![Confederación Intersinidical Galega](/assets/cig/2022/logos/cig.png)
CIG-Industria reivindica a creación do Complexo Integral da Construción Naval para superar a dependencia do sector militar
![](assets/images/3/20-02-20_ManifestacionNavalFerrol_1-0c718763.jpg)
Traballadores e traballadoras do naval volveron saír este xoves ás rúas para esixir carga de traballo inmediata que palíe a caída na ocupación entre o remate dos buques australianos e o inicio da construción das fragatas F-110. Noutro "xoves do naval" o persoal saíu a pé dos estaleiros de Fene e Ferrol para confluír na avenida da Gándara e marchar conxuntamente en manifestación até o Concello de Ferrol.
![](imaxes/adaptadas/780/files/novas/2020/02/19/Naval%20bng/20-02-19_PNLNaval_1.jpg)
As reivindicacións para o naval, ao Congreso
A mobilización ten lugar un día despois de que representantes da CIG-Industria e delegados da central nas industrias auxiliares se trasladaran até Madrid para reivindicar a creación do Complexo Integral para a Construción Naval que permita superar a dependencia do sector militar á que están sometidos os estaleiros da ría de Ferrol e a periódica expulsión ao desemprego e a emigración que isto conleva para o persoal das subcontratas.
A visita fíxose con motivo do rexistro por parte do BNG dunha Proposición Non de Lei, a instancias da CIG, demandando a constitución deste complexo e a dotación de carga de traballo inmediata para os estaleiros, así como adiantar o programa de construción das fragatas F-110. "Estamos ás portas dun deserto que vai expulsar do mercado de traballo a moitos compañeiros e compañeiras das industrias auxiliares", advertía Ramón Fernández, da CIG-Industria.
Neste senso, subliñou que "mentres non se rache con ese veto de facto para que poidamos dedicarnos á construción naval civil, Ferrol non será capaz de remontar o volume de contratos e o número de empregos". Lembrou que no seu momento os estaleiros da ría chegaron a dar traballo a máis de 15.000 persoas "cando hoxe son apenas 3.000".
![](imaxes/adaptadas/780/files/novas/2020/02/20/naval%20ferrol/20-02-20_ManiNavalFene.jpg)
Fernández Alfonzo apuntou que os máis de 1.800.000 m2 de superficie que ocupan os dous estaleiros son propiedade pública, polo que sinalou á dobre responsabilidade do Goberno español con Ferrolterra: a propia de calquera Administración na defensa dos empregos e do tecido industrial, mais tamén como principal empresa da comarca. "Eses case dous millóns de metros cadrados están na mellor localización posíbel para dedicalos á construción naval civil, militar, potenciar turbinas, carenas e todos os sectores que aquí se poden desenvolver", aseverou.
Unidade territorial con competencias de xestión
A creación do complexo integral é unha vella reivindicación da CIG para converter os estaleiros de Fene e Ferrol nunha unidade territorial con dirección única e competencias plenas de xestión para adoptar as medidas en materia de enxeñaría, I+D+I, financeiras, de inversión, definición de produtos, sociais ou produtivas, que permitan optimizar os resultados e maximizar as sinerxías entre as diferentes áreas de actividade.
Nesta liña é necesario afrontar as melloras nas instalacións e infraestruturas do estaleiro (o que implica necesariamente a construción do novo dique); así como potenciar turbinas para poder converter Ferrol nun referente nos sistemas de propulsión e mobilidade marítima e situarse na mellor posición no mercado eólico mariño. De igual xeito, dotar Fene de persoal de xestión, técnico e produtivo para poder afrontar proxectos de construción naval civil.
![](imaxes/adaptadas/780/files/novas/2020/02/20/naval%20ferrol/20-02-20_ManifestacionNavalFerrol_4.jpg)
Xunto a isto, a CIG leva anos demandando que se cumpra o recollido na Lei do Sector Naval de Galiza e que a Xunta entre no Consello de Administración de Navantia, abrindo a posibilidade mesmo á participación no capital social da empresa pública. Isto favorecía tamén un marco para que os Gobernos galego e español lanzaran de xeito conxunto iniciativas destinadas á efectiva reindustrialización da comarca de Ferrol, dando prioridade á industria e servizos complementarios da construción naval.
Na PNL tamén se recolle a demanda de que o persoal das auxiliares que se vexa expulsado do mercado laboral por causa da caída de ocupación poida acceder á xubilación en idénticas condicións que o persoal propio de Navantia. "Este é o colectivo de traballadores/as máis vulnerábel do sector ante as baixadas da carga de traballo. Por iso pedímoslle ao Goberno que artelle as medidas necesarias para garantir unha xubilación digna nas mesmas condicións que o persoal da principal".
![](imaxes/adaptadas/780/files/novas/2020/02/19/Naval%20bng/20-02-19_PNLNaval_4.jpg)
Respecto polas condicións laborais e as liberdades sindicais
Outro punto relevante recollido na proposta non de lei é o referido ao respecto ás condicións laborais e salariais do persoal das auxiliares. Para isto pídese a incorporación nos pregos de contratación de Navantia da obriga de que se aplique o convenio colectivo do metal ás traballadoras e aos traballadores que presten servizos dentro dos estaleiros, con especial atención ás clúasulas que fan referencia específica á industria auxiliar ou a outros dereitos recoñecidos como o da subrogación. Deste xeito evitaríanse problemáticas como as que se dan coas empresas que teñen convenios propios ou que aplican convenios diferentes como o da construción.
Xunto a isto, abógase por implentar unha política de máximo respecto polos dereitos fundamentais -como o de libre sindicación ou o exercicio á folga-, tanto na propia Navantia como nas contratas, e que se tomen medidas para evitar que se vulneren estes dereitos. Unha destas medidas pasaría por impedir a participación nos procesos de contratación daquelas empresas ou persoas responsábeis destas vulneracións. "Isto é unha cuestión moi relevante porque nas auxiliares son habituais os casos de represalias a traballadores/as por ir de candidatos/as nas eleccións sindicais, participar nas mobilizacións ou simplemente pedir melloras laborais ou salariais", denuncia Fernández Alfonzo.
Pon o exemplo dos tres delegados da CIG en Maessa (do Grupo ACS) que foron sancionados pola empresa por acudir a unha mobilización dos traballadores/as de Poligal na defensa dos seus empregos, na que se pediu o apoio do sector naval que solidariamente saiu á rúa ese día. "Esta é a última das represalias que Maessa toma contra a representación da CIG. Por iso, para evitar que se repitan este tipo de abusos patronais, pedimos que se adopten as medidas necesarias".