A CIG chama a participar nas concentracións de Galiza pola Paz contra as agresións imperialistas e a escalada bélica

A CIG chama a participar nas concentracións que a Plataforma Galiza pola Paz ten convocadas para este xoves, 26 de xuño, nas sete cidades en defensa da paz, e en repulsa á agresión imperialista inxustificada dos EUA sobre Irán que compromete, tamén, o noso futuro. A Plataforma, da que a CIG fai parte, insta a mobilizar esforzos pola resolución diplomática do conflito, evitando a escalada bélica, exixe a paralización do incremento do gasto militar e que o respecto ao dereito internacional "que garanta a paz en base ao dereito dos pobos ao exercicio da súa soberanía sen inxerencias".

A seguir reproducimos o comunicado de Galiza pola Paz:

Diante da gravidade dos recentes ataques dos Estados Unidos contra o Irán, da Plataforma Galiza pola Paz queremos subliñar os seguintes aspectos:

1. Os ataques estadounidenses constitúen unha agresión imperialista e unha provocación que abre a porta a unha escalada bélica de proporcións difíciles de medir e máis un paso na renuncia á diplomacia e á negociación en favor do uso da forza.
2. Estes ataques foron realizados respondendo principalmente aos intereses dos Estados Unidos e de Israel e do resto de potencias occidentais, sen contar nin sequera consultar coas Nacións Unidas, e sen que mediase agresión previa por parte de Irán que, antes ao contrario, viña de recibir os ataques previos do estado sionista de Israel que iniciaron esta escalada.
3. Este tipo de agresións inciden de novo na impunidade que a autoproclamada comunidade internacional garante. Ninguén está a exixir responsabilidades aos Estados Unidos e a Israel. A Unión Europea limítase a pedir contención a Irán en relación á súa posíbel resposta, pero non o fixo cando os Estados Unidos ameazaron con lanzar estes ataques. 
4. Este novo paso cara a unha guerra rexional dáse no marco do xenocidio palestino e das sucesivas agresións ao Líbano, ao Iemen ou á Siria por parte de Israel.
5. Estes ataques tamén se dan no contexto do mal chamado “rearme” das potencias occidentais onde a UE pretende mobilizar 800mil millóns de euros seguindo á doutrina exterior norteamericana e da OTAN que, como se comproba ao longo da historia, é netamente agresiva.

Exiximos do goberno do Estado español e do goberno galego a condena desta agresión dos Estados Unidos a Irán e que mobilicen esforzos pola resolución diplomática do conflito, evitando a escalada bélica.

Especificamente, no caso do Estado, exiximos a paralización de todo incremento do gasto militar, a denegación do espazo aéreo e das bases militares ao servizo da OTAN para calquera tipo de colaboración con esta agresión e a inmediata retirada da fragata Méndez Núñez, con base no arsenal militar de Ferrol e que neste momento participa nun grupo de combate con buques británicos e norteamericanos na zona.

Débese exixir o respecto ao dereito internacional que garanta a paz en base ao dereito dos pobos ao exercicio da súa soberanía sen inxerencias, na Asia Occidental e en calquera outra parte do mundo.

Por todo isto chamamos ao pobo galego a se mobilizar o vindeiro xoves 26 nas sete cidades galegas pola paz e en repulsa desta agresión inxustificada que compromete, tamén, o noso futuro.

Non á guerra, Galiza pola Paz.

• belicismo
• Estados Unidos
• Galiza pola Paz
• guerra
• imperialismo