Buscar novas
Se hai imputación formal, a CIG persoarase na investigación do concurso de ambulancias do 061
A FGAMT solicitará que se rescindan as concesións se se demostra que houbo fraude na adxudicación
Diante das últimas informacións que sacuden ao sector de ambulancias de Galiza, a FGAMT-CIG compareceu en rolda de prensa para avaliar a investigación xudicial aberta por presunta prevaricación, información privilexiada e tráfico de influencias no concurso de adxudicación do transporte sanitario urxente do 061, adiantando que, no momento que haxa unha imputación formal, a central sindical persoarase como acusación popular.
Antes de abrirse os pregos, a CIG xa denunciara que había empresas que tiñan as ambulancias listas e rotuladas no concesionario. Unha desas empresas era Ambuibérica, que até o concurso resolto en 2015 non tiña ningunha presenza en Galiza e que na actualidade ten adxudicado unha parte importante do transporte sanitario.
"Nós xa dicíamos que esta empresa, que é dun ex deputado do PP, ía levar boa parte de concurso, como así resultou. Agora parece que hai indicios de que o concurso foi unha fraude, no sentido de que alguén da administración pasou os pregos de condicións a certas compañías para que puideran concursar nas mellores condicións e obter máis puntos", aseverou Ernesto López Rei, da Executiva da FGAMT.
O sindicalista lembrou que a CIG solicitara no seu día á administración información sobre o concurso, que "sempre nos foi denegada". "Agardamos que a investigación sirva para que se depuren responsabilidades e se chega a demostrarse que houbo fraude, demandamos que se rescindan as concesións e se abra unha nova adxudicación".
Coa polémica servida, puntualizou que "non sabemos nin onde está o director da Fundación 061 nin o inspector. Descoñecemos se están de baixa, se foron cesados ou se simplemente se esfumaron do mapa".
Sobre a investigación xudicial López Rei ironizou: "non estamos ante ningún feito novo nas grandes concesións públicas. Neste caso, esperamos que se levante a tapa do sumidoiro, agrome todo e as cabezas pensantes, caian".
O convenio colectivo, paralizado
A respecto do desembarco de Ambuibérica en Galiza, lembrou que a empresa xa carrexaba "uns antecedentes penosos". Como empresa máis grande, e polo tanto con maior peso na mesa de negociación, está bloqueando o convenio colectivo e fomentando a precarización do sector ao recorrer a contratos en prácticas. Unha práctica, matizou, que non é exclusiva de Ambuibérica. "E todo isto sen que haxa ningún tipo de control por parte da administración", denunciou.
Sobre a precarización das condicións laborais e salariais dos/as traballadores/as de ambulancias sinalou tamén á responsabilidade da Xunta por ter permitido unha redución dos custes do servizo, a conta de primar no concurso as ofertas temerarias á baixa, que nalgúns casos chegaron a rebaixar até un 12% o prezo. “Agora as empresas alegan que non teñen cartos e pretenden que sexan os traballadores e traballadoras quen asuman ese recorte cos seus salarios e o seu esforzo”.
Vigo -
O persoal das ambulancias volve á rúa para reclamar un convenio colectivo digno
Traballadores/as e delegados/as da CIG concentráronse no hospital Álvaro Cunqueiro de Vigo
Un grupo de traballadores/as e delegados/as sindicais da CIG no sector das ambulancias desenvolveu esta mañá unha concentración no acceso ao hospital de día do Álvaro Cunqueiro de Vigo para reclamar un convenio colectivo digno. Dende a central denuncian que a patronal mantén paralizadas as negociacións coa complicidade da Xunta e apostan por continuar coas protestas.
Segundo explican dende a FGAMT-CIG, as mobilizacións responden á actitude “absolutamente irresponsábel” dos empresarios/as, que manteñen paralizada a negociación do convenio logo dunha serie de reunións “nas que se dedicaron a perder o tempo”. Denuncian que este comportamento da patronal conta, ademais, coa complicidade da Xunta, da Consellería de Sanidade e da Fundación de Emerxencias Sanitarias 061. “Os traballadores/as das ambulancias levamos moitos anos loitando pola profesionalización e dignificación do noso traballo, do sector e tamén polos dereitos dos pacientes e usuarios/as dun servizo tan importante para a cidadanía como é o do transporte sanitario”, indican.
