Buscar novas
O persoal do 061 mobilízase facendo unha “caravana do desterro” contra o traslado á Estrada
A Xunta de Galiza presenta unha proposta “para romper a unidade do persoal”
Cunha “caravana do desterro” desde o centro de traballo do 061, en San Marcos, até o edificio administrativo da Xunta de Galiza, en San Caetano, amosaron este mércores o seu malestar as traballadoras e traballadores da Fundación Pública de Emerxencias sanitarias, 061 e o persoal da central de chamadas, que depende do Grupo Norte. Unha caravana de coches contra o traslado á Estrada á que non puido sumarse a Xunta de Persoal porque estaba nunha xuntanza convocada pola administración dun día para outro.
O persoal estatutario do 061 recibiu con sorpresa, a última hora da mañá do martes, unha chamada para concertar unha xuntanza para o día seguinte, ás 10:00 horas. Unha reunión convocada dun día para outro na que a administración puxo sobre a mesa propostas para colectivos concretos e non para o conxunto do persoal.
O presidente do comité de folga e da Xunta de Persoal, Mario Otero lembra que entre o persoal estatutario do 061 convive persoal sanitario e non sanitario, facultativo e non facultativo. Por iso asegura que “sorprendeu que para o persoal non sanitario a administración non ofertara nada. Se quixeran obter un respaldo maioritario para rematar o conflito, abranguería a todas as traballadoras e traballadores” asegura.
Por iso cren que a pretensión da Xunta é “socavar o ánimo e conseguir que o persoal sanitario, nomeadamente o facultativo, sexa máis proclive a un acordo e, polo tanto, romper así a unidade do persoal”.
A principal reivindicación desta folga é conseguir que se lles recoñeza o dereito a percibir indemnizacións polos gastos ocasionados polo transporte ao novo centro de traballo e que o tempo de desprazamento se compute como tempo de traballo. Por iso advirten que a folga continúa, porque foi convocada pola Xunta de Persoal unha vez consultados todos os traballadores e traballadoras e se manterá mentres manteñan esa posición.
Traslado en tres días
O traslado é inminente. O vindeiro luns, día 1 de outubro, ás 7:45 horas comezará xa a traballar no centro da Estrada a primeira quenda.
A tres días de que este se produza non hai acordo. Unha situación que “non nos sorprende, nin nos desanima” sinala Otero, quen lembra que o persoal do 112 fixo o seu traslado en plena folga e esta continuou 3 meses máis.
Grupo Norte
Pola súa banda o persoal da central de chamadas do 061, que depende da empresa concesionaria, Grupo Norte, recibiu como proposta á súa demanda dun plus que compensara os gastos do traslado que ían ter transporte público.
A este respecto o representante da CIG, Renato Núñez, lembra que “as liñas da estradense non coinciden co horario de entrada” e considera que “tampouco é viable a alternativa dun microbús cando estamos falando de varios desprazamentos de 1, 2, 3 ou 4 persoas”.
Outra das opcións sería facer os desprazamentos en taxi, o que tería un sobrecusto nos traslados nocturnos e de fin de semana. Alternativa que tampouco parece viable porque en calquera dos casos “a proposta da empresa superaría en custes a oferta actual e o tempo de traslado, empeorando as condicións actuais”.
Persoal estatutario e da central de chamadas do 061 exixen a Sanidade solucións polo seu traslado á Estrada
Concentráronse diante da consellaría en demanda de que o conselleiro desbloquee o conflito
Persoal da Fundación Pública de Urxencias Sanitarias, 061, e da central de chamadas, xestionada polo Grupo Norte, concentráronse este mércores diante da consellaría de Sanidade para demandar solucións perante o seu inminente traslado á Estrada, previsto para o vindeiro día 1 de outubro.
Despois de máis de mes e medio en folga a situación segue a ser, segundo o presidente do comité de folga e da Xunta de Persoal do 061, Mario Otero, “a mesma que ao principio do conflito”. Por iso denuncia a actitude “completamente inmobilista” por parte da administración que “non moveu nin un ápice a oferta rexeitada maioritariamente polos traballadores”. Unha situación pola que xa adianta que “seguiremos en folga e, como habitualmente, convocando concentracións os mércores”.
Escrito ao conselleiro
Coincidindo coa concentración, o persoal aproveitou para facer entrega dunha carta dirixida ao conselleiro “para informalo da situación actual, aínda que debería estar informado, como máximo responsable da sanidade galega” e pedirlle o seu amparo para que interveña coa intención de desbloquear o conflito e posibilite que se chegue a un acordo antes de que se faga efectivo o traslado definitivo á Estrada, fixado para o día un de outubro.
