A CIG-Industria de Ourense convoca unha xornada de loita contra a perda de poder adquisitivo na industria química

Desenvolverá concentracións este xoves 23 diante das empresas Tecnogap, Hispaplasti e Refigal entre as 13:00 e as 16:00 horas
Ourense - 22 Mar 2023

A federación de Industria da CIG de Ourense desenvolverá unha xornada de loita este xoves 23 contra a perda de poder adquisitivo na industria química, con concentracións diante diante das empresas Tecnogap, Hispaplasti e Refigal entre as 13:00 e as 16:00 horas. Dende a central sindical reclaman a actualización dos soldos e o pago de atrasos, xa que o convenio de 2021 e 2022 non inclúe cláusula de revisión salarial nin cobro de atrasos.

Segundo explican na CIG-Industria, a perda de poder adquisitivo do persoal traballador das empresas do sector químico situouse en xaneiro no 19,4%, xa que o IPC acumulado de 2021 e 2022 foi do 13,6% e o de xaneiro deste ano do 5,8%. En consecuencia, a caída dos soldos está a ser “durísima”, xa que o convenio asinado´a nivel estatal por CCOO e UGT non contempla a cláusula de revisión salarial nin o cobro de atrasos. De feito, neste período os soldos medraron unicamente un 13,6% fronte ao 19,4% que o fixo o IPC.

O ano comezou tamén cun IPC disparado, do 5,8%, polo que de manterse a tendencia os atrasos salariais non percibidos elevaríanse até o 19,4%, o que suporía un “recorte brutal” dos soldos. Diante disto, a central sindical aposta por levar a cabo unha xornada de loita diante das principais empresas do sector “afectadas por estes recortes aplicados no convenio de Industrias Químicas” en demanda dunha actualización salarial e do cobro dos atrasos.