A Coordinadora Galega de Solidariedade con Palestina presenta as reivindicacións da manifestación nacional de 5 de outubro en Compostela
Representantes da Coordinadora Galega de Solidariedade con Palestina compareceron esta mañá en rolda de prensa para presentar a táboa reivindicativa da manifestación nacional que o próximo 5 de outubro, ás 12:00 horas, sairá da Alameda de Compostela baixo o lema “Galiza Con Palestina. 2 anos de xenocidio, 77 anos de ocupación”. A mobilización coincide co segundo ano da barbarie xenocida de Israel na Faixa de Gaza.
Estas reivindicacións teñen o aval de máis de cento trinta colectivos e entidades de todo o tecido social, desde organizacións políticas e sindicais a asociacións veciñais, clubes deportivos, asociacións culturais, profesionais, etc.
Ánxela Gippini valorou que “a lista de apoios mostra que esta é unha convocatoria aberta á sociedade galega no seu conxunto, que leva dous anos manifestándose en máis de mil cen convocatorias en todas as comarcas galegas”, e informou de que continuará a recibir novas incorporacións ata o mesmo día da manifestación. Gippini tamén deu conta da intensa campaña axitativa que se está a desenvolver por toda Galiza, coa distribución de millares de carteis e folletos informativos.
Oscar Valadares presentou a continuación a táboa reivindicativa da manifestación, que inclúe a denuncia ao mesmo nivel das accións militares que Israel desenvolve desde o 7 de outubro de 2023 na Faixa de Gaza e dos crimes de 77 anos de ocupación. Neste sentido, exíxese tamén “un cesar fogo inmediato que implique a retirada de tropas israelitas e a apertura de corredores humanitarios, así como unha investigación exhaustiva do xenocidio e dos crimes contra a humanidade cometidos por Israel”.
As reivindicacións reclaman tamén á Unión Europea, ao Goberno español e á Xunta de Galiza a ruptura das relacións comerciais preferentes con Israel e a das relacións diplomáticas. A este respecto, repudiaron o “feito de que, tras dous anos de xenocidio, as lideranzas europeas só recentemente comezasen a rexeitar a inhumanidade de Israel de maneira tan morna e aínda sen efectos prácticos.”
Por último, as reivindicacións exixen a aplicación do dereito internacional, en particular en relación ao dereito de autodeterminación dos pobos en toda a Palestina histórica e ao retorno das persoas refuxiadas. “Urxe parar o xenocidio, mais tamén impedir que Israel poida continuar a roubar terras, desprazar poboación local, aplicar estruturas sociais de apartheid e acosar todo un pobo”, manifestou Sami Ashour, que chamou a participar na manifestación nacional e a encher a praza do Obradoiro o vindeiro 5 de outubro en apoio a Palestina, porque “non falamos de deporte nin cultura, senón de humanidade”.
Concentración de repulsa á presenza de Ehud Olmert no Foro “La Toja”
En paralelo á convocatoria do día 5, a Coordenadora Galega de Solidiariedade con Palestina anunciou tamén unha mobilización popular contra a presenza de Ehud Olmert no Foro “La Toja” o día 4 de outubro en Ogrobe. Ánxela Gippini lembrou que Olmert foi primeiro ministro de Israel durante a Operación Chumbo Fundido que implicou 22 días consecutivos de bombardeos na Faixa de Gaza, e considerou a súa participación como unha provocación dos sectores pro-sionistas diante da repulsa que a sociedade galega vén manifestando masivamente desde hai dous anos.
Representantes de numerosos colectivos
Xunto coa Asociación Galaico-Árabe Jenin, Galiza por Palestina e Mar de Lumes, como parte deses colectivos compareceron tamén representantes de ADEGA, A Mesa pola Normalización Linguística, Asociación de Amizade Galego-Cubana Francisco Villamil, Asociación de Amizade Galiza-Vietnam, Asociación de Escritoras e Escritores en Lingua Galega, Asociación Esfarna do Ribeiro, Bloque Nacionalista Galego, Centro Social A Gentalha do Pichel, Confederación Intersindical Galega, Colexio Oficial de Traballo Social de Galicia, Comité Anti-OTAN de Compostela, Compostela por Palestina, Foro Galego da Inmigración, Galiza Nova, Marcha Mundial das Mulleres, Movemento Arredista, Plataforma Galega Vivenda Xa, Sanidade Galega por Palestina, Sindicato de Traballadoras e Traballadores do Ensino de Galiza, Unión da Mocidade Galega e Unión do Povo Galego.