Otero denuncia que o SERGAS “pretende que sexamos nós quen paguemos a factura do traslado e que financiemos a obra dos nosos petos co tempo que teremos que deixar de dedicar á nosa familia para ir até a Estrada e con cartos, porque agora mesmo cando un traballador do 061 é enviado á Estrada a traballar a Fundación págalle unha indemnización por gastos 11,40€. Isto multiplicado por 20, son 225 € mentres que para nós, a administración ofrece 140€ brutos polo mesmo”.
Servizos mínimos que son máximos
Entre mentres mantéñense os servizos mínimos do 100% desde o 1 de agosto para o persoal sanitario e do 20% para o persoal non sanitario, co que a efectos prácticos a folga na central de coordinación non se está notando porque todo o persoal está traballando.
Isto malia existir varias sentenzas de tribunais superiores de xustiza nas que se recoñece que fixar uns servizos mínimos do 100% “é cercenar directamente o dereito á folga”, afirma o presidente do comité de folga.
Lembra o caso da folga do 112, que tamén é un servizo de atención ás emerxencias, ao que en primeira instancia se lle ditou un 60% e logo un 80% de servizos mínimos. “Sempre, en todo caso, por debaixo de 100%”.
Mario Otero subliña, a este respecto, que o 112 só atende a emerxencias mentres que o 061 ademais do número de emerxencias sanitarias atende a un número de consulta, o 902. Por iso entende que “ten menos sentido que o 061 teña un 100% dos mínimos cando o 112 tivo un 80%”.
Sen resposta aos escritos remitidos
Polo momento non recibiron resposta algunha aos escritos que presentaron aínda que Otero lembra que “o outro día, no Parlamento, o conselleiro de Sanidade dixo que teriamos que ter outra reunión, pero nós non temos constancia de ningunha convocatoria a día de hoxe, nin antes nin despois do día 1”.
Grupo Norte
Canto o grupo Norte, esta mesma tarde iniciábase a negociación ante o AGA coa esperanza de conseguir algún avance para a mellora das condicións nas que se trasladarán finalmente os traballadores/as da central de chamadas do 061.
A este respecto, o representante da CIG, Renato Núñez, denuncia que o día 2 de outubro o persoal terá que estar xa na Estrada traballando malia o que “a empresa aínda non comunicou a ningún traballador/a que van ter que comezar a traballar alí”.
Núñez explica que existen uns prazos legais establecidos para que se faga esa comunicación e que, de non facelo, iso suporía un incumprimento por parte da empresa. Por iso, precisamente hoxe, antes de inciar a mediación, o primeiro que queren é aclarar como pensan realizar o traslado se, tendo en conta as datas nas que estamos, non cumprirían os requisitos legais.
A CIG tamén ten presentadas, neste caso, dúas denuncias perante a Inspección de Traballo por servizos mínimos abusivos mais unha denuncia por tutela de dereitos fundamentais, porque, independentemente de que a empresa teña que cumprir o decreto da consellaría, “o teléfono 902 que é un teléfono de atención telefónica médica non urxente non é unha cuestión que teña que estar nos servizos mínimos”. Por iso o representante da CIG afirma que “Grupo Norte vulnerou os dereitos das e dos traballadores ao obrigalos a estar no 100% no seu postos de traballo”.
Demandan a Grupo Norte por vulnerar o dereito á folga do persoal do 061
A Xunta remitiu o decreto de servizos mínimos 41 minutos antes de comezar o primeiro paro
A CIG vén de presentar demanda de tutela dos dereitos fundamentais pola vulneración do dereito á folga das traballadoras e traballadores da central de chamadas do 061, xestionada por Grupo Norte, ao se decretaren uns servizos mínimos do 100% das presenzas habituais tan só 41 minutos antes de iniciarse o primeiro paro e sen posibilidade de presentar alegacións previas.
O pasado 24 de xullo de 2018 preavisouse legalmente a convocatoria dunha folga indefinida, con inicio no día 4 de agosto, no marco do conflito xerado pola Modificación Substancial das Condicións de Traballo, consistente no cambio de centro de traballo de todo o cadro de persoal de Grupo Norte.
O 14 de agosto, e ante a negativa da empresa a volver negociar mentres continuara a folga, o persoal acordou a súa desconvocatoria. A partir de aí celebráronse unha serie de xuntanzas pero na última, celebrada o pasado 22 de agosto, a patronal afirmou que non era capaz de contactar cos responsables da Fundación 061 para transmitir as reinvidicacións formuladas pola representación das traballadoras e traballadores.
O 29 de agosto, e diante da imposibilidade de chegar a un acordo, decídese convocar novamente folga que, desta volta, xa non sería indefinida senón para os días 10, 15, 17 e 22 de setembro.
Sen decreto de servizos mínimos
O día 8 de setembro, ante a ausencia de decreto de servizos mínimos, o comité de folga diríxese mediante whatsapp ao avogado da empresa e ao Responsable de Proxecto manifestando a súa preocupación sobre o desenvolvemento da xornada de folga do luns se non se acordan uns servizos mínimos.
