Buscar novas
O persoal do 061 discriminado nos procesos do SERGAS porque non puntúan os cursos de prevención de Quirón
O 061 négase a buscar unha solución ou a cambiar o servizo de prevención privado por un público
Nos procesos de selección do SERGAS puntúan os cursos de prevención de riscos laborais. O persoal do 061, como conta cun servizo de prevención alleo, Quirón Prevención, fai con esta entidade os seus cursos. Porén o SERGAS, neses procesos, só puntúa os realizados con entidades públicas, impedindo ao persoal do 061 concorrer en igualdade de condicións respecto do resto de persoal estatutario.
O Decreto 91/2007, do 26 de abril, de integración no réxime estatutario, na súa disposición adicional Quinta establecía que “os procesos de integración non implicarán a novación dos sistemas de prevención polos cales tivesen optado as institucións do ámbito de aplicación deste decreto, mentres manteñan a súa personalidade xurídica propia.” Polo tanto, a Fundación Publica Urxencias Sanitarias de Galicia 061 (F.P.U.S. 061) conta con uns Servizo de Prevención Alleo que actualmente esta contratado con Quirón Prevención.
SERGAS e 061 rexeitan pasar a un servizo de prevención público
En diferente ocasións posteriores á integración da F.P.U.S. 061, os delegados e delegadas da CIG no 061 solicitaron á dirección “abandonar o sistema de prevención e mutualidade de accidentes de traballo privado e integrarnos nos do Servizo Galego de Saúde”. Petición que sempre foi rexeitada pola Dirección do F.P.U.S. 061 e do Servizo Galego de Saúde.
Enmarcados dentro con contrato asinado con Quirón Prevención, e coa fin de cumprir coa obriga da Lei de Prevención de Riscos Laborais de formar aos traballadores e traballadoras, desde o Servizo de Recursos Humanos da F.P.U.S periodicamente ofértanse cursos de prevención de riscos laborais do catálogo de Quirón Prevención.
Porén, o Servizo Galego de Saúde, nos seus procesos de selección e promoción profesional (OPE, Lista de selección temporal, carreira profesional, ... ), só está a valorar os cursos organizados ou impartidos por entidades públicas, “non tendo tal consideración os servizos de prevención alleos. Polo que o Servizo Galego de Saúde non puntúa nos diferentes procesos os cursos de prevención de riscos laborais de Quirón Prevención realizados polos traballadores da F.P.U.S 061”.
Negativa a buscar unha solución
A CIG-Saúde ten abordado coa Dirección do 061 este problema en diferentes ocasión, a última vez no Comité de Seguridade e Saúde de setembro, obtendo, como nas outras ocasións, unha resposta negativa a buscar calquera tipo de solución para que estes cursos puidesen ser baremables polo Servizo Galego de Saúde. “Solicitamos que a F.P.U.S. 061 figurase como organizadora dos cursos ou que validase os diplomas emitidos por Quirón, obtendo a todas as nosas proposta negativas e indicando incluso que si os traballadores do 061 queren puntos que fagan os cursos do Axencia Galega de Coñecemento en Saúde (ACIS)”.
Por iso denuncian a actitude da Dirección do 061 que “discrimina ao traballadores da F.P.U.S 061 fronte o resto do persoal estatutario do Servizo Galego de Saúde” e exixen unha inmediata solución.
Ourense leva sen helicóptero medicalizado desde o 1 de outubro ás 17:00 horas
A zona Sur de Galiza queda sen posibilidade de transporte aéreo urxente
Ás 17:00 horas do pasado sábado, día 1 de outubro, Ourense quedaba sen helicóptero medicalizado. Iso significa que a área sur de Galiza queda sen posibilidade de transporte aéreo urxente medicalizado. Unha situación que a día de hoxe persiste dependendo todo o país dun único helicóptero con sede en Santiago.
Segundo explica a delegada sindical da CIG na Base do 061 de Ourense, Susana Rodríguez, a causa foi a retirada do aparello en cumprimento dos requisitos legais que teñen que cumprir. Un cambio programado que “era totalmente previsible” máis que Eliance, a empresa concesionaria do servizo, non foi quen de predispor e “non teñen outra máquina dispoñíbel”.
Rodríguez sinala que para dar solución á falta de medios aéreos, a FPUSG-061 falou coa empresa As Burgas, concesionaria do servizo de transporte urxente sanitario en Ourense, e desde a ausencia do helicóptero, puxo unha ambulancia medicalizada no seu lugar. Unha decisión que para o secretario nacional da CIG-Saúde, Manuel G. Moreira “é un parche que non resolve o problema xa que non cubre o ámbito de actuación do helicóptero nin garante os tempos de resposta”.
A isto engade que esa ambulancia medicalizada “era xa unha necesidade cando estaba operativo o helicóptero e seguirá a selo cando se recupere o seu servizo, polo que exiximos a recuperación do helicóptero e o mantemento da ambulancia medicalizada”.
Cómpre lembrar que en toda a provincia de Ourense só hai unha ambulancia medicalizada cando é a provincia con maior dispersión e comunicacións máis complicadas fronte a outras que teñen máis ambulancias medicalizadas, que a pesar de todo son insuficientes dada a demanda existente.
