resposta”.
Por iso consideran que hai “falta de responsabilidade” con este servizo por parte da Xunta de Galiza, o que “deixa patente a indiferenza da AXEGA coas persoas que todos os días vimos traballar para sacar adiante as emerxencias do país. Non importan as persoas, impórtalles quedar ben diante da prensa”.
Conclúen cualificando de “insultante” e “improcedente” o comentario do Presidente da Xunta, Núñez Feixó, cando estivo, xunto co vicepresidente da Xunta, paseando pola central, por afirmar “tranquilas que nos imos contaxiar todas”.
O comité do 112 quere ademais manifestar o seu apoio ao comunicado e ás demandas realizadas polo comité e os compañeiros e compañeiras do 061.
A CIG reclama das empresas de ambulancias que apliquen criterios unificados de actuación e de dotación de medidas preventivas
Ante o funcionamento "anárquico" do sector
A CIG vaise dirixir a todas as empresas do transporte sanitario urxente e non urxente de Galiza para esixir que apliquen criterios unificados de actuación e na dotación de equipos de prevención para garantir tanto a seguridade dos traballadores e traballadoras como das persoas usuarias. A central advirte que o funcionamento do sector nesta crise sanitaria do coronavirus está a ser totalmente anárquico, xa que o que vale para unhas empresas noutras non serve.
Neste senso, o responsábel de Transportes da FGAMT-CIG, Xesús Pastoriza, explica que hai empresas de transporte programado (como o traslado a diálise) que están a incumprir o decreto de alarma xa que levan todas as prazas dos vehículos ocupadas con usuarias/os cando non está permitido máis que unha persoa por fileira de asentos. "Hai empresas que obrigan a encher os vehículos como se estiveramos nunha situación normal, sen ten en conta as medidas mínimas de seguridade, os riscos de contaxio e expondo ademais o/a condutor/a a que sexa sancionado por incumprir o decreto de alarma".
Xunto a isto, sinala que mentres nunhas empresas se entregan uns Equipos de Protección Individual, noutras estanse dando outros diferentes, sen seguir un criterio unificado e uniforme para o conxunto do sector. De igual maneira, mentres unha compañías, atendendo os protocolos, non permiten ao seu persoal saír a facer a servizos se non dan as garantías de seguridade, noutras funciona o "todo vale" e mandan os traballadores e traballadoras saír baixo calquera circunstancia.
Protocolo unificado do 061
Diante desta situación anárquica, a CIG demandou da Fundación Urxencias Sanitarias 061 que elaborara un protocolo único para todo o transporte sanitario que aínda foi remitido no día de onte. Agora, a CIG tamén se volverá dirixir ás empresas demandando que apliquen este protocolo e que manteñan unha comunicación constante cos delegados e delegadas de prevención para informar de maneira puntual sobre contaxios, dotación e número de EPIs, organización do traballo, desinfección de ambulancias e uniformidade, necesidades do servizo, formación, etc.
"Pois non hai que esquecer que os traballadores e traballadoras de ambulancias están primeira liña de batalla e son parte fundamental do sistema sanitario", asevera Pastoriza.
Como actuar fronte ao coronavirus no teu traballo
Infografía interactiva elaborada polo Gabinete Técnico Confederal de Saúde Laboral da CIG
O Gabinete Técnico Confederal de Saúde Laboral da CIG elaborou unha infografía interactiva sintética dirixida a orientar a actuación dos traballadores e das traballadoras e os/as seus/súas representantes en materia de prevención fronte o risco de infección por coronavirus nos seus centros de traballo. A infografía inclúe, a través de ligazóns, documentos preventivos aclaratorios e modelos de denuncia para presentar ante os organismos pertinentes.
Como actuar fronte ao coronavirus no teu traballo
1.- Esixir a existencia dun protocolo preventivo de actuación adaptado á actividade da empresa que deberá someterse a consulta, e se é posíbel ao acordo, do Comité de Saúde Laboral, coa participación dos delegados/as de prevención e delegados/as sindicais. Dito protocolo deberá contemplar o estabelecemento e implementación de medidas preventivas:
- Organizativas: videoconferencias en lugar de viaxes e xuntanzas presenciais de traballo, teletraballo con garantías laborais e preventivas, formación on-line, quendas alternativas de traballo e utilización de novas tecnoloxías que eviten o contacto directo.
