![Confederación Intersinidical Galega](/assets/cig/2022/logos/cig.png)
Moskowich: "Descoñecemos que vai pasar coa fábrica de aluminio da Coruña dentro de tres días"
![](assets/images/f/18-11-26_ConcentracionAlcoa_DelegacionGoberno_02-73dad66f.jpg)
Dende que en xullo do ano pasado, Alcoa confirmara a venda da fábrica de aluminio da Coruña ao fondo suízo Parter Capital, a situación da factoría está en permanente incerteza, sen un proxecto viábel para retomar a produción das cubas de electrólise, coa escusa, por parte da nova propiedade, de non ter un prezo da enerxía 'competitivo'. Agora, o futuro da planta dá unha nova volta coa venda ao dubidoso Grupo Industrial Riesgo, con Alcoa dando por finalizado o compromiso de investimento na fábrica e co Goberno español (avalista de todo este proceso) agochado nun completo mutismo.
![](imaxes/adaptadas/780/files/novas/2018/10/23/Alcoa/18-10-23_Protesta_Alcoa_Fabrica_03.jpg)
"Non sabemos que vai pasar coa fábrica ni cos postos de traballo dentro de catro días. Demandamos do Goberno español que interveña de inmediato e tome as medidas necesarias para evitar a caída definitiva da fábrica de aluminio da Coruña e a Alcoa pedímoslle que manteña os investimentos comprometidos no acordo de venda con Parter", explica Julio Moskowich, delegado da CIG en Alcoa.
Con esta reivindicación, os traballadores e as traballadoras volverán saír ás rúas o próximo xoves, 28 de maio, na defensa dos seus empregos e polo futuro da actividade industrial. Nesta ocasión, por mor das restricións derivadas do estado de alarma, a mobilización consistirá nunha caravana de vehículos na Coruña dende a Delegación do Goberno até a Subdelegación, que arrancará ás 11:30 horas da porta da factoría no Polígono da Agrela.
Responsabilidade do Ministerio de Industria
A data elixida coincide co día no que, segundo ás informacións trasladadas ao persoal, o notario decidirá se Parter Capital está cumprindo co acordo de venda asinado con Alcoa e polo tanto, se a multinacional continúa pagando as cantidades acordadas co fondo suízo que mercou as plantas da Coruña e Avilés en xullo do ano pasado. "Se Alcoa non paga non sabemos que vai pasar, porque descoñecemos se a nova propiedade ten capacidade para afrontar os custes de mantemento das fábricas", sinala.
Por iso, dende a representación social reclámase do Goberno español e da Xunta a convocatoria urxente da mesa de seguimento para abordar a crítica situación das dúas plantas. A este respecto, Moskowich insiste en que o Ministerio de Industria "non pode quedar de perfil, cando propiciou o acordo do ERE (que a CIG non asinou) e cando fixo unha función de tutela e avalista da operación de venda. Agora non pode desentenderse, ten que asumir responsabilidades e tomar medidas".
Informacións alarmantes sobre o novo grupo propietario
Máxime, engade, cando o propietario de Grupo Industrial Riesgo ten unha dubidosa traxectoria -que inclúen investigacións por estafas-, e cando nas escasas semanas que leva á fronte das factorías (o persoal tivo coñecemento o 14 de abril de que adquirira o 74,9% das participacións de Parter) "xa mudou varias veces o presunto plan industrial para reactivar a produción e na Coruña dinos unha cousa e en Avilés di outra distinta".
![](imaxes/adaptadas/780/files/novas/2018/10/29/Marcha%20Alcoa%20A%20Corunha/18-10-29_MarchaObreira_PecheAlcoa_009.jpg)
Por se a operación con Grupo Industrial Riesgo ofrecía pouca fiabilidade, a chantaxe "de manual" á que o grupo quixo someter o comité disipou todas as dúbidas. "Riesgo pretendía que o comité saíra apoiando publicamente a compra porque do contrario non levaría a cabo as inversións prometidas, pero se o comité mostraba o seu apoio comprometíase a pagar as próximas dúas nóminas. Pero que clase de empresarios son estes?", cuestiona o delegado da CIG, quen apunta que "toda a información que nos chega deste grupo é alarmante".
Como mínimo, apunta Moskowich, o Ministerio terá que investigar a solvencia deste grupo empresarial e instar a Alcoa para que execute os compromisos de investimento nas fábricas. "Dicir que Parter incumpriu o acordo de venda parece a escusa perfecta para que Alcoa non se faga cargo das plantas", asevera.
Neste senso, critica tamén que Parter en todos os meses transcorridos dende a adquisición non dera ningún paso para a execución do plan industrial e do plan de investimentos anunciado e que o goberno español continúe sen aprobar un novo marco regulador da enerxía que sente as bases para unha tarifa industrial máis xusta, estábel e competitiva.
Diante desta absoluta incerteza e con este máis que cuestionábel grupo empresarial á fronte das plantas, os traballadores e as traballadoras de Alcoa da Coruña teñen que volver ás rúas para defender os seus empregos e un plan industrial viábel que permita retomar a actividade produtiva.