O Sur sen cobertura
No mesmo sentido a delegada da CIG lembra que os servizos realizados por H4 (helicóptero de Ourense) en toda a área sur de Galicia, xa que dito helicóptero desprazábase por toda a área Sur da provincia de Pontevedra, Ourense, e sureste de Lugo. Segundo Rodríguez, as zonas máis afectadas son as máis afastadas das capitais de provincia, onde o 061 si conta con unidades de soporte vital avanzado terrestre. “Pobos fronteirizos con Portugal, a montaña ourensá e lucense e zonas interiores da provincia de Pontevedra, ou o Baixo Miño, quedan desprovistas dun servizo de transporte medicalizado rápido co que contaban ata o día 1 de outubro”.
Neste sentido, Moreira considera “evidente” a falta de previsión das autoridades sanitarias ao saber que a vida útil deste helicóptero remataba o 1 de outubro e “non ter tomado medidas, diante da empresa titular da concesión do servizo, para garantir a continuidade con outro helicóptero que cumprira as condicións do concerto”.
A modo de exemplo explica que nestes días tiveron que ir atender un cazador ferido por un xabaril. Unha atención que tería que se ter prestado utilizando como medio o helicóptero e tivo que atenderse con ambulancia, co que iso supón de demora en tempos e en dificultades para o traslado.
Incumprimento dos termos da concesión
Por iso, Susana Rodríguez considera que isto supón un claro incumprimento do contrato no que, segundo os pregos, figura que Eliance ten que ter un helicóptero medicalizado en Ourense os 365 días do ano. Un incumprimento que podería comportar unha multa de até 6.000 € e que nin sequera é a primeira vez que se produce, porque xa ten ocorrido que houbera que cambiar unha peza que por vida útil se sabía que habería que cambiar nese momento e que deixou inutilizado o helicóptero. “Unha circunstancia que a empresa xustificou diante do SERGAS como unha avaría cando non se trataba de tal”.
En todo caso, a delegada da CIG asegura que a dispoñibilidade de helicóptero non é o único incumprimento de Eliance, “xa que a empresa tampouco garante que estean a dispor no aparello medios como parches para desfibrilar ou outro material funxible que sempre levan a mínimos”.
Por iso considera que non sería de recibo que o ano que vén, cando venza o contrato, se lle prorrogue.
Esta situación non sabemos ata cando se vai manter xa que a empresa Eliance di dispoñer dun helicóptero que agora mesmo está avariado e que podería enviar a Ourense, aínda que non explicou cando estará dispoñible.
Persoal do centros de chamadas reclama un convenio que dignifique as súas condicións laborais e salariais
Traballadoras e traballadores dos centros de chamadas de Galiza están secundando este martes a quinta xornada de folga en demanda dun convenio colectivo que dignifique as condicións laborais e salariais no sector. A folga, convocada pola CIG, está rexistrando un seguimento de máis do 50% do persoal. Ademais, con motivo do paro, a central nacionalista realizou concentracións nas cidades da Coruña e Vigo e diante do Centro de Integrado de Emerxencias da Estrada.
Sobre o seguimento da folga, a CIG denuncia os abusivos servizos mínimos decretados pola Xunta de Galiza no 061 -que foron do 100%, impedindo así o dereito fundamental á folga-, e no 112, servizo no que se estabeleceron uns mínimos do 80%. Aínda así, o 20% restante do persoal que si puido secundar o paro, fíxoo na súa totalidade.
Sen avances na negociación
A coordinadora do sector na CIG, Patricia Cordo, lembra que o convenio se está negociando dende hai máis dous anos e medio pero neste tempo foi imposíbel avanzar nun acordo, xa que a patronal apenas se moveu das súas posicións, Neste senso, denuncia a falta de vontade real da patronal para negociar, condenando así o persoal a ter as condicións laborais e salariais conxeladas dende 2019.
Sinala que nun sector caracterizados polas baixas retribucións e as xornadas parciais, e tras catro xornadas de folga, a patronal só ofertou unha suba do 2,5% a conta do convenio dende xaneiro deste ano, o que suporía, como máximo, un incremento de 30 euros ao mes para aquelas traballadoras e traballadoras que teñan xornada completa. Un aumento, advirte, "que non garante sequera o mantemento do poder adquisitivo".
Cordo apunta tamén á precariedade na contratación que se dá neste sector, cunhas elevadas taxas de temporalidade e parcialidade “que sumado aos salarios cativos, que nas categorías nas que se concentra a maior parte do persoal xa foron superados polo SMI, lévannos a uns salarios medios que non superan os 800 euros mensuais”. Unhas remuneracións insuficientes para chegar a fin de mes, máis aínda neste momento de medre insostíbel da carestía da vida.
A isto engádese que as empresas tampouco están compensando os gastos xerados polo teletraballo, que foi imposto ás presas durante a pandemia sen ningún tipo de dereitos e incluso sen proporcionar os medios necesarios para o desenvolvemento do traballo.
