Buscar novas
A CIG-Saúde denuncia o incumprimento, unha vez mais, do contrato de servizo de transporte sanitario aéreo do 061
O helicóptero con base en Santiago estará inoperativo do 15 ao 19 de abril
A CIG-Saúde vén de denunciar que o helicóptero medicalizado con base en Santiago H3 está inoperante dende onte luns 15 de abril, ás 13:00 horas, e que non se agarda que volva estar operativo até o venres día 19 deste mes. Aínda que os pregos do servizo establecen que a empresa adxudicataria debe dispor dun aparello de substitución, ELIANCE HELICOPTER GLOBAL SERVICES, S.L. non vai cumprir está cláusula dos pregos.
A CIG-Saúde sinala, ademais, que está inoperatividade non está causada por un imprevisto senón que se trata dunha intervención programa para a instalación dunha caixa de comunicación que os pregos establecen como obrigatoria.
Esta situación dáse no marco temporal de cambio de contrato do servizo de transporte sanitario urxente aéreo da FPUSG-061. O novo contrato foi formalizado o pasado 18 de marzo 2024, despois de que a primeira licitación quedará deserta e se volvera a licitar o mesmo servizo por 3 millóns mais de euros.
O aparello en cuestión chegou á base de Santiago en febreiro coa intención de quedar xa para prestar servizo co novo contrato, pero estivo inoperante debido a que non había espazo suficiente no asento do persoal médico. Ademais desta deficiencia, o aparello presentaba outras que quedaron pendentes de arranxar, unha delas a instalación de unha caixa de comunicacións.
Ademais do propio incumprimento do contrato, esta circunstancia supón un prexuízo para os usuarios e usuarias do Servizo Galego de Saúde que quedarán privados deste medio de atención ás emerxencias durante 4 días.
Agardase que o mesmo ocorra co helicóptero con base en Ourense en próximas datas.
A CIG denuncia que Lucus Logística aínda non abonou a nómina de marzo ao seu persoal
A CIG denuncia que a empresa Lucus Logística SL, que se encarga da xestión das bases de ambulancias do servizo de transporte urxente do 061 das localidades de Navia de Suarna, Palas de Rei, Guitiriz, Sarria, Becerreá e Pedrafita do Cebreiro non lles abonou aínda aos seus 50 traballadores e traballadoras a nómina do mes de marzo.
Para o secretario da FGAMT-CIG de Lugo-A Mariña, Christian López, esta noticia resulta preocupante polo incumprimento contractual e polas derivacións e implicacións "que poidan ter as persoas representantes desta empresa" no actual proceso de adxudicación do servizo do transporte sanitario urxente.
Por iso, a CIG insta a que se garanta o pago dos salarios periodica e puntualmente, e que se cumpra co recollido no convenio sectorial. E de igual xeito, insta a Xunta de Galiza para que se interese no seguimento desta situación de precariedade na prestación do servizo "que pode repercutir na calidade do servizo que deben recibir as persoas usuarias do SERGAS"
O persoal do 061 e do servizo de ambulancias non urxente de Vigo denuncia atrasos nas nóminas
A representación sindical comunicaralle á Xunta a situación da empresa e reclamará a xestión directa por parte da Consellaría
O persoal da empresa Ambulancias do Atlántico, actual concesionaria do 061 en Vigo, Cangas e Moaña e que tamén presta o servizo de transporte sanitario dos hospitais para toda a área sanitaria de Vigo, denunciou este venres perante a Inspección de Traballo que leva un ano enteiro acumulando atrasos no abono dos seus salarios.
A situación vén de complicarse máis despois de que o persoal sanitario afectado (250 traballadores/as) cobrase a paga extra de marzo unha semana máis tarde do establecido e sobre todo porque na actualidade aínda non cobraron a mensualidade de marzo, incumpríndose así o acordo coa empresa que obriga a facelo antes do último día de cada mes.
Neste contexto, o empresario catalán Carlos Simón García atópase desaparecido e en paradeiro descoñecido. "Non se presenta na empresa, non contesta os requirimentos da representación do persoal, non atende os correos nin as chamadas e non comparece nas reunións de xestión".