Despois desta primeira comunicación, ese mesmo día o Director Territorial para o Noroeste de España e Portugal chama telefonicamente ao representante da CIG e asesor da parte social, Renato Núñez, a quen solicita que envíe por mail a desconvocatoria do día 14 de agosto e a nova convocatoria do día 30 de agosto. Documentación que se remite por mail o propio día 8 de setembro, con confirmación de recepción.
O día 9, ante a ausencia de información, Núñez diríxese novamente ao Director Territorial Noroeste de España e Portugal para ver a posibilidade de acordar uns servizos mínimos entre a parte social e patronal. Esta posibilidade desbótase ao confiar a patronal en que a Consellería de Sanidade emita unha comunicación ordenando os servizos mínimos.
O día 10, na propia xornada da folga, o representante da CIG comunica novamente -por sms, ao Director Territorial para o Noroeste de España e Portugal- que non consta ningún decreto publicado no DOG e recomenda que contacte co Comité de Folga para consensuar uns servizos mínimos que garantan a atención dos servizon de emerxencia e permitan aos traballadores e traballadoras exercer o dereito á folga, sen recibir resposta.
Ás 11:19h do día 10 de setembro, a Consellería de Sanidade emite un comunicado ordenando uns servizos mínimos do 100% e dá de prazo até as 12:00 horas do día 11 para formular alegacións.
Servizos mínimos fixados a 41 minutos do inicio da xornada de folga
Na demanda recóllese que a comunicación de servizos mínimos se realizou a 41 minutos do inicio da xornada de folga, “impedindo calquera alegación ou recurso” e que esta comunicación entra a valorar ademais cuestións alleas ao procedemento que, de seren certas, escusaría a existencia da propia comunicación.
Entre outras cuestións sinala que a orde do 3 de agosto de 2018 de servizos mínimos da convocatoria de folga anterior segue vixente ao non ser derrogada e a pesar de que esta foi desconvocada con data 14 de agosto de 2018.
Fronte a isto, na demanda sinálase que é evidente que se iso fora así non existiría a comunicación de servizos mínimos que presenta e pola que abre período de alegacións.
Ademais afírmase que a convocatoria de folga presentada para os días 10, 15, 17 e 22 de setembro están comprendidos dentro da anterior folga convocada con carácter indefinido. “Porén, obvia totalmente a desconvocatoria de folga presentada o día 14 de agosto por esixencia da patronal, e o feito de que a nova convocatoria presentada o día 30 de agosto non é indefinida; esta é para catro día concretos do mes de setembro”.
Xunto a isto dise literalmente que a Consellería non tivo constancia da desconvocatoria da folga anterior até o mesmo día 8 de setembro, data na que asesor da parte social se dirixe á empresa Grupo Norte para mostrar a súa preocupación pola ausencia da previsión de servizos mínimos. Un feito que “resulta absolutamente cuestionable pois a desconvocatoria está rexistrada perante a Consellería de Traballo”.
Grupo Norte designa o 100% do persoal
Aos poucos minutos de que a Consellería de Sanidade emitira a comunicación e abrira prazo de alegación, a empresa concesionaria (Grupo Norte) designou ao 100% do persoal como servizos mínimos e cominou “con carácter imperativo” o cumprimento dos mesmos.
A demanda cuestiona ademais que Grupo Norte ditaminara o 100% das presenzas habituais como servizos mínimos non só no 061, senón tamén no 902400116, que tamén se atende desde esta central de chamadas, cando non é un servizo esencial.
Xunto a isto sinálase que o día 14 de setembro de 2018, 4 días despois do inicio da folga e na véspera da segunda xornada de paro, a Consellería de Sanidade publica orde que “entrará en vigor o mesmo día súa publicación”. O rechamante é que a Orde ten data do día 10, o día anterior á presentación de alegacións polo Comité de folga.
Imposibilidade de exercer o dereito de folga
A consecuencia de todo isto, e por mor da conduta antixurídica da empresa demandada, as persoas afectadas víronse privadas de exercer o seu dereito á folga. Por iso se solicita que se declare “a nulidade radical da conduta da empresa demandada consistente en impedir o exercicio do dereito á folga do 100% do cadro de persoal” e que esta sexa condenada por iso “ordenando o cesamento inmediato do comportamento antisindical”.
Denuncian á Fundación Urxencias Sanitarias de Galiza, 061, por vulneración do dereito de folga
Convocan concentración o día 19 ás 12:30 horas diante da consellaría de Sanidade
O comité de folga do 061 vén de presentar unha denuncia perante a Inspección de Traballo contra a Fundación Urxencias Sanitarias de Galiza, 061, por vulneración do dereito de folga e liberdade sindical, por decretar uns servizos mínimos “desproporcionados” do 100%. Demanda por iso que se levante a correspondente acta de infracción en materia de vulneración dos dereitos fundamentais dos traballadores/as, con imposición da sanción que corresponda e, notificación das actuacións levadas a cabo. O persoal ten prevista a próxima mobilización para o vindeiro mércores, día 19 de setembro, ás 12:30 horas diante da consellaría de Sanidade.
