A CIG denuncia a presión e a precariedade que padece o persoal que realiza o cribado da covid no HAC

O presidente da Xunta visitou hoxe as instalacións de xestión privada que se veñen de poñer en marcha
Vigo - 25 Set 2020

A federación de Saúde da CIG denuncia a presión e a precariedade laboral que padecen os traballadores/as encargados/as de realizar o procesamento agrupado de mostras -coñecido como pooling- no cribado da covid-19 no hospital Álvaro Cunqueiro (HAC). O presidente da Xunta visitou hoxe as instalacións que se que veñen de poñer en marcha baixo a xestión da Fundación Biomédica Galicia Sur, entidade privada cuxo persoal carece de convenio que regule as condicións de traballo.

Dende a central sinalan que os profesionais que levan a cabo estas tarefas están a soportar unha presión insostíbel, “agravada pola gran eventualidade dos seus contratos, moitos deles renovados de 15 en 15 días”. 

O persoal desta Fundación privada por decisión do PP carece de convenio que regule as súas condicións laborais

Lembran que esas instalacións son xestionadas pola Fundación Biomédica Galicia Sur, entidade privada por decisión do actual Goberno do PP a pesar de facer o seu traballo de apoio a investigación nun ámbito público.

“O persoal desta Fundación carece de convenio que regule as súas condicións laborais polas continuas trabas que a Consellería de Sanidade leva poñendo dende hai dous anos”.

Diante disto, a CIG-Saúde esixe que o persoal do Sergas que desenvolve as técnicas diagnósticas da covid (técnicas/os de laboratorio, médicas/os, persoal administrativo, etc) teña contratos estábeis e unhas condicións de traballo dignas.

Mais tamén reclaman retomar as negociacións do convenio laboral do persoal da Fundación, “e que esta sexa convertida nunha entidade pública”.