Froito desta situación, a recentemente designada directora de recursos humanos abandonou a empresa sen se presentar ao traballo dun día para outro, e o director da compañía está de baixa médica. Por estes motivos, o propio persoal traballador que aínda non cobrou é o encargado de xestionar integramente o funcionamento da empresa.
A representación sindical de CIG, CCOO e USO foi atendida pola inspectora de Traballo que levará o caso, que dada a urxencia e gravidade da situación comprometeuse a intentar localizar ao empresario para esixir a súa comparecencia urxente.
Problemas económicos
Pese a que o 061 ven de incrementar en máis de 800.000 euros anuais o importe da licitación a Ambulancias do Atlántico e que esta mesma empresa conta tamén coa concesión dos hospitais de Vigo, a adxudicación do servizo sanitario da Volta Ciclista a España, o Centro Penitenciario da Lama, o seguro de saúde Adeslas e o hospital Rivera Povisa, os atrasos nos pagos ao seu persoal sanitario e aos provedores son continuos.
A difícil situación económica que semella atravesar a empresa vai en aumento, xa que esta mesma semana as tarxetas de pago que se empregan para a repostaxe das ambulancias deixaron de funcionar e tan só se pode acudir á gasolineira de Repsol da Avenida de Madrid por un suposto compromiso de Carlos Simón de pagar nun futuro o que se vai acumulando.
Ademais dos problemas económicos a empresa suma denuncias na Inspección, e mesmo vén de ser sancionada pola utilización de ambulancias asignadas a un contrato coa Administración pública na realización de servizos privados. O último incumprimento do que se ten constancia é o de entregar documentación con información falsa para o concurso do actual servizo do 061.
Xestión directa da Consellaría
Hoxe mesmo a representación sindical de CIG, CCOO e USO comunicaralle oficialmente a situación da empresa tanto ao Sergas como ao 061. No escrito solicitarán formalmente que se execute o aval depositado polo empresario Carlos Simón nos contratos que ten coa Administración para que o servizo pase a ser asumido directamente pola Xunta de Galiza e que sexa a Consellaría de Sanidade a que abone os salarios ao persoal sanitario que continúa sen cobrar.
A Xunta saca a concurso o servizo de ambulancias urxente e a metade dos lotes quedan desertos por estar infradotados economicamente
CIG, CCOO, UGT e USO non descartan mobilizacións polas consecuencias laborais e sociais
A Xunta sacou a concurso, o pasado mes de decembro, a concesión do servizo de transporte sanitario urxente do 061 (ambulancias). A baixa dotación económica, que impide o cumprimento do convenio colectivo e a prestación do servizo en condicións axeitadas, provocou que dos 13 lotes que se licitaban, 5 quedaran desertos ao non se presentar nin unha soa oferta. Por iso esta mañá CIG, CCOO, UGT e USO compareceron en rolda de prensa para denunciar a gravidade da situación e advertir que, de non se resolver, o sector iniciará mobilizacións.
Tal e como explicou o responsábel do sector de Transporte da FGAMT-CIG, Xesús M. Pastoriza, a situación é tanto máis grave canto que eses cinco lotes se corresponden con toda a provincia de Pontevedra e a comarca da Coruña, precisamente as zonas máis poboadas de Galiza. E isto ocorreu co transporte sanitario urxente, porque segundo apuntou, o non urxente aínda non saíu a concurso.
Para Pastoriza a responsabilidade é do PP e da Xunta de Galiza, que no verán de 2023 anunciaron publicamente que “sacarían un extraordinario concurso con moitos recursos” á altura de setembro ou outubro pero “estamos en febreiro de 2024 e a metade do urxente quedou deserto”.
Por iso considerou que “é moi evidente que toda esa marabilla que ía traer a Xunta de Galiza non se concretou en ningunha realidade”. Lembrou que desde o sector xa se viña denunciando que os anteriores contratos estaban infradotados economicamente e agora “os novos contratos igual”.
