O persoal dos centros de Política Social mobilízase en demanda de melloras laborais
O persoal de residencias de atención directa da consellaría de Política Social concentrouse esta mañá diante de todos os centros e traballo, nunha xornada de loita nacional, para denunciar que levan 11 semanas reclamando negociación sen que se recibira resposta algunha da consellaría de Política Social, que se nega a atender e sequera falar das condicións laborais. As mobilizacións repetiranse todos os xoves até conseguir que a consellaría sente a tratar estas demandas.
Para as organizacións sindicais convocantes “é unha cuestión de xustiza e de necesidade urxente, porque os centros e o persoal teñen que estar preparados ante unha nova onda vírica e porque non se pode seguir a sobrecargar así, abusando dun servizo ao límite”.
Demandan, entre outras cuestións, a devolución dos artigos do convenio recortados en 2012, que provocaron a perda de máis de 700 traballadoras e traballadores. Queren que os contratos a tempo parcial se transformen en contratos a xornada completa; que haxa persoal suficiente para garantir a mellor prestación do servizo; que se incrementen as prazas públicas de xestión directa e que se poña fin á precariedade no sector público. Cuestións que, entenden favorecerán un servizo públicos e de calidade.
Descansos mínimos
Xunto a isto queren poder gozar de dous días ininterrompidos de descanso semanal, librar a metade de domingos e festivos alternos en cómputo anual e a súa compensación en tempo. Deste xeito rebaixaríase a carga de traballo e posibilitaríase a contratación de máis persoal.
Ademais exixen que en cada centro se dispoña do material para equipos de protección suficiente, tanto para unha situación normal, como para unha de illamento.