- Distancia física: Distancia de seguridade permanente entre traballadoras/es e usuarias/os do servizo de polo menos dous metros.
- Pautas hixiénicas: Consulta nesta ligazón
- Utilización de EPIs: eficientes ante o risco (luvas, gafas, máscaras, etc.); axustados ás características da persoa que os utiliza; persoais e intransferíbeis; proporcionados gratuitamente pola empresa nun número suficiente. E con información/formación sobre o uso correcto dos EPIs. No caso de non existir un protocolo específico de prevención correctamente integrado no Plan de Prevención da empresa: denunciar esta grave irregularidade ante a Inspección de Traballo e SS, Ministerio de Sanidade e Delegación do Goberno. Modelo de denuncia
2.- Esixir a existencia e posta a disposición de Equipos de Protección Individual (EPIs) segundo estea estabelecido no protocolo preventivo.
No caso de non estar a disposición dos traballadores e das traballadoras os EPIs contemplados no protocolo da empresa, proceder a realizar a correspondente denuncia ante a Inspección de Traballo e SS, Ministerio de Sanidade e Delegación do Goberno. Modelo de denuncia
3.- Persoas especialmente sensíbeis ao coronavirus: a área sanitaria do Servizo de Prevención de Riscos Laborais debe avaliar a presenza de persoal traballador especialmente sensíbel en relación á infección de coronavirus SARS-CoV-2 (persoas con diabetes, enfermidade cardiovascular, incluída hipertensión, enfermidade hepática crónica, enfermidade pulmonar crónica, enfermidade renal crónica, inmunodeficiencia, cancro en fase de tratamento activo, embarazo e maiores de 60 anos).
En caso de que non se poida adaptar o posto de traballo destas persoas sensíbeis, ou non se lles poida asignar un exento de risco, a área sanitaria do Servizo de Prevención elaborará un informe para que quede acreditada a indicación de incapacidade temporal, co fin de facilitar aos servizos de Atención Primaria, a súa tramitación.
No caso de non existir este catálogo de postos exentos de risco de contaxio e/ou das medidas organizativas alternativas para protexer a estes traballadores e traballadas, proceder a denunciar esta grave irregularidade ante a Inspección de Traballo e SS, Ministerio de Sanidade e Delegación do Goberno. Modelo de denuncia
4.- Se temos sintomatoloxía. As persoas traballadoras que presenten febre ou tose, deberán quedar no seu domicilio e contactar cos servizos de saúde telefonicamente chamando ao número 900 400 116. Se se ten sensación de falta de aire, empeoramento ou sensación real de gravidade por calquera outro síntoma, chamar ao 061.
5.- No caso de contaxiarse ou estar sometido a illamento. En ambos os dous casos temos dereito á baixa nas mesmas condicións económicas que as de accidente de traballo. Nestas situacións será exclusivamente o persoal médico de Atención Primaria do SERGAS quen emita os partes de baixa e alta en todos os casos de afectación por coronavirus. En ningún caso estes partes poderán ser emitidos polo persoal facultativo das Mutuas Colaboradoras coa S.S., do Instituto Social da Mariña ou das Empresas Colaboradoras. Non hai que emitir parte de accidente de traballo nestas situacións, será sempre tramitado como enfermidade común.
6.- No caso de dúbida, dificultades ou necesidade de asesoramento, poñerse en contacto coas estruturas sectorias e/ou territoriais da CIG máis achegados ao teu centro de traballo para que te poidan prestar o apoio e o asesoramento correspondente. Nesta ligazón tes os datos de todos os nosos locais: https://www.cig.gal/locais.html
O persoal da central de coordinación do 061 denuncia a escaseza de material de protección laboral ante o COVID-19
Advirten que, de darse un caso de contaxio neste servizo, quedaría comprometida a atención telefónica
O comité de Empresa dos operadores telefónicos da Central de Coordinación da FPUSG-061, que atenden as chamadas dos números 061 (urxencias sanitarias) e 900 400 116 (de información sobre o COVID-19), servizo concesionado á empresa Grupo Norte, denuncia a escaseza de material de protección laboral ante a pandemia do Coronavirus; que se está a tardar en repoñer os botes antisépticos de mans; e que as máscaras de protección non están chegando á totalidade do cadro de persoal. Esixen medidas de protección para evitar posibles casos que puideran comprometer o funcionamento dun servizo como este, imprescindible para a cidadanía.