Nese sentido indicou que “hai unha pequena suba” pero “claramente insuficiente” e denunciou o “secretismo” da Xunta, que non deu nin unha soa explicación ao respecto.
Cumprimento do convenio
Para as organizacións sindicais é especialmente preocupante esta situación, xa que unha parte moi importante da negociación colectiva está vinculada á licitación pública. Isto é, para que se poidan aplicar os incrementos salariais e de melloras de condicións laborais pactadas no V Convenio do sector de ambulancias, o concurso ten que estar suficientemente dotado e contar cos recursos económicos necesarios para cumprilo. Ademais, ao non se asinar en tempo os novos contratos, queda no aire o pagamento das cantidades que se deberían de abonar xa entre abril e xuño deste ano.
Canto ás condicións laborais outra das denuncias que viñan facendo, e que persiste, é o exceso de carga de traballo. A este respecto Pastoriza denunciou que nos pregos, o 061 volveu incluír ambulancias cun só técnico-condutor/a. Un déficit de persoal que ten consecuencias porque ao non poder mobilizar ás e os doentes, ten que chamar a outra ambulancia que non pode, así, atender outra emerxencia. E isto ocorre cando “as ambulancias cada vez traballan máis”.
Xunto a isto denunciaron que, precisamente por ese exceso de carga de traballo, este é o sector que acumula máis baixas laborais relacionadas con problemas músculo-esqueléticos.
Alén da falta de persoal denunciaron tamén a falta de ambulancias para poder garantir o servizo e afirmaron que, por exemplo, na área de Vigo operan tamén as ambulancias do Baixo Miño e na área da Coruña as de Carballo, ao igual que ocorre noutras áreas “tapando un furado con outro”, denunciou o representante da CIG.
A conclusión para os representantes sindicais é que, para garantir a calidade do servizo de ambulancias do 061 en Galiza, sería preciso incrementar a dotación económica dos concursos por riba do 20%, fronte a incrementos como os contemplados nos pregos para áreas como a de Santiago, que “foi do 1,8%, que non é nin o IPC”. Só así consideran que se podería dotar de máis e mellores medios e garantir condicións laborais dignas para o persoal.
Cinco dos principais contratos de ambulancias do 061 poden quedar desertos
As centrais sindicais trasladan a súa preocupación ante a posibilidade de que cinco contratos do 061, precisamente os que atenden algunhas das zonas máis poboadas do país, queden desertos debido á falta de dotación económica suficiente para cubrir os custes reais.
O pasado venres rematou o prazo para presentar as ofertas aos novos concursos do transporte sanitario urxente (061), mais catro das actuais xestoras non concorreron: Ambulancias de Pontevedra (que cubre as áreas de Pontevedra e O Salnés), Ambulancias do Atlántico (que dá servizo a Vigo), Ambuibérica (que atende o Baixo Miño) e SASU (que opera na Coruña).
Que as actuais empresas adxudicatarias non presenten ofertas é un feito inusual no funcionamento deste sector e evidencia algo que as organizacións sindicais levan anos denunciando, que os contratos están economicamente infradotados. Ademais, alertan CIG, UGT, CCOO e USO, que as adxudicatarias que prestan agora o servizo non queiran concursar debido á dotación insuficiente supón un risco xa que, de non presentarse outras empresas, os contratos poden quedar desertos.
Resulta incríbel que a Xunta de Galiza siga apostando por un transporte sanitario precarizado e unha prestación deficiente deste servizo público básico, a pesar das reiteradas queixas trasladadas nestes últimos anos tanto por parte do persoal, como polas propias persoas usuarias. Resulta obvio que plan tan magnífico anunciado polo Goberno galego para o transporte sanitario non é certo, pois non hai ningunha mellora no servizo de ambulancias.
Doutra banda, as centrais sindicais denuncian que a Xunta segue sen publicar os novos contratos do transporte non urxente, malia que se comprometeu co sector a sacalos entre os meses de setembro e outubro. Porén, ás portas de febreiro e cun goberno en funcións, nada se sabe das licitacións. Isto está ocasionando inquietude entre as traballadoras e traballadores xa que unha parte do incremento económico pactado no convenio colectivo aplicarase a partir da entrada en vigor das novas adxudicacións.
