Dentro do calendario de mobilizacións acordado para este mes de agosto, os traballadores e as traballadoras de COMFICA e Indra, contratas de R, desenvolven este martes unha nova xornada de folga de 24 horas e un paro laboral de 3 horas, respectivamente, en defensa dos empregos e contra o proceso de traslado de servizos iniciado por Euskaltel, propietaria de R Cable. Para dar visibilidade as súas reivindicacións e informar á cidadanía das consecuencias desta decisión empresarial, o persoal realizou unha concentración esta tarde diante do edificio que R ten na rúa Real da Coruña.

Os traballadores/as de Poligal continuaron este mércores as protestas diante da Xunta de Ferrol para esixir información clara sobre os posíbeis grupos interesados en retomar a actividade na fábrica de Narón, pois pasan as semanas e seguen sen chegar novas das xestións feitas na mesa de traballo do IGAPE. ‬Mención aparte merece o desinterese absoluto amosado polo Goberno español ante o peche e a deslocalización doutra industria nesta comarca, pois meses despois da reunión co director xeral de Industria nada se sabe das xestións que se comprometeu a realizar.