Ex-traballadores/as de Catisa volven mobilizarse en demanda do cobro das indemnizacións que teñen pendentes
Estes arredor de 30 ex-traballadores/as de Catisa e La Estrella foron os únicos que no seu momento presentaron demanda de extinción dos seus contratos. O xulgado do social deulles a razón, recoñecéndolles unha indemnización de 45 días por ano traballado, en vez dos 20 cos que a empresa pretendía liquidalos. Pero até o de agora só cobraron 30 días da indemnización a través do Fogasa. O resto dos pagos tíñanse que afrontar mediante embargos de bens iniciados contra Catisa e Hormigones La Estrella.
Porén, a dilatación xudicial do proceso e a inacción administrativa provocaron que a día de hoxe eses embargos non se teñan executado e os traballadores/as aínda sigan loitando por cobrar o que lexitimamente lles pertence.
Para complicar máis a situación, explica o Secretario Comarcal da CIG-Construción de Lugo-A Mariña, Alfonso Losada, onte tiñan coñecemento que a empresa acaba de pedir a liquidación ao non ser capaz de cumprir o convenio fixado no concurso. Isto suporá, apunta, a fin da vía social e “que teñamos que pelexar todo outra vez pola vía concursal. A isto é ao que nos levou dilatar tanto o proceso”, critica.
De aceptar a solicitude de liquidación, abrirase un novo proceso para elaborar o plan de liquidación, un inventario e a valoración dos activos da empresa para a súa venda. “De aí será de onde teñan que saír os cartos para pagar as cantidades adebedadas aos traballadores”, explica Losada.
Neste senso, cómpre lembrar que a primeiros de decembro pasado, o persoal retomaba mobilizacións en demanda de axilidade ás administracións, a vista de que a empresa seguía a utilizar maquinaria que debería estar precintada ou estaba desfacéndose dela, e incluso ofertando bens para a súa venta en webs de segunda man, sen control de ningún tipo.
Pedíronse entón explicacións á Subdelegación do Goberno de por que as forzas de seguranza encargadas de facer o precinto da maquinaria non estaban a cumprir co mandado e tamén se demandou do xulgado do social unha intervención sobre a posíbel venda dos activos da compañía.
Días despois, o Subdelegado do Goberno reuníase cos traballadores/as, pero dende o xulgado seguiron sen responder. “Agora, coa solicitude de liquidación todo cambia. Pero moito tememos que cando se faga o inventario e a valoración dos activos da empresa, estes baixen moito con respecto á valoración anterior”, censura Losada.
Por iso, á espera de comprobar como se desenvolve todo o proceso, non se descarta ningún acción para garantir o cobro das cantidades adebedadas ao persoal e, de ser necesario, presentar demanda polo penal por alzamento de bens.