Neste contexto, e ante a falta de respostas por parte da Consellaría, a representación social non descarta iniciar mobilizacións no sector se nos vindeiros días seguen sen darse solucións concretas a estes problemas.
Persoal de Povisa iniciará unha folga de fame indefinida contra o despedimento de 13 compañeiros/as
A asemblea de traballadores/as apostou hoxe por convocar un calendario de mobilizacións
Membros do comité de empresa do hospital Povisa de Vigo acompañarán a un dos traballadores despedidos na folga de fame indefinida que ten previsto iniciar o vindeiro 16 de marzo, un día despois de que se faga efectiva a rescisión de 13 contratos que vén de anunciar a dirección. Os empregados/as do centro médico apostaron hoxe en asemblea por iniciar un calendario de mobilizacións que tivo a súa primeira cita nada máis rematar a xuntanza, cunha concentración na entrada do servizo de Urxencias.
(Galería de imaxes da asemblea e da mobilización posterior)
O persoal do hospital vigués abarrotou o salón de actos onde tivo lugar a asemblea na que se abordaron os 13 despidos (10 celadores/as e 3 traballadores/as de arquivo) que vén de comunicar a dirección e a convocatoria de distintas mobilizacións para rexeitar “as chantaxes e as coaccións” que está a facer a empresa para lograr “un convenio colectivo favorábel que diferencia entre os traballadores/as fixos/as e os eventuais”, segundo denuncian dende o comité.
A representación dos empregados/as informou que un dos celadores/as despedidos amosouse disposto a iniciar unha folga de fame indefinida, que será secundada nun primeiro momento por tres membros do comité, dous da CIG -incluída a presidenta, María Xesús Neira- e un do SGPS. “Aínda que varios membros das seccións sindicais da UGT e da CGT tamén amosaron a súa disposición a participar nunha protesta que sería indefinida e que daría comezo o 16 de marzo, ao día seguinte de que se faga efectiva a rescisión dos contratos”, indican.
Durante a asemblea tamén se puxo enriba da mesa un calendario de mobilizacións que inclúe unha mobilización no interior da policlínica da Gran Vía este mércores ás 15.30 horas; unha protesta no andar baixo de Povisa o xoves de 10.00 a 11.30 horas; e unha concentración diante da delegación da Xunta na cidade o venres de 10.00 a 12.00 horas. Ademais, convocarán unha manifestación o venres día 13 que partirá da Praza dos Cabalos ás 20.00 horas e rematará na Porta do Sol.
De xeito paralelo, o comité de empresa manterá xuntanzas coa Xunta de Persoal do Chuvi para informarse do número de celadores/as existentes noutros centros médicos e coa representación dos traballadores/as do 061 “para que non axuden a meter as padiolas cos enfermos/as cando chegan a Urxencias”. Tamén acordaron enviar cartas explicando o conflito laboral e a situación interna de Povisa a pacientes e usuarios/as, aos traballadores/as do centro médico e ás distintas canles de televisión de ámbito estatal.
Nada máis rematar a asemblea, que se prolongou de 15.15 a 15.45 horas, os empregados/as concentráronse ás portas do servizo de Urxencia, onde despregaron unha faixa “en defensa dos postos de traballo” e berraron consignas contra a dirección do centro médico e a Xunta.
A CIG reclamaralle a Sanidade que recupere o servizo de ambulancias as 24 horas en Marín
Representantes da central e dos traballadores/as manterán unha xuntanza con responsábeis da Xunta en Santiago este xoves
A FGAMT-CIG reclamaralle aos responsábeis da Consellería de Sanidade que recupere o servizo de ambulancias as 24 horas en Marín “porque os recortes aplicados polo PP nesta materia dende 2011 están a prexudicar tanto a esta localidade como a toda a comarca de Pontevedra”. Representantes da central manterán unha xuntanza con responsábeis da Xunta en Santiago este xoves para abordar esta problemática.
