![Confederación Intersinidical Galega](/assets/cig/2022/logos/cig.png)
A CIG pide clarificar o futuro do sector do biodiésel ante os cambios normativos que están a debate
![](assets/images/8/RecursoMasolIberiaBiofuel-eb75a528.jpg)
A Federación de Industria da CIG pide que se clarifique o futuro da produción de biodiésel diante dos cambios normativos que se están a formular a nivel europeo, tanto no que ten a ver co levantamento de aranceis á produción estranxeira como no relativo ás posíbeis prohibicións do uso do aceite de palma como materia prima. A CIG amósase especialmente preocupada por como as decisións políticas poden afectar á viabilidade de Masol Iberia Biofuel -a planta que a multinacional Musim Mas ten no porto exterior de Ferrol-, e que hai uns anos xa atravesou unha complicada situación laboral a causa da falta de regulamento no sector.
Neste senso, Alberte Amado, da Executiva da CIG-Industria, explica que nestes intres está a debate o levantamento das restricións anti-dumping impostas pola UE ao produto procedente de Indonesia, mentres que estes aranceis as empresas arxentinas que os denunciaron xa foron suprimidos o pasado ano.
A Organización Mundial do Comercio, que promoveu este levantamento, recomendou ao tempo que se realice unha nova regulación para evitar a competencia desleal entre o biodiésel producido en Europa e o procedente de países como Arxentina ou Indonesia, onde os custes laborais e a normativa ambiental son moi inferiores. Sortear eses aranceis foi unha das razóns polas que Musim Mas se fixo coa xestión de tres plantas de biodiésel no Estado español.
![](imaxes/adaptadas/780/files/novas/2018/07/12/18-07-11_ReunionCIG_BNG_Biodiesel.jpg)
Para coñecer en que fase está o proceso e os termos nos se van aplicar esas posíbeis restricións, a CIG-Industria iniciou unha rolda de contactos institucionais pola que xa se mantivo un encontro coa eurodeputada do BNG, Ana Miranda, e a deputada, Noa Presas; quen trasladaron toda a información da que dispón a formación nacionalista e se comprometeron a realizar as xestións oportunas.
Regulación do uso do aceite de palma
De xeito paralelo, está sobre a mesa a limitación do uso do aceite de palma como materia prima para a produción de biofuel. A CIG entende e defende a necesidade de limitar a materia prima ao uso de aceites sustentábeis e pasar xa ao biodiésel de segunda xeración (que utiliza recursos non ligados ao mercado de alimentación como si ocorre cos biocarburantes de primeira xeración).
Porén, é preciso aclarar que prazos e condicións se permitirán as empresas para que readapten as súas plantas ás novas materias, "ou doutro xeito poderíamos estar ante un grave problema de viabilidade e que mesmo as empresas utilicen a nova normativa para aplicar recortes nas condicións laborais", sinala Amado.
Esta cuestión resulta especialmente sensíbel nas instalacións de Ferrol, pois a súa propietaria, Musim Mas, é a principal produtora de aceite de palma a nivel mundial. "Aínda que este debate parece menos inmediato que o das restricións, para a planta de Ferrol ten máis impacto xa que é a materia prima coa que se traballa, e canto antes se defina a nova regulación antes se poderá adecuar a factoría para garantir a súa viabilidade e o mantemento dos empregos", engade.
![](imaxes/adaptadas/780/files/novas/2018/07/12/18-07-11_ReunionCIG_BNG_Biodiesel1.jpg)
Para abordar esta problemática, a central nacionalista reuniuse co Instituto Enerxético de Galiza (INEGA) dende onde se avaliou a posibilidade, entre outras, de promover axudas de I+D+I destinadas á investigación de produtos de segunda xeración.
Un sector viábel e con futuro
A este respecto, a CIG lembra que hai uns anos os gobernos español e galego venderon o sector do biodiésel como a gran alternativa industrial para a comarca de Ferrolterra e na que se soterraron millóns de euros en instalacións que non chegaron a producir un só litro, a causa da ausencia de regulación e a competencia desleal.
"Pero o sector é viábel e ten futuro, hai cota suficiente de produción asignada e, atendendo a normativa europea, cada vez a porcentaxe de consumo mínimo de biodiésel dentro dos carburantes irá en incremento. Non se pode permitir agora que por desidia ou desinterese se deixe esmorecer a única planta que está en funcionamento en Ferrol e se destrúan postos de traballo nunha comarca en grave proceso de desmantelamento industrial".