Ofertas por debaixo do custe do servizo
Lembran que nos últimos concursos do transporte en ambulancia a Xunta otorgou a concesión do servizo a empresas que ofertaron até un 12% por debaixo do prezo de custo. “Agora esas mesmas empresas pretenden que os traballadores/as paguemos esa rebaixa do noso peto e co noso esforzo, cando todo o mundo sabe que unha mellor calidade no traballo significa un mellor servizo”.
Neste senso, sinalan que unha gran parte do sector cobra menos de 800 euros, posto que está contratado en prácticas. Ademais, as bases do persoal non reúnen as condicións axeitadas e non se desinfectan os uniformes de traballo, co risco que isto supón para a saúde de traballadores/as e pacientes. Tamén é necesario mellorar a prevención de riscos laborais, “xa que cada ano son moitos/as os compañeiros/as que enferman ou se lesionan a causa do traballo”.
Esta situación fixo que CIG manteña dende hai tempo un calendario de mobilizacións en defensa do convenio e da profesionalización e dignificación do sector. “Unha profesionalización que pasa por acadar un salario digno, reducir os contratos en prácticas que rebaixan os salarios un 40% e pola recuperación da terceira paga extra que desapareceu no anterior convenio”, rematan.
O sector de transporte en ambulancia, en loita por un convenio digno
Manifestáronse este xoves en Compostela para reclamar da patronal que sente a negociar
Traballadores e traballadoras do sector de ambulancias percorreron esta mañá, con petardos e bucinas, as rúas de Compostela para demandar a negociación do convenio colectivo, paralizado pola patronal co coñecemento e “complicidade” da Xunta de Galiza, da consellaría de Sanidade e da Fundación de Emerxencias 061. A mobilización rematou diante da sede da CEG, á que Ernesto López Rei, representante da FGAMT, demandou que senten a negociar porque “cada día que pase as nosas posicións serán máis duras”.
Ese recado á patronal foi o primeiro dos tres que mandou. O segundo foi á Xunta de Galiza á que acusou de “montar todo este tinglado”, sacar as licitacións do transporte urxente e do transporte non urxente “con asignacións míseras pensando que os que ían pagar o pato eran outra vez os de sempre, os traballadores”.
Por iso exixiulle que medie neste conflito que xa hai tempo que comezou “porque foron quen montaron este cristo, son os que pretenden que os salarios e as condicións de traballo vaian á baixa e, polo tanto, tamén teñen que pagar as consecuencias, porque teñen moita responsabilidade”.
Para lanzar o último recado, non deu destinatario. “Creo que non fai falta”, dixo, e engadiu que “este autobús arrancou, non vai parar, ten un destino marcado. Non temos ningún problema en paralo para que se suban os que queiran. Se non se queren subir que sigan onde están, quietos e inoperantes”.
“Non se pode traballar nun servizo público por 800€”
De seguido lembrou as demandas do sector. A primeira, que a negociación do convenio colectivo comece dunha vez. Acusou á patronal de “chorar” as únicas veces que sentou na mesa e exiixiu que “os contratos en prácticas rematen tal e como están concibidos”.
López Rei advertiu que “aqueles que pretendan contratar por 800€ teñen os seus días contados. Non imos pasar porque o contrato en prácticas non sexa regulado e dignificado” e denunciou que “non se pode traballar para un servizo público por 800€”.
Xunto a iso demandou a recuperación da terceira paga extra, “para que quede no convenio para sempre”, e a dignificación da profesión. A ese respecto sinalou que a saúde laboral ten que estar tamén sobre a mesa. “Acabouse facer camillas sen camilleiro. Acabouse ir un só levando doentes”, asegurou.
O representante da FGAMT concluíu advertindo que a negociación deste convenio ten que supor o fin das horas de presenza, “que é iso de xornadas interminábeis para poder levar un salario digno a casa”, dixo e alertou de que estas son, para a CIG, “cuestións irrenunciábeis”.
Manifestación en Compostela polo convenio galego do transporte en ambulancia
O xoves día 1 de decembro, con saída ás 11:00 horas, da Praza Roxa
As traballadoras e traballadores do sector de transporte en ambulancias sairán en manifestación ás 11:00 horas da mañá deste xoves día 1 de decembro, desde a Praza Roxa, en Compostela, en demanda da negociación do convenio colectivo. O sector contará, na mobilización, co apoio de representantes dos bombeiros/as comarcais, como parte do grupo de empresas que prestan servizo de emerxencias.
