![Confederación Intersinidical Galega](/assets/cig/2022/logos/cig.png)
Concentración nos xulgados en rexeitamento aos despedimentos no Grupo Cándido Hermida
![](assets/images/8/21-09-20_xuizodespedimentoCandidoHermida-7b0cece8.jpg)
Este luns deron comezo as vistas dos xuízos polo despedimento de máis de 20 traballadores das empresas do Grupo Cándido Hermida durante o pasado mes de abril. Con tal motivo, a CIG e CCOO realizaron unha concentración diante dos xulgados en solidariedade cos compañeiros, para amosar o total desacordo cos despedimentos e esixir unhas condicións de traballo dignas no grupo.
![](imaxes/adaptadas/780/files/novas/2021/09/20/21-09-20_xuizodespedimentoCandidoHermida1.jpg)
Esta semana, explica o secretario comarcal da FCM-CIG de Ferrol, Marcos Sánchez, os xuízos polos despedimentos (dos que se demanda a nulidade) celebraranse o luns, martes e mércores, mais aínda quendan pendentes un gran número deles para os meses de outubro e novembro.
Con esta protesta, ademais de apoiar os traballadores afectados, quérese denunciar o "o auténtico escándalo" que está a suceder nas empresas do Grupo Cándido Hermida, que está subcontratando traballo, contratando a novo persoal por medio de ETT ou mandando realizar horas extraordinarias, "mentres despide a traballadoras e traballadores formados" e con longas carreiras profesionais dentro da empresa.
"Isto non fai máis que reafirmar o que levamos denunciando todo este tempo, que os despedimentos non teñen nada que ver coas causas económicas alegadas pola empresa", apunta Sánchez, quen atribúe a decisión empresarial a un intento do Grupo Cándido Hermida de precarizar aínda máis as condicións laborais, eliminar o persoal máis reivindicativo e amedrentar ao resto de traballadores/as para que non reclamen os seus dereitos.
"Reiteramos que non imos calar ante estes abusos e ante o empeoramento das condicións laborais, polo que a frase tan repetida nas mobilizacións polos despedimentos esta máis vixente que nunca: “Cándido Hermida non é un ebanista, é un escravista”", denunciaron.