A patronal quere recortar dereitos consolidados
Pero ademais, a patronal insiste na súa pretensión de reducir dereitos xa consolidados no convenio, como baixar a tres horas médicas ao mes, eliminar o máximo de 39 horas semanais e poder distribuír as 1764 horas anuais ao seu antollo, facer a distribución de fins de semanas libres en cómputo anual, eliminar o permiso de nacemento, non poder gozar de excedencia en xullo, agosto e o nadal, reducir o complemento de Incapacidade Temporal debido os altos niveis de absentismo, ou incluír como falta moi grave colgar unha chamada.
Fronte a esta proposta de recortes e precariedade, a CIG reclama un convenio colectivo que, dunha vez por todas, dignifique as condicións de traballo e os salarios e que recoñeza a profesionalidade do persoal, rachando con esa idea de que este é un sector de segunda e aínda en construción.
Por iso, as e os representantes da central nacionalista animan a todo o persoal a seguir pelexando e dar unha resposta contundente "porque só a través da mobilización conseguiremos un convenio xusto e un salario digno".
A CIG-Saúde rexeita as propostas do Sergas en recursos humanos para a Atención Primaria
Trátase de medidas excepcionais que non solucionan os problemas estruturais de falta de persoal
A CIG-Saúde trasladou o seu rexeitamento en materia de recursos humanos para a Atención Primaria achegadas polo Sergas na Mesa Sectorial de Sanidade celebrada onte ao tratarse de medidas excepcionais que non solucionan os problemas estruturais de falta de persoal.
Dende a central sindical sosteñen que as medidas presentadas de xeito verbal na Mesa Sectorial teñen como obxectivo actuar sobre as consecuencias da situación de deterioro asistencial que se está a dar neste momento ao non poder garantir as presenzas de profesionais en determinados PAC.
Pero denuncian que estas medidas non forman parte do ámbito de negociación da Mesa Sectorial, senón que son a resposta á actual crise sanitaria, “e a Administración ten que asumir esta situación e tomar as medidas que permite o marco legal para situacións excepcionais, como a que se vive estes días na área sanitaria de Pontevedra-O Salnés, pero que mañá poden darse noutras zonas”, comenta o secretario nacional da CIG-Saúde, Manolo Moreira.
No ámbito de negociación da Mesa Sectorial está o Plan de Ordenación de Recursos Humanos de Atención Primaria, que tería que estar facendo a análise de necesidades e ver as medidas necesarias para darlles resposta
Lembra que no ámbito de negociación da Mesa Sectorial está o Plan de Ordenación de Recursos Humanos de Atención Primaria, que tería que estar facendo a análise de necesidades e ver as medidas necesarias para darlles resposta. “Tamén está adiantarse á situación crecente de déficit de profesionais da enfermaría, e é urxente adaptar as necesidades de profesionais á oferta formativa, algo que non depende do Goberno de Madrid”.
Ao mesmo tempo, advirte que a dificultade para garantir as presenzas de profesionais en determinados PAC está a ter efectos no 061, que se ve obrigado a facer un uso intensivo do transporte sanitario urxente para trasladar doentes desde os seus domicilios aos servizos de urxencias; ao non poder ser valorados/as previamente por profesionais de PAC, estanse trasladando doentes aos servizos de urxencias que, nalgúns casos, poderían ter sido tratados no seus domicilios.
E tamén afecta aos servizos de urxencias, que teñen que ver un volume de pacientes que non deberían chegar ás portas das urxencias hospitalarias nunha situación de normalidade asistencial nos PAC. Pero esta situación non é responsabilidade das profesionais dos PAC nin do conxunto da Atención Primaria.
“En todo caso, as profesionais dos PAC, dos centros de saúde, do 061 e dos servizos de urxencias tamén son vítimas dunha situación que non provocaron e que ten unha clara afectación na calidade asistencial prestada ao conxunto da cidadanía”, indica.
Mellorar as condicións laborais
Por iso dende a CIG-Saúde consideran que as medidas propostas deberían ir na liña de recoñecer a situación de crise sanitaria, estudar as causas que xeran esta situación, avaliando como se chegou aquí e asumir as responsabilidades na xestión, ou na ausencia dela, realizada nos últimos anos.
“A falta de profesionais que queiran traballar na Atención Primaria é evidente, a metade das residentes que remataron a súa formación en Medicina Familiar e Comunitaria nos últimos cinco anos non están a traballar na Atención Primaria; algunhas están nas Urxencias Hospitalarias, outras no 061 e outras noutros ámbitos da sanidade privada ou mutuas”.
As persoas que estudan medicina e fan prácticas nos centros de saúde ven como a súa realidade e deciden facer calquera outra especialidade antes que Medicina Familiar e Comunitaria
E as persoas que estudan medicina e rotan facendo prácticas, no quinto ano, polos centros de saúde, e ven como é a súa realidade no día a día, deciden facer calquera outra especialidade antes que Medicina Familiar e Comunitaria, chegando a deixar desertas prazas de formación MIR ou renunciando a elas no primeiro ano de formación.