A FGAMT-CIG denuncia que a patronal do sector do transporte de ambulancias paralizou a negociación do convenio logo de varias reunións “onde se dedicou a perder o tempo”. A isto engade que a actitude da patronal contou co coñecemento “e complicidade” da Xunta de Galiza, da consellaría de Sanidade e da Fundación de Emerxencias 061.
A FGAMT asegura que nos últimos concursos do transporte en ambulancia, a Xunta deulle a concesión a empresas que puxaron por debaixo do prezo de custe até o 12% e que agora “queren que os traballadores paguen esa rebaixa do seu lombo”. “Aínda hai empresas onde o persoal fai máis de 50 horas extra ao mes, normalmente sen cobralas; onde non teñen as vacacións regulamentarias, onde o persoal con contrato en prácticas cobra menos de 800€; onde as bases para a permanencia do persoal no reúnen as condicións axeitada e onde, entre outras cuestións, non se desinfectan os uniformes”.
A FGAMT-CIG fai un chamamento ao sector a mobilizarse para defender o seu convenio e pelexar pola súa profesionalización e dignificación. “Non podemos consentir que haxa un lote de traballadores e traballadoras con contrato en prácticas e cun salario rebaixado nun 40%”.
Esta profesionalización entende que pasa tamén por un salario digno, que impida que os traballadores/as teñan que facer horas para poder levar diñeiro suficiente a fin de mes. Por iso a CIG, ademais da suba salarial, reivindica a terceira paga extra, que foi suprimida no anterior convenio.
Xunto a estas cuestións demándase unha mellora da prevención de riscos laborais nas empresas. “Todo o mundo sabe que ao cabo do ano son un montón os compañeiros/as que se lesionan ou enferman por culpa do traballo”.
O sector de ambulancias manifestarase en Compostela o 1 de decembro en demanda da negociación do convenio
Demandan a supresión dos contratos en prácticas ou a mellora das condicións laborais do persoal afectado
Delegados e delegadas do sector de ambulancias da área sanitaria de Santiago concentrábanse esta mañá diante do hospital Clínico para reclamar a negociación do convenio colectivo, cuxa vixencia rematou en 2015 sen que se revisaran, desde aquela, as súas condicións laborais e salariais. Ademais, fixeron un reparto entre usuarios e usuarias do centro hospitalario para que apoien as súas demandas na manifestación que a CIG ten convocada para o vindeiro día 1 de decembro, con saída da Praza Roxa ás 11:00 h.
O de hoxe non foi, en todo caso, o primeiro reparto que se fai. De feito lévanse realizando desde que se convocou a manifestación, así como asembleas de traballadores e difusión de carteis e pancartas.
O convenio colectivo do sector de ambulancias afecta a todos os traballadores do sector tanto do transporte programado como do urxente, arredor de 3.500 traballadores/as en toda Galiza e preto de 300 na comarca de Compostela.
Segundo explicou Mario Rodríguez, delegado da CIG en Casablanca e membro da comisión negociadora do convenio, coa manifestación prevista para o 1 de decembro queren denunciar as condicións que ten o sector e a deixadez da patronal á hora de sentarse a negociar. Unha deixadez que, asegurou “ten uns cómplices necesarios que, neste caso, son a consellaría de Sanidade, o 061 e a Xunta no seu conxunto”.
A este respecto explicou que levan intentando negociar este convenio desde 2015. Porén “a patronal deixou claro que quería unha prórroga dun ano para que non houbera ningún tipo de subida nin avances até como mínimo este ano. Nós dixémoslles que non, pero agora o están conseguindo pola vía práctica ao non sentarse a negociar”.
Traballadores/as en prácticas
Denunciou ademais as condicións salariais nas que está algúns traballadores/as e o exceso de horas que normalmente son extras e que non son pagadas. A isto engadiu a contratación de traballadores en prácticas que “son o caldo de cultivo para precarizar o sector, porque non se están facendo contratacións de vellos traballadores. Só se están contratando traballadores en prácticas que perciben un 40% dun salario normal”.
