Persoal do sector da hostalaría da provincia da Coruña clama por unhas condicións dignas
Persoal do sector da hostalaría da provincia da Coruña mobilizouse onte no peirao Calvo Sotelo, coincidindo coa celebración do evento gastronómico The Champions Burger, para denunciar o bloqueo das negociacións do convenio colectivo por parte da patronal do sector, que se nega a pactar melloras laborais e pretende recortar dereitos como o complemento de Incapacidade Temporal (IT).
Dende as centrais convocantes da protesta -a CIG, CCOO e UGT- sinalan que mentres o sector hostaleiro medra en Galiza “a pasos de xigante,” grazas a que se rexistran máis visitantes “que nunca”, e as empresas baten récords de facturación e benefícianse do aumento dos prezos, “o persoal segue a loitar para non perder o pouco que ten”.
Neste senso, lembran que a negociación do convenio provincial, que debera de comezar en xaneiro de 2025, está bloqueada pola patronal, “que actúa con prepotencia e desprezo, negándose a mellorar as condicións laborais e querendo recortar dereitos básicos”.
Entre outras cousas, pretende eliminar o complemento IT, que garante o 100% do salario durante a baixa ao longo de 12 meses. “Isto é un ataque directo ás nosas familias e á nosa seguridade”, censuran. Unha situación non é casual, xa que “o empresariado busca negociar a longo prazo para evitar pagar atrasos, mentres enche os petos cos récords turísticos e o aumento desmesurado dos prezos”.
Fronte a isto, reclaman salarios dignos, que teñan en conta a inflación e o crecemento do sector, unhas condicións laborais que respecten a saúde e os dereitos e xornadas xustas e conciliación real.
