Posición galega sobre o proceso electoral do 6 de decembro en Venezuela

Galiza contra a inxerencia imperialista

Internacional -

En setembro rexeitamos taxativamente as terxiversadas e tendenciosas conclusións dun “informe” promovido polo Consello de Dereitos Humanos da ONU, por carecer da máis mínima credibilidade, por ser unha monumental fraude. Nestes dous meses constatamos o acertado diagnóstico e denuncia realizada.

A contundente vitoria do MAS nas eleccións en Bolivia, o multitudinario voto afirmativo para mudar a constitución pinochetista na consulta realizada en Chile, a crise institucional en Perú, a perda de credibilidade de Bolsonaro,e a recente derrota electoral de Trump nos Estados Unidos, teñen contribuído a aliviar a presión imperialista contra a Revolución Bolivariana.

Se os fracasos golpistas e as frustradas tentativas de intervencións militares contra o lexítimo goberno de Nicolás Maduro constatan os apoios populares ao proceso, a guerra económica contra a Venezuela segue endurecéndose.

O bloqueo internacional promovido polos Estados Unidos e a Unión Europea, continúa inalterábel provocando estragos nas condicións de vida do pobo traballador venezolano. O acaparamento, a sabotaxe, as restricións na produción industrial e limitación na distribución e tránsito de mercadorías, son os principais responsábeis polo desabastecemento de bens de consumo esenciais.

A iniciativa do Encontro Mundial contra o Imperialismo da Galiza, as organizacións e forzas políticas, sindicais e entidades sociais abaixo asinantes, solicitamos á comunidade galega residente en Venezuela e aos emigrantes venezolanos no noso país, que o 6 de decembro apoien as candidaturas chavistas e bolivarianas nas eleccións lexislativas para renovar a Asemblea Nacional.

Unha contundente vitoria electoral chavista e bolivariana é a mellor garantía para imposibilitar que o imperialismo e os seus aliados da oligarquía local, podan reinstaurar en Caracas un goberno monicreque ao servizo dos monopolios e as multinacionais.

O Encontro Mundial contra o Imperialismo da Galiza apela ao conxunto das forzas políticas, sindicais e sociais da Galiza, a activar a solidariedade internacionalista co pobo da Venezuela e a Revolución Bolivariana, perante as cada vez máis graves agresións políticas e diplomáticas, as ameazas de intervención militar, a que está sendo sometida polo imperialismo.

Alertamos o pobo traballador galego a non deixarse manipular pola desinformación, a estar alerta perante a axenda golpista que pretende deslexitimar a transparencia do proceso electoral do 6 de decembro.

Encontro Mundial contra o Imperialismo da Galiza

  • A Gentalha do Pichel
  • Agora Galiza-Unidade Popular
  • Bloque Nacionalista Galego
  • Centro Social O Fuscalho
  • Confederación Intersindical Galega
  • Erguer Galiza
  • Estudantes Antifascistas
  • Federación Rural Galega
  • Fundación Moncho Reboiras
  • Fundaçom Artábria
  • Galiza Nova
  • Isca!
  • Mar de Lumes. Comité Galego de Solidariedade Internacionalista
  • Marcha Mundial das Mulleres - Galiza
  • Plataforma Antifascista Galega

 Galiza, 4 de decembro de 2020

 

Volver