De feito asegurou que se pode dar o caso de que nunha mesma ambulancia estean traballando dous traballadores e un deles estea cobrando un 40% menos. “Isto cremos que repercute na calidade do servizo e, polo tanto, na calidade da atención das e dos doentes”.
Diante desta situación reclaman “ou ben a supresión deste tipo de contratos ou ben unha normativa que mellore o Real Decreto onde só se establece o 60 e o 75% do salario no primeiro ano e no que non se establece ningún tipo de obrigatoriedade de facelos indefinidos unha vez remate o contrato”.
Con todo, e aínda que responsabilizan ás empresas desta situación, por intentar xustificar unhas condicións inxustificábeis “aducindo que non sacan beneficios pola súa irresponsabilidade ao presentarse con rebaixas temerarias nos concursos por debaixo do custo real”, tamén consideran responsábel á administración –SERGAS, 061 e Xunta- porque “son perfectamente sabedoras tanto das condicións do material das ambulancias, como das condicións de traballo do persoal e nunca se fixo nada para solucionalo”.
A este respecto, Inácio Pavón, representante da FGAMT-CIG de Compostela, explicou que por iso demandan que se dignifique, no seu conxunto, o sector como servizo público que é e que o SERGAS “tome cartas no asunto e obrigue ás empresas a garantir unhas condicións dignas, tanto no económico, xornada e demais condicións laborais; como canto ás condicións materiais de prestación de servizos, de bases, ambulancias, uniformes ou prevención de riscos, entre outros.”
O sector de ambulancias tamén reclama avances en cuestións que considera importantes, como a recuperación da terceira paga, que foi eliminada no anterior convenio e o cumprimento dos protocolos de seguridade e de saúde do traballo que figuran nas plicas dos concursos pero que se están incumprindo.
Casos que relatan as e os traballadores como que, nalgúns casos, en lugar de ir dous traballadores/as na ambulancia, como sería preceptivo, vaia só o condutor e teña que facer tamén de camilleiro. “Isto provoca unha peor calidade no servizo, pero tamén riscos, porque ten habido accidentes de doentes que caen porque só había unha soa persoa para subilos á ambulancia”.
CIG-Saúde denuncia que o recorte de horarios no servizo de helicópteros do 061 limita a súa operatividade para atender urxencias
O helicóptero non estivo dispoñíbel por ter rematado o seu horario, ao longo do verán, para avisos de afogamentos, paradas, accidentes ou o tráxico suceso no rally de Carral
Os helicópteros da Fundación Pública Urxencias Sanitarias 061 teñen recortada, desde o mes de marzo deste ano, a súa operatividade a tan só 12 horas. A CIG-Saúde denuncia que isto está a limitar a súa dispoñibilidade para atender urxencias nas que, se cadra, non se evitaría un fatal desenlace pero para as que si se porían ao alcance todos os medios dispoñíbeis. Segundo persoal do propio 061, o recorte da operatividade a determinadas horas do día vense repetindo ao longo deste verán para avisos de urxencias como paradas cardíacas, afogamentos ou mesmo no recente accidente do rally de Carral.
Rosario Rúa, representante da CIG-Saúde na Xunta de Persoal do 061, lembra que desde o ano 1990 os dous helicópteros sanitarios galegos viñan funcionando todas as horas de luz do día (de Orto a Ocaso). Porén, co novo contrato o período de servizo é de orto +12 horas, ocaso -12 horas. É dicir, o helicóptero con base na provincia da Coruña (Santiago) comeza a funcionar á saída do sol e está operativo 12 horas e o outro, con base na de Ourense, está operativo 12 horas antes do solpor.
Rúa explica que desde o 19 de marzo até o 27 de setembro o orto sitúase ás 8:00 horas, o que implica que o helicóptero de Santiago funciona desde esa hora até ás 20:00 horas (12 horas en total).
A consecuencia deste recorte, afirma, é que “ a primeira hora da mañá toda a zona de Ourense está descuberta e a última hora da tarde é a costa e o eixo atlático os que están descuberto”.
Segundo a representante da CIG-Saúde na Xunta de Persoal do 061 “isto foi o que ocorreu no accidente de Carral. Non houbo helicóptero porque o de Santiago xa rematara o seu horario e o de Ourense está a 35 minutos e, polo tanto, non é operativo”.