Ademais destas cuestións, o Comité de Empresa denuncia que a bolsa de emprego está esgotada e que agora, de se contratar alguén de fóra, sería imposible proporcionarlle formación, xa que, por unha banda, está suspendida tras a aplicación do Decreto de Estado de Alarma e, pola outra, sería imposible facer as prácticas a dobre casco, para posibilitar que o persoal a formar poida ver como hai que atender e xestionar as diferentes situacións de emerxencia deste traballo, respectando a distancia mínima de 2 metros entre as persoas. Destacan a “falta de previsión ante unha posible situación de emerxencia sanitaria como a que estamos agora mesmo a padecer”.
Canda isto, na cuestión da limpeza, agora mesmo están a limpar os postos de traballo, cando sae algún dos traballadores/as e nos cambios de quenda, pero que existe unha escaseza de limpeza nas escaleiras do Centro Integrado de Atención ás Emerxencias, nos espazos comúns e nos lavabos do edificio.
Incumprimentos do Grupo Norte
Xunto a isto, denuncian os incumprimentos de Grupo Norte no ámbito laboral co persoal operador desde que se fixo cargo do servizo no ano 2017, en relación a erros no abono dos obxectivos; no abono das nóminas do persoal que estivo de baixa por IT; no abono do Plus de Vacacións; nas liquidacións do persoal contratado como BackUp ou no cálculo das nóminas mensuais –ademais de atrasos no seu abono- e que sofren reiteradas ameazas de que non se vai levar a cabo o pago das mesmas.
O comité apunta, tamén, o incumprimento das axudas de ámbito social ao persoal; a escaseza de ferramentas de traballo imprescindibles para as traballadoras e traballadores, como uniformes ou cascos, e mesmo o impedimento de Grupo Norte ao persoal operador de colaborar en situacións de emerxencia sanitaria, como a actual, á hora de ofrecerse para ir traballar, como reforzo, cando as necesidades do servizo así o requiren.
Aplicación de medidas preventivas e abono das quendas
Diante destes incumprimentos, o Comité de Empresa demanda que se apliquen todas as medidas preventivas necesarias para a protección dos traballadores/as contra os riscos relacionados coa exposición a axentes biolóxicos e que se informe debidamente ao persoal das medidas a aplicar de se producir algún caso de COVID-19 na Central de Coordinación. Isto, xunto coa demanda de que se abonen as quendas a realizar polo persoal operador con motivo da situación de emerxencia decretada por mor da pandemia, como horas extraordinarias, segundo o estipulado no Convenio Colectivo de Contact Center.
A CIG denuncia que a falla de EPIs nas ambulancias pon en risco a traballadores/as e usuarios/as
A central critica a Consellaría de Sanidade por estar desaparecida e non dar formación específica
A FGAMT-CIG denuncia a falla do número suficiente de Equipos de Protección Individual (EPI) no sector das ambulancias e os riscos que isto supón para traballadores/as e usuarios/as, ante a situación de emerxencia actual. A central tamén fai un chamamento para extremar as medidas de limpeza e desinfección de ambulancias, advertindo que onde non sexa así os delegados/as de prevención pararán o servizo ante o risco grave e inmimente para traballadores/as e usuarios/as.
Dende o sector de Transportes da FGAMT-CIG explican que polo escaso número de equipos de protección -segundo o protocolo que a Fundación 061 entregou ao persoal de ambulancias- só se deben empregar os EPIs cando desde o propio 061 se lle informe da sospeita ou confirmación de contaxio. Porén, isto non ocorreu nos varios casos rexistrados que, finalmente, foron positivos.
Sinalan ademais que nalgúns destes casos as ambulancias seguiron traballando o resto da xornada logo destes servizos, tempo no que se que atenderon máis pacientes, e que estas traballadoras marcharon aos seus domicilios coas súas familias e só horas despois foron informadas dos positivos detectados.
