• Nova

Brasil, o momento do voto decisivo

Emir Sader - 16 Set 2022

O fracaso dos gobernos de restauración neoliberal, de Michel Temer e Bolsonaro, máis os desastres vividos especialmente durante este goberno, levan ás eleccións de outubro a definir un novo ciclo na historia brasileira

 Unha das mensaxes a favor do voto útil exprésao moi ben: se votas por Lula, gaña en primeira volta. Se votas por outro candidato, Jair Bolsonaro pasa á segunda volta. A clareza política radica en entender que a liña divisoria hoxe, na recta final da campaña, non está entre os que estiveron a favor e en contra do golpe de estado contra Dilma Rousseff. Non se dá entre entre o Partido dos Trabalhadores (PT) e o antipetismo.

 A polarización fundamental agora dáse entre bolsonarismo e antibolsonarismo. O obxectivo fundamental é sacar a Bolsonaro do goberno, evitar que siga usando o goberno para atentar contra a democracia e contra todos aqueles que non estean de acordo co seu discurso de odio ou coa súa política económica de favorecer o capital especulativo.

 Lula da Silva representa non só o PT, a esquerda, a democracia. Representa o antibolsonarismo. Incorpora a todos os que se opoñen a Bolsonaro, ao bolsonarismo, incorpora a todos os que se identifican con ese obxectivo.

 Cada vez máis medran e o apoio a Lula de persoas que explican as súas diferenzas coa PT, que non son de esquerda, que estaban indecisas, que pensaban que votarían por outros candidatos. Este é o momento de gañar os votos que poden levar a Lula a gañar en primeira volta e evitar definitivamente calquera aventura golpista.

 A dereita decátase de que non pode gañar cun candidato como Bolsonaro, nefasto nos seus discursos e nas súas actitudes. Tenta evitar que Lula gañe na primeira volta, que Lula gañe moi claramente

 Conta coa adhesión directa dos medios, que retoman as acusacións contra Lula, o PT e a esquerda, tratando de explotar o antipetismo como contrapunto ao antibolsonarismo. A dereita non ten nada que propor ao país, retoma o discurso do suposto risco que significaría o regreso do PT ao goberno e un novo mandato de Lula.

 Brasil tivo eleccións que definiron o futuro do país durante moito tempo. Como cando Fernando Collor de Mello, axudado por TV Globo na súa edición falsificada do debate que tivo con Lula, gañou en 1989. Aquelas eleccións, as primeiras directas despois da ditadura -as anteriores foran en 1960, case 30 anos antes- definiu que o país tivese un ciclo neoliberal, que foi desde 1990 até o 2002.

 As eleccións presidenciais de 2002 levaron por primeira vez o PT á presidencia da República, coa vitoria de Lula. Abriuse o ciclo máis virtuoso da historia brasileira até o de agora, co fortalecemento da democracia, o desenvolvemento económico, a distribución do ingreso a través da creación de máis de 20 millóns de empregos formais e un aumento dos salarios mínimos un 70% por riba da inflación.

 Tanto é así que os gobernos da PT foron elixidos e reelectos democraticamente en catro eleccións sucesivas. Tiñan que ser vítimas dun golpe de estado -un xuízo político sen base legal ningunha contra Dilma e a detención e condena de Lula, igualmente sen fundamento- para terminar o ciclo.

 O fracaso dos gobernos de restauración neoliberal, de Michel Temer e Bolsonaro, máis os desastres vividos especialmente durante este goberno, levan ás eleccións de outubro a definir un novo ciclo na historia brasileira.

 Son as eleccións máis importantes porque ou ben prolongan o catastrófico ciclo actual -o que ningunha enquisa indica- ou reabren un ciclo virtuoso na historia do país. Hai dous contrapuntos antagónicos. Hai dous mundos, dous ‘brasís’, que están en oposición. De aí a importancia das eleccións deste ano.

 Derrotar o bolsonarismo -e facelo na primeira volta- ten un significado profundo. Significa rexeitar o modelo neoliberal e a utilización do Estado para promover as desigualdades, a violencia, a protección das milicias e a familia corrupta que se apoderou do Estado. Significa derrotar un  goberno profundamente neoliberal, autoritario, represivo que alimenta a violencia, o armamento xeneralizado, o desprestixio internacional de Brasil, entre outros desastres.

 Significa reafirmar o valor da democracia, para que nunca máis a deixemos destruír. Significa facer do Estado un instrumento para o crecemento económico e a inclusión social, garantindo condicións minimamente dignas para toda a poboación. Significa recuperar a imaxe degradada de Brasil no mundo.

 Por iso non se pode perder ningún voto. Trátase de impedir o que quere a dereita, que é levar a disputa á segunda volta. Esta é a hora decisiva do voto decisivo. Hora de elixir a Lula en primeira volta e brindarlle o mellor Congreso posíbel, rescatar o país e comezar a un novo ciclo virtuoso na historia de Brasil.

 

[Artigo tirado do sitio web Rebelión, do 16 de setembro de 2022]