A Xunta de Persoal de Santiago de Compostela da Fundación Pública Urxencias Sanitarias de Galicia-061 ten convocada, desde o pasado día 1 de agosto, unha folga indefinida que afecta ao persoal estatutario que presta os seus servizos nos actuais centros de traballo de Conxo e San Marcos. A folga desenvólvese das 12.00 ás 14.00 horas e das 19.00 ás 21.00 horas todos os mércores, domingos e festivos.
Servizos mínimos
Ante esta convocatoria, a Consellería de Sanidade publicou no D.O.G do 31 de xullo de 2018 a ORDE do 27 de xullo de 2018 pola que se determinan os servizos mínimos e que establece que a designación nominal dos efectivos que deben cubrir os servizos mínimos "deberá recaer no persoal de xeito rotatorio".
Porén, a dirección do 061 vén designando, dentro do grupo dos efectivos non sanitarios, de forma reiterada, ás mesmas persoas como servizos mínimos, sendo solo substituídos os "titulares" no caso de que gocen de vacacións ou permisos retribuídos o día de folga.
Segundo explica o presidente da Xunta de Persoal e do comité de folga, Mario Otero, esta orde non establece como servizo mínimo ao enfermeiro de consulta localizado. Porén, o domingo 5 de agosto de 2018 si se activou a un traballador que figura na carteleira de quendas como localizado, para cubrir a quenda de 09:00 a 21:00. “O traballador consultou coa dirección para facer efectivo o seu dereito a folga de 12:00 a 14:00 e de 19:00 a 21:00 e recibiu unha resposta negativa por parte da dirección”.
Xunto a isto, Otero lembra tamén que existe xurisprudencia da Sala do contencioso do Tribunal Supremo, que establece que é desproporcionado fixar uns servizos mínimos do 100%, mesmo tratándose dun servizo de urxencias; que considera que a existencia dun servizo mínimo esencial non constitúe por si soa unha razón suficiente para o establecemento dos servizos mínimos do 100%; que establece que non cabe fixar os servizos mínimos nun 100%, mesmo no ámbito das urxencias, pois iso equivale cercenar o exercicio do dereito de folga e que confirma que acadar o nivel de rendemento habitual equivale a impedir o dereito de folga.
O presidente do comité de folga denuncia ademais que, a todo isto engádese a cancelación das reunións ordinarias entre dirección e xunta de persoal como represalia pola convocatoria de folga, cuestión que tamén foi denunciada perante ea Inspección de Traballo o pasado día 30 de agosto.
CIG recomenda o persoal de Grupo Norte acatar a orde de mínimos do SERGAS pola inseguridade xurídica xerada
Denuncia a incompetencia da consellaría por emitir unha orde, non un decreto, 45 minutos antes do paro
A CIG vén de recomendar ao persoal da central de chamadas do 061, concesionada a Grupo Norte, que acate a Orde de servizos mínimos emitida pola consellaría de Sanidade por mor da inseguridade xurídica na que quedan as traballadoras e traballadores. Considera que remitir esa orde –e non un decreto, como sería preceptivo- a tan só 45 minutos de se iniciar o primeiro dos paros constata a súa incompetencia e denuncia que se obriga ao persoal a manter o 100% das presenzas habituais como servizos mínimos, impedindo mesmo a presentación de alegacións. Diante desta situación a central sindical xa anunciou que presentará unha denuncia por vulneración de dereito á folga.
Segundo explica o representante da CIG, Renato Núñez, tampouco Grupo Norte presentou, até escasos minutos antes de se iniciar a primeira quenda de folga, o listado de presenzas no que se recolle que traballadores/as teñen que estar no seu posto. Un listado que, en todo caso, só di que teñen que “estar todos”.
Grupo Norte alega que non soubo nada desta convocatoria até o día 8, cando esta foi presentada coa preceptiva antelación legal. De feito, a consellaría de Sanidade, na orde emitida si recolle que foi o luns día 3 de setembro, cando recibiu a comunicación de folga para os días 10, 15, 17 e 22 de setembro, de 12:00 a 14:00 horas e de 19:00 a 21:00 horas.
A CIG xa denunciou esta fin de semana a irregularidade que supuña carecer de decreto de servizos mínimos a 24 horas do inicio dos paros e o propio persoal, para garantir a cobertura dun servizo público esencial como este, acordara, por responsabilidade, organizarse para manter unha presenza, durante os paros, do 60% do persoal.