O caso de Carral non é o único para o que non houbo helicóptero dispoñíbel, pero si o que tivo un desenlace máis dramático, que “se cadra, neste caso, tería sido o mesmo de dispor deste medio”, especifica. “No decurso do verán houbo avisos doutras urxencias pasadas as 20:00 horas e non houbo helicóptero. A xente non o sabe porque ao final se solucionan con outros recursos máis lentos ou menos adecuados e así tápase esta irresponsabilidade”.
A CIG-Saúde considera grave que se recorte nestes medios que poden ser vitais en certos casos e subliña que o aforro pretendido é “unha miseria”. “Se dixeramos que se aforra unha barbaridade de cartos…, pero non, o certo é que só é o aforro do soldo dun piloto e un copiloto durante seis meses”, matiza Rúa.
A representante da CIG sinala ademais que as chamadas dos avisos quedan todas rexistradas e que hai constancia, polo tanto, de que hai servizos aos que non se pode ir por mor dese novo horario: un afogamento, un accidente de tráfico, unha parada en Ribeira, non sae na prensa… malia ser aínda de día.”
Respecto do dramático accidente de Carral matiza ademais que os propios técnicos das ambulancias din o mesmo, “botamos moito de menos un helicóptero porque estaba colapsado o tráfico”.
Rúa entende que de estar o helicóptero operativo “tería chegado primeiro, pero non se puido”, e por iso reitera que non se pode permitir que se manteñan ou se repitan estes recortes.
A Xunta outorga máis do 50% do concurso de ambulancias a un fondo de capital risco dun exalcalde e exdeputado provincial do PP
O BNG demandará no Parlamento a paralización do concurso e que se analice se a oferta económica garante un servizo de calidade do transporte sanitario urxente en Galiza
O representante da FGAMT-CIG, Xabier Aboi, e a deputada do BNG, Montse Pardo, comparecían este venres en rolda de prensa para denunciar as irregularidades no proceso de adxudicación do Servizo de Transporte Sanitario Terrestre Urxente. Un concurso que está xa en fase de adxudicación e que irá a parar, en máis dun 50%, a Ambuibérica, empresa participada maioritariamente por un fondo capital-risco que ten á fronte a un exalcalde e exdeputado provincial do PP en Valladolid.
Segundo explicaron, a mediados do ano 2014 a Xunta deu a coñecer o borrador para o concurso das ambulancias do 061, que contempla 11 ambulancias de soporte vital avanzado, coñecidas como medicalizadas; 101 ambulancias de soporte vital básico, as clásicas do 061, e outras 2 máis de apoio.
Este borrador estabelecía unha puntuación do 50% para a oferta económica e outro 50% para a oferta técnica e a concesión do servizo por un período de 4 anos, prorrogábel a 6, cun custo máximo de 121 millóns de euros, unha cantidade equivalente a 30,25 millóns de euros anuais.
Tal e como lembrou Xabier Aboi, nese momento a CIG xa advertiu que era “unha barbaridade dar a mesma puntuación á oferta económica que ás ofertas técnicas e asistenciais” entendendo que priorizar o económico sobre o asistencial supón “tratar a saúde como un negocio”.
O concurso foi ademais paralizado durante meses e posteriormente modificado. Así o explicou a deputada nacionalista, Montse Prado, quen sinalou que a adxudicación do anterior estaba prevista para o 15 de abril de 2014 e denunciou que “estamos a finais de xuño e está sen rematar”.
Prado explicou ademais que este concurso ten xerado malestar entre as pequenas empresas galegas do sector, polas condicións que lles solicitaban. “Téñeno cualificado como moi agresivo xa que mentres que se mantén a contía do anterior, porén exixen toda unha serie de melloras técnicas canto a instrumental médico, localización de datos…”
A isto engadiu que esas empresas denunciaban ademais que era moi axustado e que lles estaba resultando moi difícil poder ter os traballadores/as cos salarios que estabelece o convenio, polo que volver convocar o concurso coas mesmas contías económicas ía facer moi difícil afrontar os requirimentos que exixía.