“Pero a resposta á situación actual non pode ser que non hai profesionais da Medicina de Familia, temos que preguntarnos cal é a razón para que sexa así e que medidas estruturais tomamos para que deixe de selo. E a razón para que non haxa profesionais é que, ano tras ano, as condicións de traballo na Atención Primaria foron empeorando, e profesionais cunha alta formación ven frustradas as súas expectativas de ter un desempeño profesional minimamente satisfactorio que permita poñer a súa formación e a súa dedicación ao servizo das necesidades dos pacientes de Atención Primaria”.
Neste senso, queren deixar moi claro que ou se melloran esas condicións de traballo -e non é se trata só dunha cuestión retributiva- ou as prazas de formación que incrementemos seguirán a quedar desertas, “porque dos que se forman, os que poden elixir, elixen traballar noutros ámbitos”.
Mais as medidas propostas non van na liña de mellorar as condicións de traballo, “son medidas que penalizan máis a profesionais xa sobrecargados, que están soportando co seu esforzo o peso da sanidade pública, e que ven ameazada a organización das súas quendas de traballo, concentrándoas nas fins de semana, incrementando a mobilidade forzosa ou recortando o seu dereito a ter as vacacións nos períodos xa concedidos, entre outras cousas; é dicir máis recortes de dereitos, como se foran culpábeis da situación”.
Na CIG-Saúde entenden que é responsabilidade da Administración tomar as medidas necesarias para garantir a asistencia sanitaria, nunha situación de crise como esta, que non é puntual, que vai durar no tempo até que se incorporen novos profesionais.
“É obriga da Administración sanitaria facelo; pero temos claro que enfrontar profesionais de distintos ámbitos ou aplicar medidas en contra das persoas traballadoras non vai contribuír a solucionar as causas que xeran os problemas actuais”.
O Morrazo -
Alertan do aumento no tempo de asistencia das emerxencias sanitarias no Morrazo por falta de ambulancias do 061
A CIG considera “imprescindíbel e urxente” reforzar o servizo
A CIG alerta do aumento no tempo de asistencia das emerxencias sanitarias no Morrazo como consecuencia da falta de ambulancias do 061, unha problemática que se agrava durante o verán, tal e como denuncia o persoal sanitario, que incide na “grave situación” que se vive na comarca pola escaseza de vehículos de emerxencias. Diante disto, na central sindical consideran “imprescindíbel e urxente” o reforzo do servizo e acusan o Sergas de ocultar datos sobre a verdadeira realidade da asistencia extrahospitalaria na zona.
Lembran que a comarca conta tan só con tres unidades de Soporte Vital Básico con base en Cangas, Moaña e Bueu. Estas ambulancias poden, cando así o require a gravidade da situación, recoller persoal nos Puntos de Atención Continuada (PAC) ou nos centros de saúde. “A realidade habitual é que estes tres vehículos de emerxencia estean permanentemente ocupados ao longo do ano, sobre todo en horario diúrno, o que provoca a activación de ambulancias con base noutras vilas afastadas”.
É habitual que as tres ambulancias estean permanentemente ocupadas, sobre todo en horario diúrno, o que provoca a activación de vehículos con base noutras vilas afastadas
O persoal do servizo denuncia que xa dende a pandemia, pero máis agora co inicio da tempada de verán, se están a producir de maneira habitual, reiterada e de xeito permanente as seguintes situacións:
• As ambulancias do 061 son enviadas a atender as emerxencias no Morrazo dende os hospitais de Vigo cando o persoal sanitario aínda non rematou de realizar a asistencia e o traslado do anterior paciente. A seguinte asistencia neste tipo de ocasións pode demorarse máis de media hora.
• O tempo de espera dende que se determina que unha persoa precisa atención por parte do persoal do 061 até que finalmente a ambulancia chega ao lugar da asistencia é falseado para reducir as estatísticas. Deste xeito, tan só se está a computar o tempo que tarda a ambulancia en chegar dende que queda operativa tras unha asistencia anterior e non o tempo que transcorre mentres o paciente agarda a que unha ambulancia estea dispoñíbel.
• É altamente frecuente que se mobilicen ambulancias do 061 dende lugares tan afastados como Vigo, Pontevedra ou mesmo Redondela para atender emerxencias no Morrazo. En ocasións de forma simultánea. Isto provoca un grave atraso na atención de emerxencias tempo-dependentes.
• Pese a que é un procedemento normalizado que o persoal dos PAC e dos centros de saúde acudan en taxi a atender urxencias dunha prioridade baixa, é cada vez máis frecuente que ante a falta de ambulancias do 061 o persoal de Atención Primaria acuda en taxi a atender emerxencias de primeiro nivel de gravidade.
• Estanse a empregar cada vez máis ambulancias de fóra da Rede de Transporte Sanitario Público para atender emerxencias sanitarias. Estas ambulancias non contan coa máis mínima supervisión por parte do Sergas sobre o tipo de vehículos, o material que dispoñen, o número de profesionais e a súa titulación. Estas ambulancias non contan en ocasións coa posibilidade de realizar asistencia técnico-sanitaria en ruta e pertencen a empresas privadas que non teñen licitación de concurso público coa Administración. Por este motivo, cobran en función do número de servizos que realizan. Cantos máis servizos e máis rápido mellor, sen atender a calidade na asistencia.