Dende a FGAMT-CIG de Pontevedra explican que despois das repetidas solicitudes de reunión coa xunta de portavoces do Concello de Marín (PP, BNG, PSOE e Mar-In), a alcadesa accedeu a convocala, “polo que poidemos trasladarlle as nosas reivindicacións”.
Entre elas figuraba unha petición de entrevista cos responsábeis da Consellería de Sanidade que finalmente tará lugar en Santiago este xoves ás 13.30 horas e na que participarán os dintintos grupos políticos.
Segundo explica o responsábel da FGAMT Xavier Aboi, á cita acudirán tamén os representantes dos traballadores/as das empresas de ambulancias “para reclamar a restauración do servizo de ambulancias as 24 horas en Marín, porque os recortes aplicados polo PP están a prexudicar tanto a esta localidade como ao resto da comarca de Pontevedra, porque os vehículos teñen que repartirse para cubrir todo o territorio”.
“Non hai que esquecer que prestan servizo en lugares tan dispares como Cercedo, A Lama ou Arcade”, indica Aboi, ao tempo que incide en que non se trata dunha cuestión económica senón que é unha decisión política. Deste xeito, aproveitarán a xuntanza para trasladarlle estas reivindicacións ao secretario xeral de Sanidade e ao director do 061.
Situación de desprotección en Vilagarcía
Por outra banda, a FGAMT-CIG de Pontevedra reclama tamén unha xuntanza cos responsábeis municipais de Vilagarcía de Arousa para abordar a problemática derivada dos recortes no servizo de ambulancias do municipio.
Dende a central nacionalista lembran que no mes de decembro cursaron de forma conxunta cos traballadores/as do sector unha solicitude de entrevista por Rexistro “e aínda non nos convocaron para abordar o tema, nin a nós nin aos grupos políticos”.
O obxectivo da xuntanza é trasladar a preocupación dos traballadores/as de ambulancias “ante a situación de desprotección derivada de que a única ambulancia existente ten que cubrir dende Catoira até A Illa, ademais de Vilagarcía, que conta cun porto de interés xeral”.
A CIG insta a Xunta a cooperar na loita internacional para frear en orixe a epidemia do virus do ébola
A federación de Saúde critica a actitude triunfalista das Administracións e denuncia que os profesionais galegos/as non están preparados/as para afrontar a enfermidade
A federación de Saúde da CIG esíxelle ao Goberno galego que modifique radicalmente a súa actitude “triunfalista e frívola” diante da crise do ébola e pase a ser un elemento activo para a resolución do problema “cooperando na loita internacional para frear a epidemia en orixe”. Dende a central nacionalista denuncian que os profesionais sanitarios/as galegos/as non contan aínda coa preparación suficiente para enfrontar a enfermidade.
Responsábeis da CIG-Saúde, coa secretaria nacional, María Xosé Abuín á cabeza, compareceron hoxe en rolda de prensa no hospital Meixoeiro de Vigo -centro de referencia en Galiza para o ébola- para instar á Consellería de Sanidade a “liderar o imprescindíbel movemento para que Galiza contribúa activamente ao esforzo internacional de cooperación para parar a epidemia de ébola en África Occidental”.
Dende a central nacionalista lembran que dende que o primeiro cidadán español que enfermou de ébola fose repatriado a Madrid hai tres meses “a actitude dos responsábeis políticos e sanitarios dos Gobernos estatal e galego ten sido frívola, triunfalista e perigosa para a poboación e para os profesionais de saúde”.
Ao mesmo tempo, lamentan que a teima dos responsábeis políticos en manter a falacia de que “estabamos e estamos perfectamente preparados/as contra o ébola é a principal causa de que os profesionais de saúde aínda non esteamos ben preparados/as para enfrontarnos á enfermidade en condicións seguras para os pacientes e para nós”.
