CIG-Ensino urxe derrogar o decreto de plurilingüísmo co novo informe do Consello de Europa
O pasado xoves 1 de abril o Comité de expertos do Consello de Europa publicou as conclusións sobre a avaliación da aplicación polos Estados europeos da Carta Europea das linguas rexionais e minorizadas, tratado que foi asinado e ratificado polo Estado Español xa no 2001, o cal significa que compromete ao seu desenvolvemento. O Comité pon o foco de novo nas limitacións á nosa lingua da Xunta e do Estado español. Unha situación diante da que a CIG urxe a inmediata derrogación do decreto de plurilingüismo.
Tanto a Administración galega como a do Estado español achegáronlle a Bruxelas, como era preceptivo, un informe sobre a situación da lingua galega, informe que non só era incompleto senón falso e tendencioso, que probablemente só tiña a finalidade de non evidenciar que tanto a actuación dunha administración como a doutra están moi lonxe de adecuarse ao que estaban comprometidas, a protección das linguas minorizadas e a promoción do seu desenvolvemento.
Tamén o Comité de expertos pediu informes a entidades independentes de cada lingua minorizada, e no caso do galego foi a Mesa pola Normalización Lingüística quen achegou o seu. Nel, e usando os mesmos datos dos que dispón tanto a Xunta como o goberno español, e que foron manipulados por estes dous estamentos para o seu propio beneficio, evidenciou que a situación no ensino, debido en grande parte á aplicación do lesivo Decreto de plurilingüismo, é especialmente grave porque, segundo o compromiso das administracións, ‘o ensino debe ter o galego como lingua de instrución’ e que ‘o marco legal actual é contrario aos compromisos do Estado español’, polo que está claro que ‘non todas as limitación ao ensino en galego foron eliminadas’ tal e como estaba asinado.
O Consello de Europa fai fincapé nas propias estatísticas oficiais da Xunta ao se referir a que case o 24% do alumnado menor de 15 anos non son capaces de se expresar en galego.
Reaccionar diante da situación de emerxencia lingüística
A CIG-Ensino leva anos traballando para que se solucione o problema da paulatina desaparición do galego no ensino, tanto desde a mobilización e a resposta social como desde a elaboración e propostas para saírmos da situación de emerxencia lingüística na que está o noso país, camiño da perda constante de falantes e cunha especial incidencia na mocidade.
Nesta liña presentou no ano 2020 a “Proposta de bases para a normalización do galego no ensino en Galiza", documento elaborado conxuntamente con varias entidades vinculadas ao ámbito educativo e da normalización lingüística (A Mesa, AS-PG, Nova Escola Galega, Confederación de Anpas, STEG e CSIF). A proposta de consenso foi achegada a todos os partidos o pasado mes de outubro de 2020 mais o PP vetou a presenza no Parlamento galego das entidades citadas por tres veces nestes últimos meses.
A CIG-Ensino fai un novo chamamento a que partidos políticos, gobernos, entidades, nais e pais, profesorado e sociedade en xeral coloquen na axenda a asunción de responsabilidades e medidas para reverter a situación actual, xa que de non reaccionarmos inmediatamente pode tornarse irreversíbel.
