• Nova

Mobilización nas oficinas de Samaín polo despedimento de dúas traballadoras do SAF de Chantada

A CIG reclama tamén á empresa do Grupo Clece que aplique a suba salarial do 6,5% pactada en convenio
Chantada - 01 Xul 2022

Traballadoras do Servizo de Axuda no Fogar do Concello de Chantada concentráronse no día de onte, xoves, diante das oficinas de Samaín Servizos á Comunidade (do Grupo Clece) para esixir a readmisión de dúas compañeiras e denunciar a persecución que está a sufrir o persoal cando cae de baixa médica.

Na concentración, convocada pola CIG, rexeitáronse os falsos argumentos da empresa, xa que as dúas traballadoras foron despedidas por baixo rendemento estando de baixa e sen ter traballado nin un só día na nova adxudicataria, debido a que cando Samaín se fixo coa concesión e se subrogou ao persoal, estas dúas compañeiras xa estaban en situación de IT.

O responsábel da CIG de Monforte, Xosé Manoel Silva, subliña que a actuación de Samaín carece de xustificación, tal e como se evidenciou nos xulgados, pois unha das traballadoras xa ten sentenza do TSXG que declara a improcedencia do despedimento, mentres que a outra está pendente de sentenza do mesmo tribunal. Por iso, Silva entende que con estas rescisións Samaín pretende lanzar un aviso ao resto de traballadoras co obxectivo de amedrentalas e que non collan baixas médicas.

Incremento salarial

Pero ademais, con esta concentración tamén se reivindicou do Grupo Clece que cumpra co estabelecido no convenio colectivo e proceda a aplicar de inmediato a suba salarial do 6,5%, correspondente ao IPC real de 2021. Aínda que o convenio de Axuda no Fogar está sen actualizar dende hai dez anos, o articulado contén unha cláusula de revisión automática referenciada no IPC, polo que as empresas teñen que aplicar este incremento anualmente. Samaín é unha as compañías que aínda non fixo efectiva a suba do 6,5%.

De igual maneira reclamouse o incremento do prezo da quilometraxe, xa que cos prezos actuais (0,18€ por quilómetro) e o medre imparábel dos combustíbeis, "está sendo unha desfeita para os petos das traballadoras". Cómpre lembrar que as traballadoras do SAF traballan nos domicilios privados das e dos usuarios aos que se teñen que desprazar nos seus vehículos particulares.

Diante dos incumprimentos das empresas, a CIG-Servizos ten en marcha unha campaña nacional para exixir a actualización dos salarios e a dignificación das condicións laborais e económicas das profesionais do SAF.