Ocultación de datos
Ante esta grave situación, o 061 e o Sergas néganse a facilitar a información específica solicitada, ao tempo que a súa resposta segue a ser a mesma:
• Que a mobilización de ambulancias dende lugares afastados son situacións puntuais.
• Que asistencia no Morrazo está garantida co envío de ambulancias dende Vigo (pese a estaren se cabe con máis sobrecarga de traballo) ou co envío dun helicóptero dende Santiago.
• Que acudir en taxi a atender unha urxencia vital por falta de ambulancias do 061 é un procedemento habitual e normalizado.
• Que as ambulancias tripuladas por un só condutor, sen asistencia sanitaria durante o traslado, non se empregan para a atención de emerxencias sanitarias.
• Que as ambulancias de fóra da Rede de Transporte Sanitario Público contan co compromiso escrito do empresario/a de cumprir coa lexislación vixente. Por este motivo non é necesario realizar as inspeccións periódicas efectuadas a ambulancias do 061.
• Que os tempos “medios” e número “promedio” de servizos no Morrazo é aceptábel e non é peor que noutros lugares de Galiza (obviando intencionadamente que as emerxencias tamén se producen de forma simultánea).
Por todo isto, dende a CIG consideran “imprescindíbel e urxente” o reforzo no servizo do 061 no Morrazo ás 24 horas do día, durante os 365 días do ano. Así mesmo, acusan aos actuais responsábeis do 061-Sergas de “ocultar deliberadamente datos ao respecto da verdadeira situación da asistencia extrahospitalaria na comarca pese a teren sido solicitados formalmente por rexistro público por esta organización”.
CIG-Saúde denuncia que o recorte de horarios no servizo de helicópteros do 061 limita a súa operatividade para atender urxencias
O helicóptero non estivo dispoñíbel por ter rematado o seu horario, ao longo do verán, para avisos de afogamentos, paradas, accidentes ou o tráxico suceso no rally de Carral
Os helicópteros da Fundación Pública Urxencias Sanitarias 061 teñen recortada, desde o mes de marzo deste ano, a súa operatividade a tan só 12 horas. A CIG-Saúde denuncia que isto está a limitar a súa dispoñibilidade para atender urxencias nas que, se cadra, non se evitaría un fatal desenlace pero para as que si se porían ao alcance todos os medios dispoñíbeis. Segundo persoal do propio 061, o recorte da operatividade a determinadas horas do día vense repetindo ao longo deste verán para avisos de urxencias como paradas cardíacas, afogamentos ou mesmo no recente accidente do rally de Carral.
Rosario Rúa, representante da CIG-Saúde na Xunta de Persoal do 061, lembra que desde o ano 1990 os dous helicópteros sanitarios galegos viñan funcionando todas as horas de luz do día (de Orto a Ocaso). Porén, co novo contrato o período de servizo é de orto +12 horas, ocaso -12 horas. É dicir, o helicóptero con base na provincia da Coruña (Santiago) comeza a funcionar á saída do sol e está operativo 12 horas e o outro, con base na de Ourense, está operativo 12 horas antes do solpor.
Rúa explica que desde o 19 de marzo até o 27 de setembro o orto sitúase ás 8:00 horas, o que implica que o helicóptero de Santiago funciona desde esa hora até ás 20:00 horas (12 horas en total).
A consecuencia deste recorte, afirma, é que “ a primeira hora da mañá toda a zona de Ourense está descuberta e a última hora da tarde é a costa e o eixo atlático os que están descuberto”.
Segundo a representante da CIG-Saúde na Xunta de Persoal do 061 “isto foi o que ocorreu no accidente de Carral. Non houbo helicóptero porque o de Santiago xa rematara o seu horario e o de Ourense está a 35 minutos e, polo tanto, non é operativo”.
O caso de Carral non é o único para o que non houbo helicóptero dispoñíbel, pero si o que tivo un desenlace máis dramático, que “se cadra, neste caso, tería sido o mesmo de dispor deste medio”, especifica. “No decurso do verán houbo avisos doutras urxencias pasadas as 20:00 horas e non houbo helicóptero. A xente non o sabe porque ao final se solucionan con outros recursos máis lentos ou menos adecuados e así tápase esta irresponsabilidade”.
A CIG-Saúde considera grave que se recorte nestes medios que poden ser vitais en certos casos e subliña que o aforro pretendido é “unha miseria”. “Se dixeramos que se aforra unha barbaridade de cartos…, pero non, o certo é que só é o aforro do soldo dun piloto e un copiloto durante seis meses”, matiza Rúa.
A representante da CIG sinala ademais que as chamadas dos avisos quedan todas rexistradas e que hai constancia, polo tanto, de que hai servizos aos que non se pode ir por mor dese novo horario: un afogamento, un accidente de tráfico, unha parada en Ribeira, non sae na prensa… malia ser aínda de día.”
Respecto do dramático accidente de Carral matiza ademais que os propios técnicos das ambulancias din o mesmo, “botamos moito de menos un helicóptero porque estaba colapsado o tráfico”.
Rúa entende que de estar o helicóptero operativo “tería chegado primeiro, pero non se puido”, e por iso reitera que non se pode permitir que se manteñan ou se repitan estes recortes.