Persoal estatutario
Entre mentres, continúa a folga e as mobilizacións do persoal estatutario do 061, en demanda de “condicións dignas e xustas para a xente que se ve afectada por un traslado forzoso á Estrada e obrigada a trasladar o seu posto de traballo a máis de 30 quilómetros”.
CIG-Saúde denuncia que o recorte de horarios no servizo de helicópteros do 061 limita a súa operatividade para atender urxencias
O helicóptero non estivo dispoñíbel por ter rematado o seu horario, ao longo do verán, para avisos de afogamentos, paradas, accidentes ou o tráxico suceso no rally de Carral
Os helicópteros da Fundación Pública Urxencias Sanitarias 061 teñen recortada, desde o mes de marzo deste ano, a súa operatividade a tan só 12 horas. A CIG-Saúde denuncia que isto está a limitar a súa dispoñibilidade para atender urxencias nas que, se cadra, non se evitaría un fatal desenlace pero para as que si se porían ao alcance todos os medios dispoñíbeis. Segundo persoal do propio 061, o recorte da operatividade a determinadas horas do día vense repetindo ao longo deste verán para avisos de urxencias como paradas cardíacas, afogamentos ou mesmo no recente accidente do rally de Carral.
Rosario Rúa, representante da CIG-Saúde na Xunta de Persoal do 061, lembra que desde o ano 1990 os dous helicópteros sanitarios galegos viñan funcionando todas as horas de luz do día (de Orto a Ocaso). Porén, co novo contrato o período de servizo é de orto +12 horas, ocaso -12 horas. É dicir, o helicóptero con base na provincia da Coruña (Santiago) comeza a funcionar á saída do sol e está operativo 12 horas e o outro, con base na de Ourense, está operativo 12 horas antes do solpor.
Rúa explica que desde o 19 de marzo até o 27 de setembro o orto sitúase ás 8:00 horas, o que implica que o helicóptero de Santiago funciona desde esa hora até ás 20:00 horas (12 horas en total).
A consecuencia deste recorte, afirma, é que “ a primeira hora da mañá toda a zona de Ourense está descuberta e a última hora da tarde é a costa e o eixo atlático os que están descuberto”.
Segundo a representante da CIG-Saúde na Xunta de Persoal do 061 “isto foi o que ocorreu no accidente de Carral. Non houbo helicóptero porque o de Santiago xa rematara o seu horario e o de Ourense está a 35 minutos e, polo tanto, non é operativo”.
O caso de Carral non é o único para o que non houbo helicóptero dispoñíbel, pero si o que tivo un desenlace máis dramático, que “se cadra, neste caso, tería sido o mesmo de dispor deste medio”, especifica. “No decurso do verán houbo avisos doutras urxencias pasadas as 20:00 horas e non houbo helicóptero. A xente non o sabe porque ao final se solucionan con outros recursos máis lentos ou menos adecuados e así tápase esta irresponsabilidade”.
A CIG-Saúde considera grave que se recorte nestes medios que poden ser vitais en certos casos e subliña que o aforro pretendido é “unha miseria”. “Se dixeramos que se aforra unha barbaridade de cartos…, pero non, o certo é que só é o aforro do soldo dun piloto e un copiloto durante seis meses”, matiza Rúa.
A representante da CIG sinala ademais que as chamadas dos avisos quedan todas rexistradas e que hai constancia, polo tanto, de que hai servizos aos que non se pode ir por mor dese novo horario: un afogamento, un accidente de tráfico, unha parada en Ribeira, non sae na prensa… malia ser aínda de día.”
Respecto do dramático accidente de Carral matiza ademais que os propios técnicos das ambulancias din o mesmo, “botamos moito de menos un helicóptero porque estaba colapsado o tráfico”.
Rúa entende que de estar o helicóptero operativo “tería chegado primeiro, pero non se puido”, e por iso reitera que non se pode permitir que se manteñan ou se repitan estes recortes.
A Xunta outorga máis do 50% do concurso de ambulancias a un fondo de capital risco dun exalcalde e exdeputado provincial do PP
O BNG demandará no Parlamento a paralización do concurso e que se analice se a oferta económica garante un servizo de calidade do transporte sanitario urxente en Galiza
O representante da FGAMT-CIG, Xabier Aboi, e a deputada do BNG, Montse Pardo, comparecían este venres en rolda de prensa para denunciar as irregularidades no proceso de adxudicación do Servizo de Transporte Sanitario Terrestre Urxente. Un concurso que está xa en fase de adxudicación e que irá a parar, en máis dun 50%, a Ambuibérica, empresa participada maioritariamente por un fondo capital-risco que ten á fronte a un exalcalde e exdeputado provincial do PP en Valladolid.
Segundo explicaron, a mediados do ano 2014 a Xunta deu a coñecer o borrador para o concurso das ambulancias do 061, que contempla 11 ambulancias de soporte vital avanzado, coñecidas como medicalizadas; 101 ambulancias de soporte vital básico, as clásicas do 061, e outras 2 máis de apoio.
