• Nova

Persoal de Froiz en Ourense mobilízase contra a baixada de soldos e o incumprimento do rexistro de xornada

A concentración, convocada pola CIG, tivo lugar diante dun establecemento da rúa Concordia
Ourense - 20 Set 2019

Un grupo de persoas traballadoras da cadea de supermercados Froiz de Ourense participou hoxe na concentración convocada pola CIG diante dun establecemento da rúa Concordia para rexeitar a intención da empresa de rebaixar os salarios e para denunciar o incumprimento do rexistro de xornada.

Dende a CIG-Ourense explican que preto de 250 persoas empregadas de Froiz en Ourense poden ver rebaixado o seu salario entre 60 e 120 euros mensuais, xa que a dirección pretende que acepten a retirada do plus de produtividade. Ademais, a empresa está a incumprir a lexislación en materia de rexistro de xornada.

Neste senso, sinalan que todo o persoal de Froiz realiza na actualidade unha xornada laboral superior ás 40 horas semanais, “pero ante a obriga legal de rexistrar a xornada a empresa está intentando que siga a ser de 45 horas, rexistrando unicamente as 40 que establece o convenio”.

Ao mesmo tempo, denuncian que Froiz está a presentarlle ás persoas traballadoras un documento no que “declaran voluntariamente estar de acordo coa retirada do concepto de produtividade que viñan percibindo na nómina mensualmente”. A presentación do documento vai acompañado da “insistente presión” do departamento de recursos humanos para que sexa firmado.

Calendario de protestas

“En caso de negativa chaman a unha testemuña para que asine estar presente na entrega, polo que nos atopamos non só ante un grave incumprimento da lexislación e do convenio, senón tamén dun burdo e soez intento de rebaixar un salario que o persoal xa tiña consolidado, todo ben aderezado con ameazas e presións”.

Diante disto, a CIG está a denunciar na Inspección de Traballo os feitos, e vén de anunciar que acudirá ao xulgado do Social a defender as condicións económicas adquiridas, “ademais de convocar mobilizacións para denunciar publicamente o que acontece”. A primeira das protestas tivo lugar este venres diante do Froiz da rúa Concordia de Ourense ás 11:00 horas, onde despregaron cartaces denunciando que a empresa “Presiona e ameaza”, “Minte” e “Destrúe emprego” e berraron consignas en defensa dos seus dereitos laborais e contra a actitude da dirección.