A CIG faise cos 2 delegados de persoal na empresa Viuda de J. Domínguez, de Monbus

A pesar das intensas presións da compañía, que mesmo chegou a impugnar o preaviso de eleccións

Vigo -

A FGAMT-CIG fíxose cos dos delegados de persoal que se escollían na empresa de autobuses Viuda de J. Domínguez a pesar das intensas presións exercidas pola compañía do grupo Monbus, que mesmo chegou a impugnar o preaviso de eleccións sindicais.

No proceso exerceron o seu dereito a voto 35 das 38 persoas que integran o cadro de persoal da empresa con sede no Gandarón, en Vigo. Os candidatos da CIG sumaron 48 apoios, mentres que os sindicatos estatais CCOO e UGT contabilizaron 8 cada un. 

A empresa presionou para dirixir os votos a CCOO e UGT

Este resultado ten unha especial importancia tendo en conta as intensas presións exercidas polo grupo que preside Raúl López, tanto sobre os candidatos da CIG como sobre os traballadores/as, co obxectivo que dirixiran os seus votos cara as candidaturas de CCOO e UGT, promovidas pola propia empresa.

Con anterioridade, Viuda de J. Domínguez mesmo impugnara o preaviso de eleccións sindicais feito pola CIG, impugnación que foi desestimada en laudo arbitral. A empresa defendía a existencia de varios centros de traballo na provincia, cando a realidade é que unicamente existe un, o situado no Gandarón, en Vigo, tal e como defendía a central sindical.

Exemplo de valentía

A representación sindical era exercida até o de agora por un delegado da UGT, pero unha vez que a compañía superou os 31 traballadores/as a CIG promoveu a celebración de eleccións parciais para escoller dous delegados/as, proceso que a empresa intentou paralizar sen éxito.

Por iso dende a FGAMT-CIG salientan a valentía amosada tanto polos candidatos da CIG como polo cadro de persoal da empresa, que non se deixaron amedrentar polas presións. Ao mesmo tempo, agradecen o apoio recibido e a confianza depositada no proxecto sindical que representa a CIG e adiantan que os delegados da central sindical defenderán os dereitos laborais do conxunto dos traballadores/as de Viuda de J. Domínguez.

Volver