Empresas beneficiadas
E así ocorreu porque, segundo explicou Aboi, coa apertura dos sobres do concurso descubriuse que moitas das empresas que tiveran máis puntuación na oferta técnica perderan na económica, na que se chegaron a presentar propostas con baixas temerarias de case o 7% nalgunha comarca como Compostela. “Isto quere dicir que de 121 millóns que tiña de custo o concerto, as empresas rebaixaron máis de 3 millóns e medio para quedar co concurso”, sinalou.
A consecuencia disto foi que “a maior parte dos empresarios galegos desapareceron ou tiveron que aliarse baixo a ameaza de desaparecer do sector alentados desde a propia patronal polo Presidente da FederaciÓn Galega de Ambulancias, Enrique Blanco, que é, ao mesmo tempo, o enviado da empresa AMBUIBÉRICA”, explicou o representante da FGAMT-CIG.
O resultado final é que neste momento, coas concesións dadas, AMBUIBÉRICA –que tiña unha presenza testemuñal no sector en Galiza- pasa a ter máis do 50% do concerto, contando empresas propiedade dela ou participantes en UTES, quedando para o empresariado galego do sector unicamente as provincias de Ourense e Lugo.
AMBUIBÉRICA
A respecto de AMBUIBÉRICA, Aboi denunciou que é unha sociedade participada maioritariamente por un fondo de investimentos “Proa Capital de Inversiones”, que foi fundada en 2007 e que está dirixida polo exalcalde do PP en Mayorga (Valladolid), Carlos Magdaleno Fernández, que ademais aparece en moitas máis empresas co aínda presidente da patronal galega, Enrique Blanco. “Unha empresa que está en proceso de venda a un grupo francés PAI Partners, vinculado a Banca Paribas –unha das maiores bancas francesas-, por un valor de 300 millóns de euros. Venda que á súa vez está vinculada á conquista de concesións en Catalunya e Galiza”, denunciou.
Lembrou que esta empresa vén precedida de escándalos, conflitos e rescinsións de contrato noutras partes do estado e tanto el como a deputada nacionalista lembraron o caso de Euskadi, onde o deterioro asistencial, o despedimento de técnicos substituídos por alumnado e as rebaixas temerarias nos salarios xa provocaron a apertura dunha comisión de investigación no Parlamento Vasco, na que están declarando sindicatos, traballadores e outros organismos.
Unha situación semellante sinalaron en Aragón, onde se chegaron a producir denuncias de viaxes por valor de case 200.000 euros, mesmo “utilizando os datos de persoas falecidas”, asegurou Aboi. Denuncias que tiveron como consecuencia que lle retirasen a esta empresa o concerto e que agora o tema estea nos xulgados por delito penal. Exemplos similares relataron en Catalunya, onde o asunto está tamén no xulgado, en Castela A Mancha ou en Cantabria.
Consecuencias laborais das baixas temerarias nos concursos
O representante da FGAMT-CIG denunciou que o modelo ao que recorren este tipo de empresas é sempre o mesmo: primeiro rebaixan a oferta económica para facerse co concerto, despois declaran perdas para rebaixar salarios e condicións laborais, ao tempo que negocian coa administración un incremento do montante económico. Entre mentres, prodúcese un importante deterioro da calidade asistencial.
Un modelo que Prado cualificou de “dumping empresarial” e que o representante da CIG denunciou por entender que o PP o “permite”, entregando “recursos públicos a empresas de fóra de Galiza, de capital risco e cunha forte vinculación ao propio PP”, afirmou.
Ante isto, o BNG xa anunciou que demandará no Parlamento de Galiza que se paralice o concurso e que se analice polo miúdo se realmente con esta oferta económica se ofrece e garante un servizo de calidade do transporte sanitario urxente en Galiza.
Os traballadores de Ambulancias do Eume acordan suspender as horas extras en protesta polos atrasos salariais
A empresa, que presta o servizo do 061 en Pontedeume, Ares, Mugardos e Monfero, está en concurso de acredores
A FGAMT-CIG compareceu este martes en rolda de prensa para informar da situación laboral que están a padecer os traballadores de Ambulancias do Eume, que presta o servizo do 061 en Pontedeume, Ares, Mugardos e Monfero. O persoal sufre continuos atrasos no cobro dos salarios e nestes momentos a empresa –que está en concurso voluntario de acredores- ten pendente de pagarlle as nóminas de xullo, agosto, setembro e outubro do pasado ano.