A Xunta outorga máis do 50% do concurso de ambulancias a un fondo de capital risco dun exalcalde e exdeputado provincial do PP
O BNG demandará no Parlamento a paralización do concurso e que se analice se a oferta económica garante un servizo de calidade do transporte sanitario urxente en Galiza
O representante da FGAMT-CIG, Xabier Aboi, e a deputada do BNG, Montse Pardo, comparecían este venres en rolda de prensa para denunciar as irregularidades no proceso de adxudicación do Servizo de Transporte Sanitario Terrestre Urxente. Un concurso que está xa en fase de adxudicación e que irá a parar, en máis dun 50%, a Ambuibérica, empresa participada maioritariamente por un fondo capital-risco que ten á fronte a un exalcalde e exdeputado provincial do PP en Valladolid.
Segundo explicaron, a mediados do ano 2014 a Xunta deu a coñecer o borrador para o concurso das ambulancias do 061, que contempla 11 ambulancias de soporte vital avanzado, coñecidas como medicalizadas; 101 ambulancias de soporte vital básico, as clásicas do 061, e outras 2 máis de apoio.
Este borrador estabelecía unha puntuación do 50% para a oferta económica e outro 50% para a oferta técnica e a concesión do servizo por un período de 4 anos, prorrogábel a 6, cun custo máximo de 121 millóns de euros, unha cantidade equivalente a 30,25 millóns de euros anuais.
Tal e como lembrou Xabier Aboi, nese momento a CIG xa advertiu que era “unha barbaridade dar a mesma puntuación á oferta económica que ás ofertas técnicas e asistenciais” entendendo que priorizar o económico sobre o asistencial supón “tratar a saúde como un negocio”.
O concurso foi ademais paralizado durante meses e posteriormente modificado. Así o explicou a deputada nacionalista, Montse Prado, quen sinalou que a adxudicación do anterior estaba prevista para o 15 de abril de 2014 e denunciou que “estamos a finais de xuño e está sen rematar”.
Prado explicou ademais que este concurso ten xerado malestar entre as pequenas empresas galegas do sector, polas condicións que lles solicitaban. “Téñeno cualificado como moi agresivo xa que mentres que se mantén a contía do anterior, porén exixen toda unha serie de melloras técnicas canto a instrumental médico, localización de datos…”
A isto engadiu que esas empresas denunciaban ademais que era moi axustado e que lles estaba resultando moi difícil poder ter os traballadores/as cos salarios que estabelece o convenio, polo que volver convocar o concurso coas mesmas contías económicas ía facer moi difícil afrontar os requirimentos que exixía.
Empresas beneficiadas
E así ocorreu porque, segundo explicou Aboi, coa apertura dos sobres do concurso descubriuse que moitas das empresas que tiveran máis puntuación na oferta técnica perderan na económica, na que se chegaron a presentar propostas con baixas temerarias de case o 7% nalgunha comarca como Compostela. “Isto quere dicir que de 121 millóns que tiña de custo o concerto, as empresas rebaixaron máis de 3 millóns e medio para quedar co concurso”, sinalou.
A consecuencia disto foi que “a maior parte dos empresarios galegos desapareceron ou tiveron que aliarse baixo a ameaza de desaparecer do sector alentados desde a propia patronal polo Presidente da FederaciÓn Galega de Ambulancias, Enrique Blanco, que é, ao mesmo tempo, o enviado da empresa AMBUIBÉRICA”, explicou o representante da FGAMT-CIG.
O resultado final é que neste momento, coas concesións dadas, AMBUIBÉRICA –que tiña unha presenza testemuñal no sector en Galiza- pasa a ter máis do 50% do concerto, contando empresas propiedade dela ou participantes en UTES, quedando para o empresariado galego do sector unicamente as provincias de Ourense e Lugo.
AMBUIBÉRICA
A respecto de AMBUIBÉRICA, Aboi denunciou que é unha sociedade participada maioritariamente por un fondo de investimentos “Proa Capital de Inversiones”, que foi fundada en 2007 e que está dirixida polo exalcalde do PP en Mayorga (Valladolid), Carlos Magdaleno Fernández, que ademais aparece en moitas máis empresas co aínda presidente da patronal galega, Enrique Blanco. “Unha empresa que está en proceso de venda a un grupo francés PAI Partners, vinculado a Banca Paribas –unha das maiores bancas francesas-, por un valor de 300 millóns de euros. Venda que á súa vez está vinculada á conquista de concesións en Catalunya e Galiza”, denunciou.
Lembrou que esta empresa vén precedida de escándalos, conflitos e rescinsións de contrato noutras partes do estado e tanto el como a deputada nacionalista lembraron o caso de Euskadi, onde o deterioro asistencial, o despedimento de técnicos substituídos por alumnado e as rebaixas temerarias nos salarios xa provocaron a apertura dunha comisión de investigación no Parlamento Vasco, na que están declarando sindicatos, traballadores e outros organismos.
