A CIG convoca unha protesta en Ilunion pola precariedade neste centro especial de emprego da ONCE

O persoal traballa na automoción e padece altos ritmos de traballo e falta de formación obrigatoria

Vigo -

A CIG desenvolverá unha concentración este xoves 28 diante da sede da ONCE en Vigo (Gran Vía, 16) de 11:00 a 12:00 horas para denunciar a precariedade que padece o persoal de Ilunion Servicios Industriales Galicia, un dos seus Centros Especiais de Emprego (CEE), así como os altos ritmos de traballo ao que está sometido e a falta de formación obrigatoria.

Dende a federación de Industria explican que os 620 traballadores/as de Ilunion, que prestan servizo en compañías do sector da automoción como Stellantis, Benteler, Lear e Denso, padecen unhas elevadas condicións de precariedade -perciben o salario mínimo interprofesional- e uns altos ritmos de traballo. Ademais, non reciben a formación obrigatoria establecida por lei, algo especialmente grave tendo en conta que se trata de persoas con capacidades especiais, tanto físicas como psíquicas. 

A concentración terá lugar este xoves 28 na Gran Vía 16 de 11 a 12

Para rematar con esta situación de precariedade e de explotación laboral os afectados/as reclaman que se lles aplique o convenio colectivo do sector no que prestan servizo, reivindicación que a CIG-Industria -que conta con 10 dos 17 delegados/as do comité de empresa- considera tamén fundamental para poñerlle freo aos abusos que padecen estes/as empregados/as.

Na CIG consideran que este tipo de centros fan parte das novas ferramentas que o capital emprega para precarizar as condicións laborais e de vida de milleiros/as de traballadores/as “e para incrementar beneficios mediante o abuso e a escravitude laboral”.

Precariedade subvencionada

Lembran que máis de dúas terceiras partes dos contratos que se realizan a persoas con capacidades especiais son a través de CEE, e maioritariamente están asociados a tarefas pouco cualificadas. En consecuencia, estes centros deixan de ser unha porta de acceso ao mundo laboral “para converterse en precariedade subvencionada”.

Estas empresas son favorecidas por convenios que remuneran por debaixo do que o fai o convenio de sector da empresa cliente, e acaban actuando como empresas multiservizos. “Ofrecen man de obra barata, o que lles permite obter un lucro inmoral, vulnerando o principio de igualdade entre as persoas traballadoras e desvirtuando o papel dos CEE como facilitadores da integración laboral”.

Volver