Delegadas do comercio vario péchanse na CEC para demandar un acordo interprofesional que blinde os convenios provinciais
Un grupo de delegadas do comercio vario realizaron este mércores un encerro simbólico na Confederación de Empresarios/as da Coruña para demandarlle á federación provincial que atenda a petición de reunión e sente negociar un acordo interprofesional que blinde a prioridade aplicativa do convenio da Coruña fronte ao convenio estatal de ARTE que se está a negociar en Madrid. O peche iniciouse pouco despois das 13 horas e preto das 19:30 horas, e coa sede patronal xa pechada ao público, as traballadoras decidiron levantar a medida de presión ante a advertencia de seren desaloxadas pola forza pola policía se non abandonaban o local..
Nun breve encontro mantido ao incio do peche, unha representante da patronal trasladoulles a postura da CEC "que di representar xa só pequeno comercio e lávase as mans neste conflito", explica Lucía Domínguez, delegada da CIG. "Tamén nos cominou a protestar diante de Inditex, algo que aínda fixemos este pasado luns, e indignouse ante as nosas acusacións pola evidente obediencia da patronal provincial aos ditados de Inditex".
Non obstante, a acción protesta rematou sen ningunha data de reunión para abordar a posibilidade de asinar un acordo marco "nin tampouco para renovar o convenio provincial, que caducou o 31 de decembro, que é xusto o que quere Inditex para impor o convenio estatal, moi inferior en condicións", crítica Domínguez.
Mobilizacións contra un convenio estatal para precarizar o sector
Esta acción de protesta enmárcase no intenso calendario de mobilizacións e folgas que as traballadoras e traballadores do sector veñen realizando en resposta ás pretensións da gran patronal do téxtil e do calzado (agrupadas na patronal ARTE) de impor un convenio estatal que suporía un retroceso de 20 anos nos dereitos laborais e salariais acadados polo persoal nos sucesivos convenios de comercio vario da Coruña.
Para evitar este empobrecemento dos salarios e a precarización do traballo, a CIG estalle solicitando reunións ás diferentes patronais provinciais do comercio para iniciar a negociación dun acordo interprofesional que protexa os convenios provinciais das inxerencias da negociación estatal, na mesma liña que xa asinou a patronal vasca. Porén, a patronal galega négase a avanzar nun marco propio, que permite e avala a lexislación vixente, sendo a patronal coruñesa a máis reticente neste aspecto.
Neste senso, as delegadas da CIG chaman a atención sobre o feito de que o vicepresidente de ARTE é o director de relacións laborais de Inditex, e que esta multinacional é quen controla a patronal que negocia o convenio provincial.
Critican esta postura intransixente do empresariado galego e reiteran que o realmente persegue ese futuro convenio estatal de ARTE “é impoñer condicións uniformes que van a ser moito peores para o noso comercio, formado maioritariamente por pequenas e medianas empresas galegas, e non grandes corporacións multinacionais que solo buscan un maior beneficio a costa de recortar os dereitos das traballadoras e traballadores do sector”.
O próximo luns está prevista unha nova reunión da mesa estatal e as traballadoras e traballadores xa adiantan que continuarán defendendo os seus dereitos e unhas condicións xustas.