O responsábel de Transportes da CIG, Xesús Pastoriza, acompañado de Francisco Cartelle, explicou que a nefasta xestión do empresario e a acumulación de débedas coa Seguridade Social, Facenda, os traballadores, os provedores e incluso coa UTE na que está integrada, levaron á situación concursal actual.
Porén, dende que o pasado mes de febreiro o administrador nomeado polo Xulgado do Mercantil da Coruña se fixera cargo da xestión de Ambulancias do Eume, os atrasos no pago dos salarios continúan. “E iso que o administrador se comprometeu coa CIG e co delegado de persoal a que o abono das nóminas se ía facer puntualmente”, apunta Pastoriza.
A este respecto engade que, a pesar de que a Fundación 061 ingresou o pasado 18 de abril as cantidades correspondentes aos servizos de marzo, “non foi até hoxe que o administrador ordenou o ingreso dos salarios, curiosamente o día que tiñamos convocada rolda de prensa. Este tipo de atrasos inxustificados non os entendemos”, critica.
Aos atrasos, haille que sumar as catro nóminas que a empresa aínda ten pendentes de pagar, correspondentes aos meses de xuño, xullo, agosto e setembro de 2014. Sobre isto, Xesús Pastoriza indicou que o administrador concursal tamén se comprometeu hai un mes a entregar as certificacións aos traballadores para que poidan acudir ao FOGASA reclamar as cantidades, “pero segue sen facilitalas”.
Medidas de presión
Á vista dos reiterados incumprimentos, os traballadores acordaron unha serie de medidas para facer fronte a unha situación que cualifican de “insostíbel”. En primeiro lugar, vanse persoar no Xulgado do Mercantil 1 da Coruña poder acceder a toda a documentación relativa ao proceso, mais tamén para trasladar as queixas polas actuacións do administrador nomeado. “E non descartamos pedir a súa revogación”, advertiu o representante da CIG.
Doutra banda, os traballadores van suspender a realización de horas extraordinarias. Decisión que comunicarán mediante escrito ás partes implicadas: empresa, 061, UTE e administración concursal. A negativa a traballar por riba da xornada mensual máxima estabelecida (160 horas ordinarias e 50 de presenza) podería supor “que cara a finais de mes a ambulancia quede inoperativa e o servizo de urxencias sanitarias de Pontedeume, Ares, Mugardos e Monfero sen cobertura”.
Neste senso, Pastoriza subliñou que até o de agora o servizo foi atendido á perfección porque “o persoal estivo facendo traballo moi por riba do que lle corresponde. Pero a situación é insostíbel: débenlle salarios, dietas, horas, sofren atrasos nos cobros e mesmo se atopan con problemas para coller as vacacións”.
Para garantir o respecto das condicións dos traballadores e a prestación do servizo de transporte sanitario urxente nesta zona, dende a FGAMT-CIG demándase a intervención inmediata tanto da Fundación 061 como da Administración concursal “e que non continúen permitindo esta situación na empresa”.
A Xunta aplica outro recorte na asistencia sanitaria ao limitar a 12 horas a operatividade dos helicópteros do 061
CIG-Saúde denuncia que o Goberno do PP confunde “a eficiencia na xestión dos recursos públicos coa redución dos mesmos”
A CIG-Saúde alerta que, por primeira vez na historia dos helicópteros sanitarios (encargados de actuar en situacións de emerxencias sanitarias) non estarán activos dende a saída do sol até o ocaso, senón que por mor do novo contrato, pasarán a ter unha operatividade de 12 horas, “o que supón unha perda de operatividade para situacións de emerxencias de 394 horas ao ano”.
A CIG-Saúde lembra que dende o pasado 1 de xullo os helicópteros sanitarios – que até entón estaban xestionados polo 112- pertencen á Fundación Pública Urxencias Sanitarias 061, que acaba de remitir un comunicado ao persoal informando dos novos horarios destes aparatos. A partir de agora, terán recortada as súa operatividade naqueles días nos que o tempo entre a saída do sol e o ocaso é superior a 12 horas.
Dende o 19 de marzo até o 26 de setembro os días duran máis de 12 horas, polo tanto, dende esa data, parte do día non estará cuberto para posíbeis emerxencias en lugares lafastados dos recursos medicalizados terrestres.