Este borrador estabelecía unha puntuación do 50% para a oferta económica e outro 50% para a oferta técnica e a concesión do servizo por un período de 4 anos, prorrogábel a 6, cun custo máximo de 121 millóns de euros, unha cantidade equivalente a 30,25 millóns de euros anuais.
Tal e como lembrou Xabier Aboi, nese momento a CIG xa advertiu que era “unha barbaridade dar a mesma puntuación á oferta económica que ás ofertas técnicas e asistenciais” entendendo que priorizar o económico sobre o asistencial supón “tratar a saúde como un negocio”.
O concurso foi ademais paralizado durante meses e posteriormente modificado. Así o explicou a deputada nacionalista, Montse Prado, quen sinalou que a adxudicación do anterior estaba prevista para o 15 de abril de 2014 e denunciou que “estamos a finais de xuño e está sen rematar”.
Prado explicou ademais que este concurso ten xerado malestar entre as pequenas empresas galegas do sector, polas condicións que lles solicitaban. “Téñeno cualificado como moi agresivo xa que mentres que se mantén a contía do anterior, porén exixen toda unha serie de melloras técnicas canto a instrumental médico, localización de datos…”
A isto engadiu que esas empresas denunciaban ademais que era moi axustado e que lles estaba resultando moi difícil poder ter os traballadores/as cos salarios que estabelece o convenio, polo que volver convocar o concurso coas mesmas contías económicas ía facer moi difícil afrontar os requirimentos que exixía.
Empresas beneficiadas
E así ocorreu porque, segundo explicou Aboi, coa apertura dos sobres do concurso descubriuse que moitas das empresas que tiveran máis puntuación na oferta técnica perderan na económica, na que se chegaron a presentar propostas con baixas temerarias de case o 7% nalgunha comarca como Compostela. “Isto quere dicir que de 121 millóns que tiña de custo o concerto, as empresas rebaixaron máis de 3 millóns e medio para quedar co concurso”, sinalou.
A consecuencia disto foi que “a maior parte dos empresarios galegos desapareceron ou tiveron que aliarse baixo a ameaza de desaparecer do sector alentados desde a propia patronal polo Presidente da FederaciÓn Galega de Ambulancias, Enrique Blanco, que é, ao mesmo tempo, o enviado da empresa AMBUIBÉRICA”, explicou o representante da FGAMT-CIG.
O resultado final é que neste momento, coas concesións dadas, AMBUIBÉRICA –que tiña unha presenza testemuñal no sector en Galiza- pasa a ter máis do 50% do concerto, contando empresas propiedade dela ou participantes en UTES, quedando para o empresariado galego do sector unicamente as provincias de Ourense e Lugo.
AMBUIBÉRICA
A respecto de AMBUIBÉRICA, Aboi denunciou que é unha sociedade participada maioritariamente por un fondo de investimentos “Proa Capital de Inversiones”, que foi fundada en 2007 e que está dirixida polo exalcalde do PP en Mayorga (Valladolid), Carlos Magdaleno Fernández, que ademais aparece en moitas máis empresas co aínda presidente da patronal galega, Enrique Blanco. “Unha empresa que está en proceso de venda a un grupo francés PAI Partners, vinculado a Banca Paribas –unha das maiores bancas francesas-, por un valor de 300 millóns de euros. Venda que á súa vez está vinculada á conquista de concesións en Catalunya e Galiza”, denunciou.
Lembrou que esta empresa vén precedida de escándalos, conflitos e rescinsións de contrato noutras partes do estado e tanto el como a deputada nacionalista lembraron o caso de Euskadi, onde o deterioro asistencial, o despedimento de técnicos substituídos por alumnado e as rebaixas temerarias nos salarios xa provocaron a apertura dunha comisión de investigación no Parlamento Vasco, na que están declarando sindicatos, traballadores e outros organismos.
Unha situación semellante sinalaron en Aragón, onde se chegaron a producir denuncias de viaxes por valor de case 200.000 euros, mesmo “utilizando os datos de persoas falecidas”, asegurou Aboi. Denuncias que tiveron como consecuencia que lle retirasen a esta empresa o concerto e que agora o tema estea nos xulgados por delito penal. Exemplos similares relataron en Catalunya, onde o asunto está tamén no xulgado, en Castela A Mancha ou en Cantabria.
Consecuencias laborais das baixas temerarias nos concursos
O representante da FGAMT-CIG denunciou que o modelo ao que recorren este tipo de empresas é sempre o mesmo: primeiro rebaixan a oferta económica para facerse co concerto, despois declaran perdas para rebaixar salarios e condicións laborais, ao tempo que negocian coa administración un incremento do montante económico. Entre mentres, prodúcese un importante deterioro da calidade asistencial.