Esta situación tan grave dáse pola escaseza de equipos de protección individual que ameaza co colapso de transporte sanitario nos próximos días, co aumento de casos positivos, de non solucionarse de inmediato. Por exemplo, na xornada de onte, denuncian desde a FGAMT-CIG, na ambulancia medicalizada de Santiago, a única existente para as áreas sanitarias de Santiago e Barbanza, había unha única máscara por traballador.
Na área sanitaria de Vigo calcúlase que en dous días xa non quedará protección de ningún tipo e en Lugo, na empresa Luis Iglesias Carreira SL nin sequera se poden comprar os EPIs e o material das ambulancias porque o xerente está desaparecido, logo de anunciar a entrada da compañía en proceso concursal.
A respecto do número de equipos de protección, os delegados de prevención de riscos contactaron coas empresas para saber a cantidade dispoñíbel, dos que se fan recontos diariamente pola absoluta precariedade de medios. Ante a situación solicitan que a Fundación 061 e o SERGAS lle poña remedio de inmediato, tal e como se comprometeran, xa que na actual crise supón un risco inasumíbel facer así os traslados de pacientes.
O persoal das ambulancias non está incluído como persoal sanitario
Desde a FGAMT-CIG ademais denuncian que os empregados e empregadas de ambulancias non están incluídos como persoal sanitario para a realización de probas de detección do Covid19 tendo que acceder a elas como calquera outra persoa, co aumento do tempo de confirmación. Demandan igualmente que non recibiron aínda ningún tipo de formación específica sobre unha situación como esta, sen precedentes no sistema sanitario.
Finalmente lembran que o transporte en ambulancia, tanto o urxente como o programado, constitúe unha parte fundamental do sistema sanitario e que así debe ser tamén a súa consideración por parte do SERGAS que é o responsábel de garantir, en última instancia, a seguridade do persoal e dos pacientes.
CIG-Saúde denuncia que o recorte de horarios no servizo de helicópteros do 061 limita a súa operatividade para atender urxencias
O helicóptero non estivo dispoñíbel por ter rematado o seu horario, ao longo do verán, para avisos de afogamentos, paradas, accidentes ou o tráxico suceso no rally de Carral
Os helicópteros da Fundación Pública Urxencias Sanitarias 061 teñen recortada, desde o mes de marzo deste ano, a súa operatividade a tan só 12 horas. A CIG-Saúde denuncia que isto está a limitar a súa dispoñibilidade para atender urxencias nas que, se cadra, non se evitaría un fatal desenlace pero para as que si se porían ao alcance todos os medios dispoñíbeis. Segundo persoal do propio 061, o recorte da operatividade a determinadas horas do día vense repetindo ao longo deste verán para avisos de urxencias como paradas cardíacas, afogamentos ou mesmo no recente accidente do rally de Carral.
Rosario Rúa, representante da CIG-Saúde na Xunta de Persoal do 061, lembra que desde o ano 1990 os dous helicópteros sanitarios galegos viñan funcionando todas as horas de luz do día (de Orto a Ocaso). Porén, co novo contrato o período de servizo é de orto +12 horas, ocaso -12 horas. É dicir, o helicóptero con base na provincia da Coruña (Santiago) comeza a funcionar á saída do sol e está operativo 12 horas e o outro, con base na de Ourense, está operativo 12 horas antes do solpor.
Rúa explica que desde o 19 de marzo até o 27 de setembro o orto sitúase ás 8:00 horas, o que implica que o helicóptero de Santiago funciona desde esa hora até ás 20:00 horas (12 horas en total).
A consecuencia deste recorte, afirma, é que “ a primeira hora da mañá toda a zona de Ourense está descuberta e a última hora da tarde é a costa e o eixo atlático os que están descuberto”.
Segundo a representante da CIG-Saúde na Xunta de Persoal do 061 “isto foi o que ocorreu no accidente de Carral. Non houbo helicóptero porque o de Santiago xa rematara o seu horario e o de Ourense está a 35 minutos e, polo tanto, non é operativo”.