En concreto, citan as carencias dos Equipamentos de Protección Individual (EPIs) dos que dispoñen na actualidade, “así como no noso adestramento no seu uso”. Así, esixen formación práctica impartida por persoal cualificado e previamente formado (equipo multidisciplinar), contando coa experiencia de ONG como Médicos Sen Fronteiras, Médicos do Mundo, Cruz Vermella, etc., sobre:
-Colocación e retirada de EPIs.
-Simulacros de todo o proceso dende a chegada dun posible caso, tanto en primaria como en especializada, até o ingreso no Meixoeiro.
-Formación práctica con simulacros específica para as traballadoras/es da unidade de illamento do Meixoeiro. Esta formación será considerada a todos os efectos como xornada efectiva e deberá incluír o persoal de limpeza.
-Centros sanitarios privados. Esixir a mesma información e formación que nos centros públicos.
Tamén demandan dispoñer o máis axiña posíbel dos EPIs adecuados e recibir o adestramento preciso para usalos, así como que os espazos onde se prevea que poida ser atendido ou teña que agardar polo seu traslado un posible caso de ébola reúna as condicións axeitadas que permitan que os traballadores/as poidan desenvolverse con seguridade. “Reclamamos a compra centralizada dos equipos de protección individual, que reúnan as condicións que esixen os criterios científicos e que estean a disposición de todos/as as traballadores/as en tallas e número suficientes.
Transparencia informativa
Por outra banda, esixen das autoridades sanitarias que actúen con transparencia informativa, “abandonando a política de mentiras e de agachar a realidade que até agora viñeron aplicando”. Neste senso, reclaman unha campaña de información á cidadanía sobre:
-Como actuar e onde dirixirse no caso de sospeita por vir dun país de risco ou contacto cun posible caso, promovendo que estes pacientes se poñan en contacto directamente co 061.
-A necesidade de comunicar na recepción de pacientes de calquera centro sanitario se veñen de realizar unha viaxe a algún dos países afectados, poñendo carteis en todos os centros sanitarios co lema “Comuniquen na recepción de pacientes se veñen dalgunha viaxe“.
Finalmente, a CIG-Saúde esíxelle á Xunta que pule e lidere o imprescindíbel movemento para que Galiza contribúa activamente ao esforzo internacional de cooperación para parar a epidemia de ébola de África Occidental e evitar así que se poida estender a outras partes do mundo.
“A Consellería de Sanidade debe abandonar a pasividade e tomar iniciativas como poñerse en contacto coas organizacións de cooperación que teñen experiencia en encadrar persoal de saúde na loita contra o ébola (Médicos Sen Fronteiras, Médicos do Mundo, Cruz Vermella, etc.) para ofrecerlles axuda material; facer unha campaña activa entre os profesionais de saúde galegos/as promovendo a cooperación e o seu encadramento nesas organizacións con vistas ao seu desprazamento a África Occidental; facilitar que os profesionais que estean dispostos a desprazarse poidan facelo, manténdolles o salario que na actualidade perciben se traballan na sanidade pública galega ou contratándoos con ese obxecto se están no paro; e tomar a iniciativa diante do Ministerio e do Consello Interterritorial para que esas medidas se desenvolvan tamén noutras comunidades do Estado”, rematan.
“A única formación do persoal de ambulancias para afrontar un caso de ébola é un folleto con evidentes contradicións”
As organizacións sindicais reclaman do 061 e das empresas información, equipos de protección e formación práctica adecuada
As organizacións sindicais CIG, CCOO e UGT denunciaron este luns a falta de información e formación práctica entre os traballadores e traballadoras do transporte sanitario urxente de Galiza para poder afrontar a un posíbel caso de ébola en condicións de seguridade.
Representantes das tres centrais sindicais compareceron en rolda de prensa para reclamar da Fundación 061, do SERGAS e das empresas de ambulancias que dean protección eficaz e acheguen o adestramento necesario os/as traballadores/as para garantir a súa seguridade á hora de atender un posíbel caso de infección por ébola.
Até agora, explicaron, a única información que recibiron os/as técnicos das ambulancias sobre como manexar un caso deste tipo, foi un protocolo distribuído a través do correo electrónico, que máis parece “un panfleto” e “que mesmo ten contradicións entre a descrición do texto e a descrición gráfica no referido á retirada dos equipos de protección”.
