• Nova

Manifestación para esixir solucións ás problemáticas laborais que padece o persoal de Vitrasa

A marcha terá lugar este xoves 19 dende o cruce dos Choróns ás 19:00 horas
Vigo - 18 Mai 2022

O persoal de Vitrasa, concesionaria do servizo de transporte urbano do Concello de Vigo, percorrerá as rúas da cidade en manifestación este xoves 19 de maio para reclamar unha solución ás diferentes problemáticas laborais que vén padecendo dende hai anos.
Segundo explican dende a representación sindical, un destes problemas ten que ver coa inaplicación do convenio que a empresa pretende impoñer para reducir os salarios e os dereitos laborais, de xeito que os soldos reduciranse un 30% no que queda de ano en un 14% en 2023.

Con esta mobilización tamén queren denunciar o recorte de servizos que a empresa está a levar a cabo dende hai meses, “o que provoca que o que debera ser un servizo público de calidade sexa nestes momentos totalmente deficiente”. 

O comité anima o cadro de persoal e a veciñanza a participar na manifestación

Neste senso, critican que Vitrasa pense unicamente na obtención de beneficios á hora de xestionar o transporte urbano, “o que incide directamente no mal servizo que se está ofrecendo”. Con todo, a dirección estalle a reclamar ao Concello “cantidades desorbitadas por un servizo insuficiente”.

Por todo isto, dende o comité de empresa animan o cadro de persoal e o conxunto da veciñanza a participar na manifestación que arrincará do cruzamento dos Choróns ás 19:00 horas e rematará no farol de Urzaiz.