Se no ano 2014 a Consellaría xa recortaba este servizo repartindo a operatividade entre o helicóptero en Santiago e o que ten base en Ourense (unha aeronave comezaba a funcionar á saída do sol e estaba operativa 12 horas, mentres que a outra estaba operativa 12 horas antes do solpor), “neste 2015 úneselle outro novo recorte: nunca estará operativo o helicóptero antes das 7:30 e despois das 21:30 horas”.
Como exemplo do que este cambio implica, a CIG-Saúde explica que no caso dun accidente ocorrido na Costa da Morte ás 07:15 horas do mes de xuño non se disporá de ningún helicóptero operativo para enviar socorro, a pesar de ser xa de día. De igual maneira, un accidente de trafico saíndo das praias en Muros ás 20:00 horas ten o helicóptero mais próximo en Ourense.
No mesmo senso, unha emerxencia ocorrida no Barco de Valdeorras ás 08:00 horas ten o helicóptero sanitario a uns 40 minutos de voo, mentres que até agora estaba a 15 minutos. “Agora esquecemos os ‘20 minutos de ouro’”, denuncian, en referencia ao tempo recomendado como máximo para a atención ás emerxencias nas zonas rurais.
“A Xunta anuncia escandalosamente o novo edificio de xestión das emerxencias na Estrada, cun altísimo custe económico, como un gran logro, cando se recorta na atención a esas emerxencias”, critican
A CIG-Saúde considera este novo contrato un recorte na asistencia sanitaria á cidadanía, encadrado dentro da política do Goberno Galego do PP “que confunde a eficiencia na xestión dos recursos públicos coa redución dos mesmos”.
Técnicos de emerxencias sanitarias trasládanlle aos grupos parlamentarios a necesidade dunha ambulancia medicalizada no Salnés
As xuntanzas celebráronse en Santiago no marco da campaña da FGAMT-CIG de Pontevedra para esixir maior cobertura no transporte sanitario público
Técnicos/as de emerxencias sanitarias trasládáronlle hoxe aos catro grupos políticos con representación no Parlamento galego a necesidade de que a comarca do Salnés conte cunha ambulancia medicalizada. As xuntanzas celebráronse hoxe en Santiago de Compostela no marco da campaña da FGAMT-CIG de Pontevedra para esixir maior cobertura no transporte sanitario público.
Os profesionais de emerxencias sanitarias estiveron no Parlamento galego acompañados de Xavier Aboi, responsábel da FGAMT-CIG de Pontevedra, con quen acudiron a entrevistarse con representantes dos grupos parlamentarios do BNG, AGE, PSOE e PP.
As xuntanzas celebráronse a iniciativa da federación de Transporte da central nacionalista, que puxo en marcha unha campaña para reclamar maior cobertura no transporte sanitario nas comarcas de Pontevedra e do Salnés.
Os técnicos/a de emerxencias sanitarios explicaron que está totalmente xustificada a necesidade de que O Salnés conte cunha ambulancia medicalizada, “xa que se cumpren todos os ratios que así o establecen, tanto de poboación (preto de 160.000 habitantes) como de número de concellos e de superficie”. Por este motivo din non entender como é posíbel que a Xunta siga sen dotar a comarca deste vehículo, “máis cando está pendente de adxudicar o servizo do 061”.
Ao mesmo tempo, sinalaron que a ausencia da ambulancia medicalizada provoca que cada vez que se produce unha urxencia vital os sanitarios/as teñen que dirixirse ao Punto de Atención Continuada para recoller o persoal necesario, “polo que se deixa sen cobertura estes centros”.
Tamén denunciaron que a falta dunha ambulancia deste tipo fai necesario que se teñan que levar a cabo transferencias en rota de pacientes (cambialos/as dunha ambulancia a outra en pleno traslado). Os profesionais advirten que este tipo de recursos, que son considerados excepcionais nos protocolos, son cada vez máis habituais.
Diante disto, o BNG comprometeuse cos técnicos/as sanitarios e co representante da FGAMT-CIG de Pontevedra a presentar unha iniciativa no Parlamento reclamando a ambulancia medicalizada para a comarca do Salnés, así como mocións nos distintos concellos afectados.
I feel so free!