“Parécenos un insulto aos/as traballadores/as, porque non se contemplan os riscos que corren. A administración non lle parece preocupar a seguridade deste persoal”, censuraron na comparecencia, ao tempo que lanzaron un chamado ao director da Fundación 061 para que explique ao colectivo todos os detalles do dispositivo.
Ernesto López Rei, da FGAMT-CIG, denunciou a improvisación da administración sanitaria e instou ao persoal a que –de activarse o protocolo- se negue a realizar os traslados mentres non reciban os equipos e a formación práctica adecuada. Unha formación, reiterou, que ten que ser impartida por persoal especializado na materia.
A este respecto, apuntaron que, segundo o recollido no folleto, tan só o persoal das ambulancias medicalizadas recibirá formación para atender posíbeis casos de ébola. Dende as organizacións sindicais, dada a configuración da rede de transporte sanitario urxente e as características das bases no noso país, deféndese a necesidade de formar axeitadamente ao conxunto dos traballadores e traballadoras deste servizo para minimizar os riscos.
Nesta liña tamén criticaron que non estea previsto dotar cos traxes de protección os/as condutores das ambulancias, xa que a administración entende que non van entrar en contacto cos/as doentes infectados/as. Unha afirmación que dende a representación sindical poñen en cuestión.
As organizacións sindicais tampouco descartan levar esta ausencia de formación á Fiscalía, polo risco que supón para os traballadores e as traballadoras das ambulancias.
O SERGAS limítase a colgar un protocolo na súa Intranet para informar ao persoal sobre como actuar fronte ao ébola
A CIG-Saúde denuncia que practicamente en ningún caso se fixeron simulacros prácticos de cómo pór e quitar un traxe, nin sequera no centro de referencia, o Meixoeiro
A CIG-Saúde denuncia que existe unha total falta de formación e adestramento do persoal no que se refire a todo o relacionado co virus do Ébola. “A percepción do persoal é que o único que fixo a Consellería ao respecto foi colgar os protocolos na intranet do SERGAS e cando algún persoal se interesa pola cuestión, remiten a estes protocolos”, afirman. A isto engade que “sabemos que o papel o aguanta todo, mais por colgar un protocolo na intranet non significa que o persoal estea xa formado. Precísase adestramento ademais de palabras escritas nun papel”.
A CIG-Saúde exlica que practicamente en ningún caso se fixeron simulacros prácticos de cousas tan evidentes como poñer ou sacar o traxe de protección e que o persoal do 061 conseguiu que se lles ofrecera unha xornada técnica “porque presionaron á dirección con non atender estes casos se non se lles formaba ao respecto”. Unha xornada que, en todo caso, aínda non foi impartida.
Sinala que se están facendo pequenas charlas sobre o Ébola nalgúns centros, pero asegura que mesmo entre a charla dun centro e a doutro, “existen informacións contraditorias”.
Denuncia que cando se supón que o Meixoeiro é o centro de referencia en Galiza para casos de Ébola, o persoal deste centro “non foi formado ou adestrado con xornadas prácticas”, e que cando o requiriron, “envióuselles un vídeo sobre cómo colocar o traxe de protección”.
A este respecto, matiza, moitos expertos coinciden en que a operación de poñer e quitar o traxe require de, cando menos, 2 semanas de adestramento por profesionais cualificados/as nun centro adecuado, algo moi lonxe do que está a acontecer. A isto engade que, ademais, tamén está recomendado que no momento da retirada do traxe haxa dúas persoas con adestramento suficiente, unha axudando nesta tarefa e a outra supervisando e comprobando que se está a facer correctamente.