O caso de Carral non é o único para o que non houbo helicóptero dispoñíbel, pero si o que tivo un desenlace máis dramático, que “se cadra, neste caso, tería sido o mesmo de dispor deste medio”, especifica. “No decurso do verán houbo avisos doutras urxencias pasadas as 20:00 horas e non houbo helicóptero. A xente non o sabe porque ao final se solucionan con outros recursos máis lentos ou menos adecuados e así tápase esta irresponsabilidade”.
A CIG-Saúde considera grave que se recorte nestes medios que poden ser vitais en certos casos e subliña que o aforro pretendido é “unha miseria”. “Se dixeramos que se aforra unha barbaridade de cartos…, pero non, o certo é que só é o aforro do soldo dun piloto e un copiloto durante seis meses”, matiza Rúa.
A representante da CIG sinala ademais que as chamadas dos avisos quedan todas rexistradas e que hai constancia, polo tanto, de que hai servizos aos que non se pode ir por mor dese novo horario: un afogamento, un accidente de tráfico, unha parada en Ribeira, non sae na prensa… malia ser aínda de día.”
Respecto do dramático accidente de Carral matiza ademais que os propios técnicos das ambulancias din o mesmo, “botamos moito de menos un helicóptero porque estaba colapsado o tráfico”.
Rúa entende que de estar o helicóptero operativo “tería chegado primeiro, pero non se puido”, e por iso reitera que non se pode permitir que se manteñan ou se repitan estes recortes.
A Xunta outorga máis do 50% do concurso de ambulancias a un fondo de capital risco dun exalcalde e exdeputado provincial do PP
O BNG demandará no Parlamento a paralización do concurso e que se analice se a oferta económica garante un servizo de calidade do transporte sanitario urxente en Galiza
O representante da FGAMT-CIG, Xabier Aboi, e a deputada do BNG, Montse Pardo, comparecían este venres en rolda de prensa para denunciar as irregularidades no proceso de adxudicación do Servizo de Transporte Sanitario Terrestre Urxente. Un concurso que está xa en fase de adxudicación e que irá a parar, en máis dun 50%, a Ambuibérica, empresa participada maioritariamente por un fondo capital-risco que ten á fronte a un exalcalde e exdeputado provincial do PP en Valladolid.
Segundo explicaron, a mediados do ano 2014 a Xunta deu a coñecer o borrador para o concurso das ambulancias do 061, que contempla 11 ambulancias de soporte vital avanzado, coñecidas como medicalizadas; 101 ambulancias de soporte vital básico, as clásicas do 061, e outras 2 máis de apoio.
Este borrador estabelecía unha puntuación do 50% para a oferta económica e outro 50% para a oferta técnica e a concesión do servizo por un período de 4 anos, prorrogábel a 6, cun custo máximo de 121 millóns de euros, unha cantidade equivalente a 30,25 millóns de euros anuais.
Tal e como lembrou Xabier Aboi, nese momento a CIG xa advertiu que era “unha barbaridade dar a mesma puntuación á oferta económica que ás ofertas técnicas e asistenciais” entendendo que priorizar o económico sobre o asistencial supón “tratar a saúde como un negocio”.
O concurso foi ademais paralizado durante meses e posteriormente modificado. Así o explicou a deputada nacionalista, Montse Prado, quen sinalou que a adxudicación do anterior estaba prevista para o 15 de abril de 2014 e denunciou que “estamos a finais de xuño e está sen rematar”.
Prado explicou ademais que este concurso ten xerado malestar entre as pequenas empresas galegas do sector, polas condicións que lles solicitaban. “Téñeno cualificado como moi agresivo xa que mentres que se mantén a contía do anterior, porén exixen toda unha serie de melloras técnicas canto a instrumental médico, localización de datos…”
A isto engadiu que esas empresas denunciaban ademais que era moi axustado e que lles estaba resultando moi difícil poder ter os traballadores/as cos salarios que estabelece o convenio, polo que volver convocar o concurso coas mesmas contías económicas ía facer moi difícil afrontar os requirimentos que exixía.
Empresas beneficiadas
E así ocorreu porque, segundo explicou Aboi, coa apertura dos sobres do concurso descubriuse que moitas das empresas que tiveran máis puntuación na oferta técnica perderan na económica, na que se chegaron a presentar propostas con baixas temerarias de case o 7% nalgunha comarca como Compostela. “Isto quere dicir que de 121 millóns que tiña de custo o concerto, as empresas rebaixaron máis de 3 millóns e medio para quedar co concurso”, sinalou.
