A CIG convoca folga no sector do metal da provincia de Pontevedra para rexeitar «o convenio da traizón»

Este mércores día 12 tamén haberá manifestación en Vigo e concentracións en Pontevedra e Vilagarcía
Vigo/Pontevedra - 04 Mai 2021

Ao berro de “non non non, ao convenio da traizón” uns 150 delegados/as sindicais da CIG no sector do metal da provincia de Pontevedra mobilizáronse diante da sede de Asime en Vigo para rexeitar o convenio pactado entre as patronais e os sindicatos CCOO e UGT. Ao remate da protesta, o secretario comarcal da federación de Industria anunciou a convocatoria dun paro de media xornada este mércores 12 de maio, que coincidirá cunha asemblea comarcal de delegados/as e posterior manifestación en Vigo e con concentracións en Pontevedra e Vilagarcía.

Co acto de hoxe a CIG arrincou a ofensiva contra o convenio do metal que leva deseñando nada máis coñecerse que CCOO e UGT negociaran fóra da mesa co empresariado e chegaran a un acordo dous días antes de que se fixese efectiva unha convocatoria de folga no sector. O primeiro que fixo a central sindical foi convocar unha asemblea de delegados/as do metal para analizar o contido dun acordo que empeora incluso a última proposta da patronal e decidir a folla de ruta que hoxe comezou.

Ademais da protesta desta mañá e da folga do día 12, a CIG convocou tamén unha manifestación comarcal en Vigo o próximo día 19 baixo o lema “Salvemos o naval. Polo futuro industrial da comarca de Vigo”. A marcha, coa que se pretende denunciar o proceso de desertización industrial que padece a bisbarra, simbolizado na grave crise que atravesa o naval, arrincará do cruce da Dobrada ás 18:00 horas. Con todo, non é a última mobilización que a central sindical ten preparada, e aproveitará a asemblea do día 12 para anunciala.

A FOLGA CELEBRARASE NOS SEGUINTES HORARIOS:

-Quenda de mañá: as catro últimas horas da mañá.

-Quenda de tarde: as catro primeiras horas da tarde.

-Quenda de noite: de 2:00 a 6:00 horas (día 12 de maio).

-Xornada partida: as dúas últimas horas da mañá e as dúas primeiras da tarde.

Ademais, durante a xornada levaranse a cabo distintas mobilizacións:

En Vigo haberá unha asemblea comarcal de delegados/as ás 09:30 horas na esplanada de Bouzas. Ás 11:30 horas sairase en manifestación até a delegación da Xunta.

Pontevedra: concentración ás 12:00 horas na praza da Peregrina.

O Salnés: concentración ás 12:00 horas na rúa Castelao de Vilagarcía.

Precarización do sector

Durante a mobilización de hoxe, o secretario comarcal da CIG-Industria de Vigo, Xulio Fernández, explicou o xeito en que os sindicatos estatais e as patronais do sector consumaron “unha nova traizón” aos traballadores/as do metal e repasou os aspectos máis lesivos que contempla o acordo, ao tempo que denunciou a estratexia de CCOO e UGT de pechar en falso os convenios facendo concesións que precarizan as condicións laborais e renunciando a “dereitos históricos” conquistados grazas á loita da clase traballadora.

“Hoxe venderon a cláusula de eventualidade; que van vender mañá cando non queda nada? A nosa dignidade? A nosa propia vida?”, preguntouse. Por iso chamou os empregados/as do sector a facer unha demostración de forza e a seguir acumulando para cambiar a correlación de forzas nas empresas. “Hai que ter claro a quen se vota nas eleccións sindicais”, sinalou. 

Pola súa banda, o secretario comarcal da CIG-Vigo, Alberto Gonçalves, fixo fincapé en que a loita obreira é o único camiño para conquistar melloras laborais e sociais. “Nada nos foi regalado nunca, nin co pacto social nin nada, foi sempre foi coa loita”. Por iso chamou a seguir mobilizándose "para deixarlles moi claro que non imos permitir un ataque desta magnitude aos nosos dereitos”.