O cadro de persoal de Clesa acepta o preacordo e desconvoca a folga prevista para o 2 de maio

A CIG rexeita as modificacións das condicións de traballo pactadas coa dirección da empresa do grupo CLUN

Caldas de Reis -

O cadro de persoal de Clesa, compañía do grupo CLUN dedicada á elaboración de produtos lácteos con sede en Caldas de Reis, aceptou o pasado venres o preacordo entre a empresa a representación sindical e decidiu desconvocar a xornada de folga prevista para o vindeiro xoves 2 de maio. Dende a CIG rexeitan as modificacións das condicións de traballo pactadas coa dirección e critican a actitude de CCOO e UGT, que aceptaron a proposta antes de que a asemblea de traballadores/as lle dese o visto bo.

Foi a propia dirección de Clesa a que solicitou unha reunión urxente co comité de folga o pasado xoves, xuntanza que rematou pasada a media noite cun preacordo que ratificaron CCOO e UGT. Dende a central critican a actitude dos sindicatos estatais, “xa que asinaron apresuradamente un preacordo sen previamente comunicar as novas medidas en asemblea ao persoal traballador”. 

A CIG critica que CCOO e UGT asinasen o preacordo antes de que fose ratificado pola asemblea de traballadores/as

Ademais, consideran que se debera de manter enriba da mesa por máis tempo a convocatoria de folga até que a asemblea de traballadores ratificase ou non o preacordo e continuar coa presión mobilizadora, “que foi a que fixo mover as posturas iniciais da empresa”.

A central cualifica de “insuficientes” as medidas pactadas, ao tempo que entender que causarán indefensión xurídica ao persoal traballador que xa aceptou individualmente as modificacións e a ampliación da xornada laboral aos sábados de xeito indefinido. Tamén consideran excesivo que esta medida vaia estar vixente durante dous anos, “ademais de romper coa conciliación laboral e familiar”.

O acordo con Clesa contempla a ampliación do importe do complemento por dispoñibilidade en días festivos, que pasa de 45 a 60 euros. A empresa comunicará a modificación dos cuadrantes das quendas de cada persoa traballadora, “pero este cuadrantes non cobren a totalidade de rotacións necesarias, e co persoal actual varias das seccións non se dan cuberto, como mantemento, tratamento e outras seccións do persoal de fabricación. Ademais, a empresa non aportou toda a documentación solicitada.

Volver