Unha situación semellante sinalaron en Aragón, onde se chegaron a producir denuncias de viaxes por valor de case 200.000 euros, mesmo “utilizando os datos de persoas falecidas”, asegurou Aboi. Denuncias que tiveron como consecuencia que lle retirasen a esta empresa o concerto e que agora o tema estea nos xulgados por delito penal. Exemplos similares relataron en Catalunya, onde o asunto está tamén no xulgado, en Castela A Mancha ou en Cantabria.
Consecuencias laborais das baixas temerarias nos concursos
O representante da FGAMT-CIG denunciou que o modelo ao que recorren este tipo de empresas é sempre o mesmo: primeiro rebaixan a oferta económica para facerse co concerto, despois declaran perdas para rebaixar salarios e condicións laborais, ao tempo que negocian coa administración un incremento do montante económico. Entre mentres, prodúcese un importante deterioro da calidade asistencial.
Un modelo que Prado cualificou de “dumping empresarial” e que o representante da CIG denunciou por entender que o PP o “permite”, entregando “recursos públicos a empresas de fóra de Galiza, de capital risco e cunha forte vinculación ao propio PP”, afirmou.
Ante isto, o BNG xa anunciou que demandará no Parlamento de Galiza que se paralice o concurso e que se analice polo miúdo se realmente con esta oferta económica se ofrece e garante un servizo de calidade do transporte sanitario urxente en Galiza.
Os traballadores de Ambulancias do Eume acordan suspender as horas extras en protesta polos atrasos salariais
A empresa, que presta o servizo do 061 en Pontedeume, Ares, Mugardos e Monfero, está en concurso de acredores
A FGAMT-CIG compareceu este martes en rolda de prensa para informar da situación laboral que están a padecer os traballadores de Ambulancias do Eume, que presta o servizo do 061 en Pontedeume, Ares, Mugardos e Monfero. O persoal sufre continuos atrasos no cobro dos salarios e nestes momentos a empresa –que está en concurso voluntario de acredores- ten pendente de pagarlle as nóminas de xullo, agosto, setembro e outubro do pasado ano.
O responsábel de Transportes da CIG, Xesús Pastoriza, acompañado de Francisco Cartelle, explicou que a nefasta xestión do empresario e a acumulación de débedas coa Seguridade Social, Facenda, os traballadores, os provedores e incluso coa UTE na que está integrada, levaron á situación concursal actual.
Porén, dende que o pasado mes de febreiro o administrador nomeado polo Xulgado do Mercantil da Coruña se fixera cargo da xestión de Ambulancias do Eume, os atrasos no pago dos salarios continúan. “E iso que o administrador se comprometeu coa CIG e co delegado de persoal a que o abono das nóminas se ía facer puntualmente”, apunta Pastoriza.
A este respecto engade que, a pesar de que a Fundación 061 ingresou o pasado 18 de abril as cantidades correspondentes aos servizos de marzo, “non foi até hoxe que o administrador ordenou o ingreso dos salarios, curiosamente o día que tiñamos convocada rolda de prensa. Este tipo de atrasos inxustificados non os entendemos”, critica.
Aos atrasos, haille que sumar as catro nóminas que a empresa aínda ten pendentes de pagar, correspondentes aos meses de xuño, xullo, agosto e setembro de 2014. Sobre isto, Xesús Pastoriza indicou que o administrador concursal tamén se comprometeu hai un mes a entregar as certificacións aos traballadores para que poidan acudir ao FOGASA reclamar as cantidades, “pero segue sen facilitalas”.
Medidas de presión
Á vista dos reiterados incumprimentos, os traballadores acordaron unha serie de medidas para facer fronte a unha situación que cualifican de “insostíbel”. En primeiro lugar, vanse persoar no Xulgado do Mercantil 1 da Coruña poder acceder a toda a documentación relativa ao proceso, mais tamén para trasladar as queixas polas actuacións do administrador nomeado. “E non descartamos pedir a súa revogación”, advertiu o representante da CIG.
Doutra banda, os traballadores van suspender a realización de horas extraordinarias. Decisión que comunicarán mediante escrito ás partes implicadas: empresa, 061, UTE e administración concursal. A negativa a traballar por riba da xornada mensual máxima estabelecida (160 horas ordinarias e 50 de presenza) podería supor “que cara a finais de mes a ambulancia quede inoperativa e o servizo de urxencias sanitarias de Pontedeume, Ares, Mugardos e Monfero sen cobertura”.
Neste senso, Pastoriza subliñou que até o de agora o servizo foi atendido á perfección porque “o persoal estivo facendo traballo moi por riba do que lle corresponde. Pero a situación é insostíbel: débenlle salarios, dietas, horas, sofren atrasos nos cobros e mesmo se atopan con problemas para coller as vacacións”.
Para garantir o respecto das condicións dos traballadores e a prestación do servizo de transporte sanitario urxente nesta zona, dende a FGAMT-CIG demándase a intervención inmediata tanto da Fundación 061 como da Administración concursal “e que non continúen permitindo esta situación na empresa”.
A Xunta aplica outro recorte na asistencia sanitaria ao limitar a 12 horas a operatividade dos helicópteros do 061
CIG-Saúde denuncia que o Goberno do PP confunde “a eficiencia na xestión dos recursos públicos coa redución dos mesmos”
A CIG-Saúde alerta que, por primeira vez na historia dos helicópteros sanitarios (encargados de actuar en situacións de emerxencias sanitarias) non estarán activos dende a saída do sol até o ocaso, senón que por mor do novo contrato, pasarán a ter unha operatividade de 12 horas, “o que supón unha perda de operatividade para situacións de emerxencias de 394 horas ao ano”.