Un modelo que Prado cualificou de “dumping empresarial” e que o representante da CIG denunciou por entender que o PP o “permite”, entregando “recursos públicos a empresas de fóra de Galiza, de capital risco e cunha forte vinculación ao propio PP”, afirmou.
Ante isto, o BNG xa anunciou que demandará no Parlamento de Galiza que se paralice o concurso e que se analice polo miúdo se realmente con esta oferta económica se ofrece e garante un servizo de calidade do transporte sanitario urxente en Galiza.
Os traballadores de Ambulancias do Eume acordan suspender as horas extras en protesta polos atrasos salariais
A empresa, que presta o servizo do 061 en Pontedeume, Ares, Mugardos e Monfero, está en concurso de acredores
A FGAMT-CIG compareceu este martes en rolda de prensa para informar da situación laboral que están a padecer os traballadores de Ambulancias do Eume, que presta o servizo do 061 en Pontedeume, Ares, Mugardos e Monfero. O persoal sufre continuos atrasos no cobro dos salarios e nestes momentos a empresa –que está en concurso voluntario de acredores- ten pendente de pagarlle as nóminas de xullo, agosto, setembro e outubro do pasado ano.
O responsábel de Transportes da CIG, Xesús Pastoriza, acompañado de Francisco Cartelle, explicou que a nefasta xestión do empresario e a acumulación de débedas coa Seguridade Social, Facenda, os traballadores, os provedores e incluso coa UTE na que está integrada, levaron á situación concursal actual.
Porén, dende que o pasado mes de febreiro o administrador nomeado polo Xulgado do Mercantil da Coruña se fixera cargo da xestión de Ambulancias do Eume, os atrasos no pago dos salarios continúan. “E iso que o administrador se comprometeu coa CIG e co delegado de persoal a que o abono das nóminas se ía facer puntualmente”, apunta Pastoriza.
A este respecto engade que, a pesar de que a Fundación 061 ingresou o pasado 18 de abril as cantidades correspondentes aos servizos de marzo, “non foi até hoxe que o administrador ordenou o ingreso dos salarios, curiosamente o día que tiñamos convocada rolda de prensa. Este tipo de atrasos inxustificados non os entendemos”, critica.
Aos atrasos, haille que sumar as catro nóminas que a empresa aínda ten pendentes de pagar, correspondentes aos meses de xuño, xullo, agosto e setembro de 2014. Sobre isto, Xesús Pastoriza indicou que o administrador concursal tamén se comprometeu hai un mes a entregar as certificacións aos traballadores para que poidan acudir ao FOGASA reclamar as cantidades, “pero segue sen facilitalas”.
Medidas de presión
Á vista dos reiterados incumprimentos, os traballadores acordaron unha serie de medidas para facer fronte a unha situación que cualifican de “insostíbel”. En primeiro lugar, vanse persoar no Xulgado do Mercantil 1 da Coruña poder acceder a toda a documentación relativa ao proceso, mais tamén para trasladar as queixas polas actuacións do administrador nomeado. “E non descartamos pedir a súa revogación”, advertiu o representante da CIG.
Doutra banda, os traballadores van suspender a realización de horas extraordinarias. Decisión que comunicarán mediante escrito ás partes implicadas: empresa, 061, UTE e administración concursal. A negativa a traballar por riba da xornada mensual máxima estabelecida (160 horas ordinarias e 50 de presenza) podería supor “que cara a finais de mes a ambulancia quede inoperativa e o servizo de urxencias sanitarias de Pontedeume, Ares, Mugardos e Monfero sen cobertura”.
Neste senso, Pastoriza subliñou que até o de agora o servizo foi atendido á perfección porque “o persoal estivo facendo traballo moi por riba do que lle corresponde. Pero a situación é insostíbel: débenlle salarios, dietas, horas, sofren atrasos nos cobros e mesmo se atopan con problemas para coller as vacacións”.
Para garantir o respecto das condicións dos traballadores e a prestación do servizo de transporte sanitario urxente nesta zona, dende a FGAMT-CIG demándase a intervención inmediata tanto da Fundación 061 como da Administración concursal “e que non continúen permitindo esta situación na empresa”.
A Xunta aplica outro recorte na asistencia sanitaria ao limitar a 12 horas a operatividade dos helicópteros do 061
CIG-Saúde denuncia que o Goberno do PP confunde “a eficiencia na xestión dos recursos públicos coa redución dos mesmos”
A CIG-Saúde alerta que, por primeira vez na historia dos helicópteros sanitarios (encargados de actuar en situacións de emerxencias sanitarias) non estarán activos dende a saída do sol até o ocaso, senón que por mor do novo contrato, pasarán a ter unha operatividade de 12 horas, “o que supón unha perda de operatividade para situacións de emerxencias de 394 horas ao ano”.