Asegura que no resto dos centros da rede SERGAS, nomeadamente centros de saúde e PACs, que poden recibir un caso en calquera momento,” non só non se formou e adestrou ao persoal, senón que en moitos casos non se dispón de espazos habilitados para o manexo destes casos”. A este respecto indican, a modo de exemplo que en moitos centros os boxes de urxencias (sexan hospitalarias ou extrahospitalarias) teñen como única separación entre eles e o corredor de acceso unha cortina, e en caso de ter que poñer ou quitar un traxe de protección tería que facerse dentro do propio box ou no corredor por onde está a pasar todo o mundo. “Xa non digamos os centros de saúde, que na súa maioría non dispoñen de ningún habitáculo que poida ser destinado a illar un posíbel caso de ébola”.
A isto engaden que tampouco se sabe qué protocolo van seguir aqueles centros privados que poden ser susceptíbeis de recibir un caso deste tipo, nin se o persoal deses centros vai dispoñer das medidas de protección adecuadas ou do adestramento necesario.
Tamén se descoñece qué indicacións se lle deron ao persoal da limpeza, clave neste tipo de casos, e que, como é ben sabido e a CIG-Saúde denunciou sempre, está privatizado, sendo prestado este servizo por distintas contratas nos distintos centros. “Este persoal debe de ser tamén adestrado convenientemente, cousa que, ata este momento, non se fixo”.
Alertan de que a día de hoxe, en moitos centros aínda non se dispón dos equipamentos de protección necesarios, ou o que se está a enviar como paquete anti-ébola “consta de material de uso diario que para nada responde ao recomendado para casos de protección biolóxica como do que estamos falando. O que é máis, o material que se está enviando non é nin sequera impermeábel”.
A CIG-Saúde pregúntase “se a Conselleira de Sanidade, Rocío Mosquera, tamén lle vai botar a culpa ao persoal ante un posíbel caso. En vista do ben que se están a facer as cousas, sería algo moi grave, tal e como é o que está a acontecer en Madrid, onde a vítima se converte en culpábel porque o goberno do PP elude responsabilidades”. Lembran as últimas declaracións da Conselleira, nas que incidía en que “o protocolo está colgado a disposición de todo o persoal” e ante isto consideran que “resoan ecos de querer xustificarse despois nisto para non asumir a súa responsabilidade ante calquera situación e dirixir directamente a culpa ao persoal”.
A CIG-Saúde advirte de que nos centros sanitarios galegos traballan moitas persoas, profesionais formados/as e que co seu traballo diario manteñen a flote a Sanidade Pública, suplindo en moitos casos as carencias ás que se ven sometidos/as por mor dos recortes e políticas de desmantelamento e privatización que este goberno ten por norma aplicar. “Calquera persoa que acuda a un centro sanitario galego pode estar segura de que o darán todo para axudar á súa curación. Mais tamén é necesario que se saiba que o están a facer, no que respecta ao Ébola, mais non só, en condicións indignas, e sen a máis mínima seguridade para a súa saúde”.
Desde a CIG-Saúde, e recollendo o sentir do persoal “temos a percepción de que existe unha total e absoluta improvisación no tocante á actuación ante o Ébola. Existe sensación de caos, e así o están a contar desde os distintos centros moito do persoal que alí traballa”.
Manifestan en todo caso a esperanza de que non se dea ningún caso de infección por Ébola na Galiza, mais para o caso en que así fora, “agardamos que desde xa se empece a tomar en serio esta cuestión e se empece a difundir adecuadamente a información e a formar e adestrar convenientemente, con xornadas prácticas, ao persoal da sanidade, que vai expor a súa propia saúde para atendelo e quere facelo cunhas mínimas garantías”.
Concentración no Hospital da Costa
Centos de traballadoras e traballadoras secundaron este mediodía unha concentración diante do Hospital da Costa en solidariedade coa TCAE Teresa, infectada polo virus do ébola. Coa protesta tamén se quere esixir responsabilidades, pedir máis información, formación e recursos materiais axeitados.
Dende a Xunta de Persoal denuncian que existe unha falta de formación e adestramento axeitado do persoal no que se refire a todo o relacionado co virus do Ébola por parte do SERGAS, “a pesares dos esforzos de profesionais do centro mariñao que procuran informar e formar cos medios dos que dispón o hospital.
I feel so free!