Acusan a Medio Rural de “vender fume” na prevención dos incendios forestais

A Consellaría di agora que a dotación orzamentaria de 549 prazas de bombeiro para todo o ano foi un erro

Nacional -

O sector de Autonómica da CIG-Administración acusa a Consellaría de Medio Rural de “vender fume” a respecto da prevención de incendios forestais, xa que o departamento autonómico dá marcha atrás na dotación orzamentaria de 549 prazas de bombeiro forestal para todo o ano. A Consellaría do agora que a documentación económica achegada na negociación da Relación de Postos de Traballo (RPT) “estaba mal”, xa que a contratación se fará unicamente durante cinco meses.

Dende o sector de Autonómica critican que o departamento autonómico lle presentase ás organizacións sindicais unha RPT “mal feita e chea de erros”. Na documentación figuraba a creación de 549 prazas de 12 meses “pero agora os servizos de persoal da Consellaría manifestan que foi un erro, e que unicamente son de cinco meses, xa que o documento económico no que orzamentaban para todo o ano estaba mal”. Con todo, Medio Rural negouse a manifestar o tempo exacto que vai traballar o persoal de alto risco, nin cando vai comezar. 

Medio Rural di que o documento achegado estaba mal e que a contratación é só para cinco meses

Deste xeito, na CIG-Autonómica entenden que “ante estes datos e con este novo cambio de rumbo, a palabra máis repetida polo conselleiro de Medio Rural, prevención, é só fume, pois a improvisación da Consellaría queda outra vez en evidencia ao non seguir as recomendacións do comité de expertos/as derivado da comisión parlamentaria polos incendios forestais, nin do propio ditame da comisión, nas que se incide na necesidade de actuar na prevención”.

A consecuencia é que as novas prazas creadas unicamente traballarán en extinción de lumes durante os períodos de alto risco, “imposibilitándose o traballo de prevención”.

Amortización de prazas

Ademais nesta RPT amortízanse prazas de persoal bombeiro de 12 meses para crealas de cinco meses, ao tempo que se amortizan moreas de prazas dos servizos periféricos, como nas oficinas agrarias e distritos forestais, servizos de infraestruturas ou postos base nas xefaturas territoriais. “Rexeitamos amortizacións de postos nos servizos de atención á cidadanía do rural, obxectivo desta Consellería, coa finalidade de crear postos de estrutura e opoñémonos á amortización de postos de persoal bombeiro de 12 meses”.

Finalmente sinalan que na última xuntanza entre as organizacións sindicais e o departamento autonómico para tratar a RPT, a CIG presentou máis de 100 alegacións, “que serán moitas máis cos erros que inclúe a RPT, ademais da falta de xustificación funcional e memoria económica”.

Polo tanto, cualifican de “desastre” unha RPT “que anuncia atrasos no concurso de traslados de todo o persoal da Xunta e que segue na liña de desmantelar servizos de atención e non dar solución nin afrontar con seriedade os problemas do rural galego”.

Volver