Convocan folga na CRTVG contra o desmantelamento do servizo público

Realizarase por franxas horarias de 2 horas por quenda a partir do día 20

Nacional -

O comité intercentros da CRTVG chama á folga ás traballadoras e traballadores do medio público a partir do martes, día 20 de novembro. O paro realizarase por franxas horarias de 2 horas por quenda durante os días 20, 22, 24, 26, 28 e 30 de novembro e o 2 de decembro. A folga abrangue a todos os centros de traballo do territorio galego.

Os obxectivos da convocatoria de folga resúmense en 12 puntos:

- Recuperación da produción propia interna da CRTVG.

- Supresión da externalización da produción e dos servizos.

- Negociación da dimensión do cadro de persoal necesario para a prestación do servizo público en todos os centros de traballo.

- Garantía de mantemento do emprego.

- Fin da contratación mercantil e de colaboradores/as que encobren relacións laborais ordinarias.

- Fin da utilización fraudulenta da contratación en prácticas e da desviación da natureza dos contratos de formación e FEUGAS.

- Fin da política represiva

- Erradicar a manipulación informativa da CRTVG

- Cumprimento da Lei 9/2011 de Medios Público de Comunicación Audiovisual de Galiza: creación do Consello de Informativos e Estatuto Profesional.

- Exercicio dos dereitos de conciliación da vida laboral e familiar segundo o artigo 33.4 do convenio colectivo.

- Negociación efectiva do Plan de Igualdade.

A convocatoria de folga coincide cun momento de mudanza no ente público, cuxa implantación tivo xa como consecuencia a supresión do Diario Cultural, na Radio Galega, e das desconexións territoriais para a emisión de información local amparándose na dixitalización e a transversalidade dos contidos audiovisuais. Unha mudanza para a que o Director Xeral da CRTVG, Alfonso Sánchez Izquierdo, xa adiantou que virá acompañada de flexibilidade organizativa e laboral.

Segundo explica o representante da CIG, Tiago Alvite, esa “flexibilidade organizativa e da xestión apunta para unha colaboración público-privada” son pretexto de “fortalecer os espazos de comunicación nacionais e locais fronte aos operadores globais”.

Ao entender de Alvite isto terá como consecuencia “escamotear o control público, en detrimento do interese xeral” e incidirá no “desmantelamento do próprio servizo público de comunicación audiovisual” que xa viña denunciando o persoal da CRTVG.

Alvite advirte que isto provocará tamén “perda de direitos laborais e precariedade”, repercutindo nunha perda de calidade da propia información. Por iso defende un modelo audiovisual no que a radio e a televisión de Galiza non dependan do goberno de turno, fortalecer aquelas características diferenciais que as dotan dun valor acrecentado fronte as cadenas de xestión privada, facendo un maior esforzo na procura da variedade, a inovación e a calidade.

Medios públicos nos que estea garantido o dereito de acceso dos grupos sociais e políticos; a participación da sociedade nas decisións e que a adaptación ao novo contexto dixital veña acompañada da necesaria dotación de recursos económicos, materiais e humanos.

Volver