Os datos da EPA do terceiro trimestre evidencian os graves problemas estruturais do mercado laboral galego

Cada ano os datos da Enquisa de Poboación Activa (EPA) do terceiro trimestre (xullo, agosto e setembro) reflicten unha mellora no comportamento do mercado laboral derivado do marcado carácter estacional do emprego, baseado en actividades ligadas ao turismo, como a hostalaría e o comercio. Mais ao debullar polo miúdo estes datos observamos os graves problemas estruturais que caracterizan o mundo do traballo no noso país: aumento da poboación activa de máis de 45 anos e descenso da poboación ocupada na industria e na construción, sectores con mellores condicións laborais e salariais.

Polo que respecta á poboación activa, as mulleres sustentan o aumento rexistrado neste trimestre, mentres que descende entre os homes. Trátase maioritariamente de mulleres maiores de 45 anos, o que agrava un dos principais problemas estruturais do mercado de traballo: o avellentamento da poboación activa, xa que máis do 58% da poboación activa supera os 45 anos de idade. 

Ao mesmo tempo, salienta o feito de que a taxa de actividade galega é un 5,4% inferior á taxa media estatal, o que está axudando a conter o índice de desemprego en niveis máis baixos que a media estatal. “O paro descende en Galiza por avellentamento da poboación e como consecuencia da emigración da xente nova e sobrecualificada para un mercado laboral precario como o noso”, tal e como sinala o secretario confederal Negociación Colectiva, Emprego e Industria da CIG, Paco Sío.

Os datos amosan que aumenta o número de persoas dispostas a traballar (poboación activa), mais a economía galega non consigue xerar empregos a un ritmo suficiente para impedir a suba do paro entre as mulleres, que son as máis castigadas pola contratación temporal e a tempo parcial nos sectores máis precarizados.

Salvo un insignificante incremento do emprego no sector primario (100 persoas), todo o emprego xerado no terceiro trimestre concéntrase no sector servizos, e dentro deste nas actividades ligadas ao turismo (hostalaría, comercio, etc.).

Poboación ocupada segundo sectores.

Fonte. EPA. INE.

Este tipo de empregos provocan un medra da temporalidade na contratación, polo que descenden as persoas asalariadas con contrato indefinido e aumentan as de contrato temporal (a taxa de temporalidade medrou 0,6 décimas). “Se ben o aumento da poboación activa foi feminina, o medre da ocupación foi maior entre a os homes, o que afectou ás taxas de paro, cun incremento da taxa de paro feminina dun punto, o paro feminino por riba do masculino”.

Taxa de paro segundo sexo.

Fonte. EPA. INE.

Para o responsábel sindical, o descenso da poboación ocupada no sector industrial é un dos elementos máis preocupantes, “xa que vén de man dunha grave crise no sector da automoción que a Xunta non foi quen de atallar pese aos continuos avisos da nosa federación de Industria e do conxunto dos representantes sindicais das empresas; unha perda de emprego industrial á que non lle vemos fin e que a bo seguro se vai agudizar nos vindeiros meses, o que demostra a incompetencia do Goberno de Rueda e da Consellaría de Industria”.

Sío tamén pon o foco sobre a perda de 7500 persoas ocupadas na construción nun período que historicamente non se caracteriza pola perda de postos de traballo, o que contradí as continuas queixas da patronal do sector a respecto da falta de man de obra. “Unha patronal incapaz de sentarse a negociar un convenio galego que mellore as condicións laborais e volve facer da construción un sector atraínte para a clase traballadora”.

• datos EPA
• EPA