A CIG mobilízase contra o acoso a un afiliado na empresa Drovi do Porriño

A campaña da dirección contra o traballador comezou tras reclamar os seus dereitos laborais
O Porriño - 21 Xan 2020

Un grupo de delegados/as da CIG mobilizouse hoxe diante da empresa Drogas Vigo (Drovi) no Porriño para denunciar o acoso que padece un afiliado da central por parte do xefe a raíz de reclamar os seus dereitos laborais.

O afectado, con case 30 anos de antigüidade na empresa dedica ao transporte de mercancías perigosas, tivo un desencontro co propietario da compañía, tras o que comezou unha campaña de acoso contra el consistente nun control exhaustivo das súas accións e na modificación das súas condicións laborais.

De feito, foille retirado o seu vehículo habitual e trasladado da ruta que acostumaba a cubrir, derivándoo a unha función con máis carga física a pesar de que o empregado padece un problema nun ombreiro. Estes cambios conlevaron a retirada dos complementos salariais dos que si gozan os seus compañeiros/as.

Diante disto, a CIG presentou unha serie de denuncias na Inspección de Traballo, que decidiu impoñerlle unha sanción moi grave á empresa unha vez que a inspectora foi quen de documentar o que estaba a acontecer.

Ao mesmo tempo, o vindeiro día 28 terá lugar o xuízo derivado das sancións que a empresa lle impuxo ao traballador no marco desta compaña de acoso contra el. Dende a CIG anuncian que no caso de que a empresa non cese na súa actitude convocarán máis mobilizacións.