A solución para Alcoa San Cibrao non está no xulgado, senón nas decisións dos Gobernos

A CIG sinala a intervención pública da fábrica como única alternativa

San Cibrao -

As adopción de medidas cautelares constitúe un paso máis no proceso de loita contra os plans de peche de Alcoa, pero a solución definitiva está na intervención pública da fábrica e esa é unha decisión política que teñen que tomar o Goberno español e a Xunta de Galiza, atendendo así ao clamor da Mariña pero tamén aos pronunciamentos aprobados no Congreso e no Parlamento galego.

Para o secretario xeral da CIG, Paulo Carril, na vista das cautelares celebrada o 28 de outubro no TSXG quedou demostrada a falta de motivación e a mala fe de Alcoa neste proceso de despedimentos e, en particular, en todo o referido á decisión de parar as cubas de electrólise. “É obvio que Alcoa non ten máis preocupación que pechar a fábrica e evitar que se poida continuar coa produción de aluminio primario en San Cibrao, sen importarlle o desastre industrial e a destrución de postos de traballo que provoca”, denuncia. 

A empresa non ten máis preocupación que pechar a fábrica e evitar que se poida continuar coa produción de aluminio primario

Pero permitirlle á multinacional parar as cubas significaría un dano irreversíbel nas capacidades produtivas e lastraría unha solución de futuro. Neste senso, Carril insiste que a saída para a fábrica “non está no xulgado como tampouco estaba na mesa do ERE, senón na actuación política dos Gobernos”. Por iso salienta a importancia de reunir a Mesa Multilateral e que se concrete un calendario de actuacións para a intervención efectiva da planta por parte da SEPI.

Reitera que este conflito é a demostración palpábel de que “somos vítimas da reforma laboral, pois de terse derrogado, Alcoa non podería decidir unilateralmente sobre a aplicación do ERE e a parada das cubas”.

De igual xeito, para Carril salta á vista a necesidade de cambiar as políticas para que sectores estratéxicos da economía sexan xestionados dende o público e non estean ao arbitrio de decisión de grandes corporacións multinacionais.

Volver