A CIG-Saúde lembra que dende o pasado 1 de xullo os helicópteros sanitarios – que até entón estaban xestionados polo 112- pertencen á Fundación Pública Urxencias Sanitarias 061, que acaba de remitir un comunicado ao persoal informando dos novos horarios destes aparatos. A partir de agora, terán recortada as súa operatividade naqueles días nos que o tempo entre a saída do sol e o ocaso é superior a 12 horas.
Dende o 19 de marzo até o 26 de setembro os días duran máis de 12 horas, polo tanto, dende esa data, parte do día non estará cuberto para posíbeis emerxencias en lugares lafastados dos recursos medicalizados terrestres.
Se no ano 2014 a Consellaría xa recortaba este servizo repartindo a operatividade entre o helicóptero en Santiago e o que ten base en Ourense (unha aeronave comezaba a funcionar á saída do sol e estaba operativa 12 horas, mentres que a outra estaba operativa 12 horas antes do solpor), “neste 2015 úneselle outro novo recorte: nunca estará operativo o helicóptero antes das 7:30 e despois das 21:30 horas”.
Como exemplo do que este cambio implica, a CIG-Saúde explica que no caso dun accidente ocorrido na Costa da Morte ás 07:15 horas do mes de xuño non se disporá de ningún helicóptero operativo para enviar socorro, a pesar de ser xa de día. De igual maneira, un accidente de trafico saíndo das praias en Muros ás 20:00 horas ten o helicóptero mais próximo en Ourense.
No mesmo senso, unha emerxencia ocorrida no Barco de Valdeorras ás 08:00 horas ten o helicóptero sanitario a uns 40 minutos de voo, mentres que até agora estaba a 15 minutos. “Agora esquecemos os ‘20 minutos de ouro’”, denuncian, en referencia ao tempo recomendado como máximo para a atención ás emerxencias nas zonas rurais.
“A Xunta anuncia escandalosamente o novo edificio de xestión das emerxencias na Estrada, cun altísimo custe económico, como un gran logro, cando se recorta na atención a esas emerxencias”, critican
A CIG-Saúde considera este novo contrato un recorte na asistencia sanitaria á cidadanía, encadrado dentro da política do Goberno Galego do PP “que confunde a eficiencia na xestión dos recursos públicos coa redución dos mesmos”.
Técnicos de emerxencias sanitarias trasládanlle aos grupos parlamentarios a necesidade dunha ambulancia medicalizada no Salnés
As xuntanzas celebráronse en Santiago no marco da campaña da FGAMT-CIG de Pontevedra para esixir maior cobertura no transporte sanitario público
Técnicos/as de emerxencias sanitarias trasládáronlle hoxe aos catro grupos políticos con representación no Parlamento galego a necesidade de que a comarca do Salnés conte cunha ambulancia medicalizada. As xuntanzas celebráronse hoxe en Santiago de Compostela no marco da campaña da FGAMT-CIG de Pontevedra para esixir maior cobertura no transporte sanitario público.
Os profesionais de emerxencias sanitarias estiveron no Parlamento galego acompañados de Xavier Aboi, responsábel da FGAMT-CIG de Pontevedra, con quen acudiron a entrevistarse con representantes dos grupos parlamentarios do BNG, AGE, PSOE e PP.
As xuntanzas celebráronse a iniciativa da federación de Transporte da central nacionalista, que puxo en marcha unha campaña para reclamar maior cobertura no transporte sanitario nas comarcas de Pontevedra e do Salnés.
Os técnicos/a de emerxencias sanitarios explicaron que está totalmente xustificada a necesidade de que O Salnés conte cunha ambulancia medicalizada, “xa que se cumpren todos os ratios que así o establecen, tanto de poboación (preto de 160.000 habitantes) como de número de concellos e de superficie”. Por este motivo din non entender como é posíbel que a Xunta siga sen dotar a comarca deste vehículo, “máis cando está pendente de adxudicar o servizo do 061”.
Ao mesmo tempo, sinalaron que a ausencia da ambulancia medicalizada provoca que cada vez que se produce unha urxencia vital os sanitarios/as teñen que dirixirse ao Punto de Atención Continuada para recoller o persoal necesario, “polo que se deixa sen cobertura estes centros”.
Tamén denunciaron que a falta dunha ambulancia deste tipo fai necesario que se teñan que levar a cabo transferencias en rota de pacientes (cambialos/as dunha ambulancia a outra en pleno traslado). Os profesionais advirten que este tipo de recursos, que son considerados excepcionais nos protocolos, son cada vez máis habituais.
Diante disto, o BNG comprometeuse cos técnicos/as sanitarios e co representante da FGAMT-CIG de Pontevedra a presentar unha iniciativa no Parlamento reclamando a ambulancia medicalizada para a comarca do Salnés, así como mocións nos distintos concellos afectados.
I feel so free!