Condutores/as de Alsa concéntranse na estación da Coruña para esixir "respecto e saúde laboral"

Critican o deterioro das condicións laborais e do servizo e a falta de mantemento dos autobuses

A Coruña -

Traballadores e traballadoras de Alsa concentráronse este martes na estación de autobuses da Coruña para denunciar o deterioro das condicións laborais, a falta de mantemento adecuado da flota de vehículos e o empeoramento do servizo que se presta ás viaxeiras e viaxeiros que utilizan o transporte metropolitano da área da Coruña.

Con esta primeira protesta quixeron denunciar a precarización laboral que están a sufrir dende que o pasado mes de decembro se efectivizou a subrogación do servizo á nova concesionaria (unha empresa do grupo Alsa) que, entre outras cuestións, acurtou o tempo dos recorridos das liñas "facendo imposíbel" cumprir os horarios  establecidos pola Xunta.

Isto, explican os delegados da CIG, está a xerar numerosas queixas por parte das usuarias e usuarios dos autobuses "porque non se cumpren os horarios e o servizo é un desastre".

Xunto a isto, denuncian a falta de uniformidade para todo o persoal e o deficiente mantemento da flota de vehículos, con asentos en moi mal estado, problemas coas máquinas de cobro pola súa mala situación ou co aire acondicionado estragado.

Volver