A consecuencia disto foi que “a maior parte dos empresarios galegos desapareceron ou tiveron que aliarse baixo a ameaza de desaparecer do sector alentados desde a propia patronal polo Presidente da FederaciÓn Galega de Ambulancias, Enrique Blanco, que é, ao mesmo tempo, o enviado da empresa AMBUIBÉRICA”, explicou o representante da FGAMT-CIG.
O resultado final é que neste momento, coas concesións dadas, AMBUIBÉRICA –que tiña unha presenza testemuñal no sector en Galiza- pasa a ter máis do 50% do concerto, contando empresas propiedade dela ou participantes en UTES, quedando para o empresariado galego do sector unicamente as provincias de Ourense e Lugo.
AMBUIBÉRICA
A respecto de AMBUIBÉRICA, Aboi denunciou que é unha sociedade participada maioritariamente por un fondo de investimentos “Proa Capital de Inversiones”, que foi fundada en 2007 e que está dirixida polo exalcalde do PP en Mayorga (Valladolid), Carlos Magdaleno Fernández, que ademais aparece en moitas máis empresas co aínda presidente da patronal galega, Enrique Blanco. “Unha empresa que está en proceso de venda a un grupo francés PAI Partners, vinculado a Banca Paribas –unha das maiores bancas francesas-, por un valor de 300 millóns de euros. Venda que á súa vez está vinculada á conquista de concesións en Catalunya e Galiza”, denunciou.
Lembrou que esta empresa vén precedida de escándalos, conflitos e rescinsións de contrato noutras partes do estado e tanto el como a deputada nacionalista lembraron o caso de Euskadi, onde o deterioro asistencial, o despedimento de técnicos substituídos por alumnado e as rebaixas temerarias nos salarios xa provocaron a apertura dunha comisión de investigación no Parlamento Vasco, na que están declarando sindicatos, traballadores e outros organismos.
Unha situación semellante sinalaron en Aragón, onde se chegaron a producir denuncias de viaxes por valor de case 200.000 euros, mesmo “utilizando os datos de persoas falecidas”, asegurou Aboi. Denuncias que tiveron como consecuencia que lle retirasen a esta empresa o concerto e que agora o tema estea nos xulgados por delito penal. Exemplos similares relataron en Catalunya, onde o asunto está tamén no xulgado, en Castela A Mancha ou en Cantabria.
Consecuencias laborais das baixas temerarias nos concursos
O representante da FGAMT-CIG denunciou que o modelo ao que recorren este tipo de empresas é sempre o mesmo: primeiro rebaixan a oferta económica para facerse co concerto, despois declaran perdas para rebaixar salarios e condicións laborais, ao tempo que negocian coa administración un incremento do montante económico. Entre mentres, prodúcese un importante deterioro da calidade asistencial.
Un modelo que Prado cualificou de “dumping empresarial” e que o representante da CIG denunciou por entender que o PP o “permite”, entregando “recursos públicos a empresas de fóra de Galiza, de capital risco e cunha forte vinculación ao propio PP”, afirmou.
Ante isto, o BNG xa anunciou que demandará no Parlamento de Galiza que se paralice o concurso e que se analice polo miúdo se realmente con esta oferta económica se ofrece e garante un servizo de calidade do transporte sanitario urxente en Galiza.
Os traballadores de Ambulancias do Eume acordan suspender as horas extras en protesta polos atrasos salariais
A empresa, que presta o servizo do 061 en Pontedeume, Ares, Mugardos e Monfero, está en concurso de acredores
A FGAMT-CIG compareceu este martes en rolda de prensa para informar da situación laboral que están a padecer os traballadores de Ambulancias do Eume, que presta o servizo do 061 en Pontedeume, Ares, Mugardos e Monfero. O persoal sufre continuos atrasos no cobro dos salarios e nestes momentos a empresa –que está en concurso voluntario de acredores- ten pendente de pagarlle as nóminas de xullo, agosto, setembro e outubro do pasado ano.
