O TSXG anula os servizos mínimos da Xunta para a folga do 061 por abusivos
O Tribunal Superior de Xustiza de Galiza vén de anular a orde de servizos mínimos decretados pola Xunta para a folga de persoal estatutario da Central de Coordinación de Urxencias Sanitarias de Galiza-061 por consideralos abusivos. Impón ademais á administración costas procesais na contía máxima: 1.500 euros.
A sentenza, que vén de facerse pública, é para Mario Otero, presidente da Xunta de Persoal moi satisfactoria a pesar de que “chega despois de 3 meses do fin da folga”. En todo caso Otero agarda que, “xunto coa sentenza do persoal de Grupo Norte, esta sirva para que definitivamente a Xunta de Galiza deixe de impor servizos mínimos abusivos de forma sistemática, intentando anular o dereito efectivo a folga”.
O TSXG lembra unha sentenza anterior na que “si se considera desproporcionado fixar, como servizos mínimos o 100% dunha xornada de traballo normal, no caso das operadoras telefónicas. A fixación de servizos mínimos non pode verse xustificada polo feito de xestionar as situacións de emerxencia. Unha xornada de folga non pode convertese precisamente na xustificación dese 100%, pois esta porcentaxe baleira de contido o dereito de folga, ao alcanzar o nivel de rendemento habitual”.
E engade que “coa determinación dos servizos mínimos nun 100% o que se pretende é que este servizo se preste de forma habitual e con iso, tal e como indica a sentenza do Tribunal Supremo de 3 de febreiro de 2015 (recurso 156/2014), estase cerrando o paso a que a folga poida afectar ao persoal do Centro de Emerxencias, o cal non é aceptable, pois supón baleirar de contido o dereito de folga en relación cos servizos que se prestan…”
Ademais, o TSXG considera que nin sequera foi debidamente xustificada a imposición destes mínimos, cuestión que é preceptiva porque “non se aportan datos, feitos, elementos ou estudos concretos que poidan servir de apoio para a determinación do 100%”.
Por iso conclúe que “debe prosperar o recurso porque non consta unha motivación axeitada que xustifique o 100% dos efectivos que se fixan como servizos mínimos”.
