A CIG marcha a pé entre Trevès e Aludec en demanda de medidas que garantan o futuro da automoción

A federación de Industria continúa coa campaña para reclamar unhas condicións laborais dignas

Pontevedra -

“Sen industria non hai futuro” foi unha das consignas que máis se repetiu hoxe na manifestación convocada pola CIG entre as empresas Trevès e Aludec de Pontevedra para reclamar medidas que garantan o futuro da automoción e freen a crecente precarización laboral. A protesta, na que participaron arredor de 200 delegados/as sindicais, fai parte da campaña que desenvolve a federación de Industria en defensa do sector.

A marcha a pé entre as dúas compañías situadas no polígono do Campiño, no concello de Pontevedra, (Trevès) e da Reigosa, en Pontecaldelas, (Aludec) desenvolveuse de 14:00 a 15:00 horas coincidindo coa saída da quenda de mañá na primeira compañía e coa entrada da de tarde na segunda.

Durante o percorrido, como vén sendo habitual nas protestas que fan parte da campaña nacional que a CIG desenvolve dende o ano pasado, berráronse consignas como “Traballo digno na automoción”, “Non á deslocalización”, “Fóra as ETT da automoción” ou “Non á precarización”.

O secretario nacional da CIG-Industria, Xoán Xosé Bouzas, alertou ao remate da mobilización do perigo ao que se expón a automoción galega ante os retos que ten por diante, como a Lei de Transición Ecolóxica que penalizará a fabricación de vehículos diésel, ou a aplicación de novas tecnoloxías nos procesos de produción. Denunciou que tanto as empresas como a Xunta “non están a facer nada para que o sector poida afrontar con garantías estes cambios tan importantes”.

Ao mesmo tempo, sinalou que a CIG continuará a mobilizarse para demandar unha política industrial de país que teña en conta un sector fundamental como o do automóbil e criticou o crecente proceso de precarización que padecen os milleiros de traballadores/as da automoción como consecuencia da proliferación de ETT, empresas multiservizos e centros especiais de emprego.

Propostas da CIG

Pola súa banda, o presidente do comité de empresa de Trevès, David Couñago, citou as principais propostas da central para o sector, como a creación dunha mesa galega do automóbil integrada polo Ceaga, as centrais sindicais e as tres universidades; o impulso dun plan galego para a automoción no que se recollan medidas de apoio a I+D+i; a especialización na produción de vehículos de alto valor engadido; a e optimización de procesos produtivos.

Tamén demandou un compromiso de todo o sector para non afondar na precariedade laboral, comprometéndose a non abusar da contratación por ETT, multiservizos ou CCE, así como aplicar o convenio sectorial ou da empresa principal a todos os traballadores/as.

Por último, demandou medidas encamiñadas ao rexuvenecemento dos cadros de persoal e ampliar a formación dos novos/as traballadores/as, así como á posta en marcha dunha tarifa eléctrica galega que reduza o gasto enerxético e que permita deste xeito aumentar a competitividade das empresas "en lugar de facelo mediante a redución de salarios".

Volver