O responsábel de Transportes da CIG, Xesús Pastoriza, acompañado de Francisco Cartelle, explicou que a nefasta xestión do empresario e a acumulación de débedas coa Seguridade Social, Facenda, os traballadores, os provedores e incluso coa UTE na que está integrada, levaron á situación concursal actual.
Porén, dende que o pasado mes de febreiro o administrador nomeado polo Xulgado do Mercantil da Coruña se fixera cargo da xestión de Ambulancias do Eume, os atrasos no pago dos salarios continúan. “E iso que o administrador se comprometeu coa CIG e co delegado de persoal a que o abono das nóminas se ía facer puntualmente”, apunta Pastoriza.
A este respecto engade que, a pesar de que a Fundación 061 ingresou o pasado 18 de abril as cantidades correspondentes aos servizos de marzo, “non foi até hoxe que o administrador ordenou o ingreso dos salarios, curiosamente o día que tiñamos convocada rolda de prensa. Este tipo de atrasos inxustificados non os entendemos”, critica.
Aos atrasos, haille que sumar as catro nóminas que a empresa aínda ten pendentes de pagar, correspondentes aos meses de xuño, xullo, agosto e setembro de 2014. Sobre isto, Xesús Pastoriza indicou que o administrador concursal tamén se comprometeu hai un mes a entregar as certificacións aos traballadores para que poidan acudir ao FOGASA reclamar as cantidades, “pero segue sen facilitalas”.
Medidas de presión
Á vista dos reiterados incumprimentos, os traballadores acordaron unha serie de medidas para facer fronte a unha situación que cualifican de “insostíbel”. En primeiro lugar, vanse persoar no Xulgado do Mercantil 1 da Coruña poder acceder a toda a documentación relativa ao proceso, mais tamén para trasladar as queixas polas actuacións do administrador nomeado. “E non descartamos pedir a súa revogación”, advertiu o representante da CIG.
Doutra banda, os traballadores van suspender a realización de horas extraordinarias. Decisión que comunicarán mediante escrito ás partes implicadas: empresa, 061, UTE e administración concursal. A negativa a traballar por riba da xornada mensual máxima estabelecida (160 horas ordinarias e 50 de presenza) podería supor “que cara a finais de mes a ambulancia quede inoperativa e o servizo de urxencias sanitarias de Pontedeume, Ares, Mugardos e Monfero sen cobertura”.
Neste senso, Pastoriza subliñou que até o de agora o servizo foi atendido á perfección porque “o persoal estivo facendo traballo moi por riba do que lle corresponde. Pero a situación é insostíbel: débenlle salarios, dietas, horas, sofren atrasos nos cobros e mesmo se atopan con problemas para coller as vacacións”.
Para garantir o respecto das condicións dos traballadores e a prestación do servizo de transporte sanitario urxente nesta zona, dende a FGAMT-CIG demándase a intervención inmediata tanto da Fundación 061 como da Administración concursal “e que non continúen permitindo esta situación na empresa”.
A Xunta aplica outro recorte na asistencia sanitaria ao limitar a 12 horas a operatividade dos helicópteros do 061
CIG-Saúde denuncia que o Goberno do PP confunde “a eficiencia na xestión dos recursos públicos coa redución dos mesmos”
A CIG-Saúde alerta que, por primeira vez na historia dos helicópteros sanitarios (encargados de actuar en situacións de emerxencias sanitarias) non estarán activos dende a saída do sol até o ocaso, senón que por mor do novo contrato, pasarán a ter unha operatividade de 12 horas, “o que supón unha perda de operatividade para situacións de emerxencias de 394 horas ao ano”.
A CIG-Saúde lembra que dende o pasado 1 de xullo os helicópteros sanitarios – que até entón estaban xestionados polo 112- pertencen á Fundación Pública Urxencias Sanitarias 061, que acaba de remitir un comunicado ao persoal informando dos novos horarios destes aparatos. A partir de agora, terán recortada as súa operatividade naqueles días nos que o tempo entre a saída do sol e o ocaso é superior a 12 horas.
Dende o 19 de marzo até o 26 de setembro os días duran máis de 12 horas, polo tanto, dende esa data, parte do día non estará cuberto para posíbeis emerxencias en lugares lafastados dos recursos medicalizados terrestres.