A CIG-Saúde lembra que dende o pasado 1 de xullo os helicópteros sanitarios – que até entón estaban xestionados polo 112- pertencen á Fundación Pública Urxencias Sanitarias 061, que acaba de remitir un comunicado ao persoal informando dos novos horarios destes aparatos. A partir de agora, terán recortada as súa operatividade naqueles días nos que o tempo entre a saída do sol e o ocaso é superior a 12 horas.
Dende o 19 de marzo até o 26 de setembro os días duran máis de 12 horas, polo tanto, dende esa data, parte do día non estará cuberto para posíbeis emerxencias en lugares lafastados dos recursos medicalizados terrestres.
Se no ano 2014 a Consellaría xa recortaba este servizo repartindo a operatividade entre o helicóptero en Santiago e o que ten base en Ourense (unha aeronave comezaba a funcionar á saída do sol e estaba operativa 12 horas, mentres que a outra estaba operativa 12 horas antes do solpor), “neste 2015 úneselle outro novo recorte: nunca estará operativo o helicóptero antes das 7:30 e despois das 21:30 horas”.
Como exemplo do que este cambio implica, a CIG-Saúde explica que no caso dun accidente ocorrido na Costa da Morte ás 07:15 horas do mes de xuño non se disporá de ningún helicóptero operativo para enviar socorro, a pesar de ser xa de día. De igual maneira, un accidente de trafico saíndo das praias en Muros ás 20:00 horas ten o helicóptero mais próximo en Ourense.
No mesmo senso, unha emerxencia ocorrida no Barco de Valdeorras ás 08:00 horas ten o helicóptero sanitario a uns 40 minutos de voo, mentres que até agora estaba a 15 minutos. “Agora esquecemos os ‘20 minutos de ouro’”, denuncian, en referencia ao tempo recomendado como máximo para a atención ás emerxencias nas zonas rurais.
“A Xunta anuncia escandalosamente o novo edificio de xestión das emerxencias na Estrada, cun altísimo custe económico, como un gran logro, cando se recorta na atención a esas emerxencias”, critican
A CIG-Saúde considera este novo contrato un recorte na asistencia sanitaria á cidadanía, encadrado dentro da política do Goberno Galego do PP “que confunde a eficiencia na xestión dos recursos públicos coa redución dos mesmos”.
Técnicos de emerxencias sanitarias trasládanlle aos grupos parlamentarios a necesidade dunha ambulancia medicalizada no Salnés
As xuntanzas celebráronse en Santiago no marco da campaña da FGAMT-CIG de Pontevedra para esixir maior cobertura no transporte sanitario público
Técnicos/as de emerxencias sanitarias trasládáronlle hoxe aos catro grupos políticos con representación no Parlamento galego a necesidade de que a comarca do Salnés conte cunha ambulancia medicalizada. As xuntanzas celebráronse hoxe en Santiago de Compostela no marco da campaña da FGAMT-CIG de Pontevedra para esixir maior cobertura no transporte sanitario público.
Os profesionais de emerxencias sanitarias estiveron no Parlamento galego acompañados de Xavier Aboi, responsábel da FGAMT-CIG de Pontevedra, con quen acudiron a entrevistarse con representantes dos grupos parlamentarios do BNG, AGE, PSOE e PP.
As xuntanzas celebráronse a iniciativa da federación de Transporte da central nacionalista, que puxo en marcha unha campaña para reclamar maior cobertura no transporte sanitario nas comarcas de Pontevedra e do Salnés.
Os técnicos/a de emerxencias sanitarios explicaron que está totalmente xustificada a necesidade de que O Salnés conte cunha ambulancia medicalizada, “xa que se cumpren todos os ratios que así o establecen, tanto de poboación (preto de 160.000 habitantes) como de número de concellos e de superficie”. Por este motivo din non entender como é posíbel que a Xunta siga sen dotar a comarca deste vehículo, “máis cando está pendente de adxudicar o servizo do 061”.
Ao mesmo tempo, sinalaron que a ausencia da ambulancia medicalizada provoca que cada vez que se produce unha urxencia vital os sanitarios/as teñen que dirixirse ao Punto de Atención Continuada para recoller o persoal necesario, “polo que se deixa sen cobertura estes centros”.
Tamén denunciaron que a falta dunha ambulancia deste tipo fai necesario que se teñan que levar a cabo transferencias en rota de pacientes (cambialos/as dunha ambulancia a outra en pleno traslado). Os profesionais advirten que este tipo de recursos, que son considerados excepcionais nos protocolos, son cada vez máis habituais.
Diante disto, o BNG comprometeuse cos técnicos/as sanitarios e co representante da FGAMT-CIG de Pontevedra a presentar unha iniciativa no Parlamento reclamando a ambulancia medicalizada para a comarca do Salnés, así como mocións nos distintos concellos afectados.
I feel so free!