Se no ano 2014 a Consellaría xa recortaba este servizo repartindo a operatividade entre o helicóptero en Santiago e o que ten base en Ourense (unha aeronave comezaba a funcionar á saída do sol e estaba operativa 12 horas, mentres que a outra estaba operativa 12 horas antes do solpor), “neste 2015 úneselle outro novo recorte: nunca estará operativo o helicóptero antes das 7:30 e despois das 21:30 horas”.
Como exemplo do que este cambio implica, a CIG-Saúde explica que no caso dun accidente ocorrido na Costa da Morte ás 07:15 horas do mes de xuño non se disporá de ningún helicóptero operativo para enviar socorro, a pesar de ser xa de día. De igual maneira, un accidente de trafico saíndo das praias en Muros ás 20:00 horas ten o helicóptero mais próximo en Ourense.
No mesmo senso, unha emerxencia ocorrida no Barco de Valdeorras ás 08:00 horas ten o helicóptero sanitario a uns 40 minutos de voo, mentres que até agora estaba a 15 minutos. “Agora esquecemos os ‘20 minutos de ouro’”, denuncian, en referencia ao tempo recomendado como máximo para a atención ás emerxencias nas zonas rurais.
“A Xunta anuncia escandalosamente o novo edificio de xestión das emerxencias na Estrada, cun altísimo custe económico, como un gran logro, cando se recorta na atención a esas emerxencias”, critican
A CIG-Saúde considera este novo contrato un recorte na asistencia sanitaria á cidadanía, encadrado dentro da política do Goberno Galego do PP “que confunde a eficiencia na xestión dos recursos públicos coa redución dos mesmos”.
Técnicos de emerxencias sanitarias trasládanlle aos grupos parlamentarios a necesidade dunha ambulancia medicalizada no Salnés
As xuntanzas celebráronse en Santiago no marco da campaña da FGAMT-CIG de Pontevedra para esixir maior cobertura no transporte sanitario público
Técnicos/as de emerxencias sanitarias trasládáronlle hoxe aos catro grupos políticos con representación no Parlamento galego a necesidade de que a comarca do Salnés conte cunha ambulancia medicalizada. As xuntanzas celebráronse hoxe en Santiago de Compostela no marco da campaña da FGAMT-CIG de Pontevedra para esixir maior cobertura no transporte sanitario público.
Os profesionais de emerxencias sanitarias estiveron no Parlamento galego acompañados de Xavier Aboi, responsábel da FGAMT-CIG de Pontevedra, con quen acudiron a entrevistarse con representantes dos grupos parlamentarios do BNG, AGE, PSOE e PP.
As xuntanzas celebráronse a iniciativa da federación de Transporte da central nacionalista, que puxo en marcha unha campaña para reclamar maior cobertura no transporte sanitario nas comarcas de Pontevedra e do Salnés.
Os técnicos/a de emerxencias sanitarios explicaron que está totalmente xustificada a necesidade de que O Salnés conte cunha ambulancia medicalizada, “xa que se cumpren todos os ratios que así o establecen, tanto de poboación (preto de 160.000 habitantes) como de número de concellos e de superficie”. Por este motivo din non entender como é posíbel que a Xunta siga sen dotar a comarca deste vehículo, “máis cando está pendente de adxudicar o servizo do 061”.
Ao mesmo tempo, sinalaron que a ausencia da ambulancia medicalizada provoca que cada vez que se produce unha urxencia vital os sanitarios/as teñen que dirixirse ao Punto de Atención Continuada para recoller o persoal necesario, “polo que se deixa sen cobertura estes centros”.
Tamén denunciaron que a falta dunha ambulancia deste tipo fai necesario que se teñan que levar a cabo transferencias en rota de pacientes (cambialos/as dunha ambulancia a outra en pleno traslado). Os profesionais advirten que este tipo de recursos, que son considerados excepcionais nos protocolos, son cada vez máis habituais.
Diante disto, o BNG comprometeuse cos técnicos/as sanitarios e co representante da FGAMT-CIG de Pontevedra a presentar unha iniciativa no Parlamento reclamando a ambulancia medicalizada para a comarca do Salnés, así como mocións nos distintos concellos afectados.
I feel so free!