![Confederación Intersinidical Galega](/assets/cig/2022/logos/cig.png)
Delegadas/os da CIG esixen un reforzo de persoal para afrontar "a brutal carga de traballo" nos supermercados
![](assets/images/c/20-12-11_ConcentracionContratacion_GadisACorunha_01-f2feeccc.jpg)
A CIG-Servizos desenvolveu este venres unha xornada de mobilizacións diante de distintos supermercados de Gadis, Froiz, Eroski e Mercadona da comarca da Coruña para esixir un reforzo dos cadros de persoal e poder afrontar así a "insoportábel sobrecarga de traballo" que se rexistra no sector dende o inicio da pandemia, agravada agora coas vendas do nadal, e que afonda nas xa precarias condicións laborais que arrastra o sector. As protestas terán continuidade os días 16 e 22 de decembro nas comarcas de Ferrolterra e Santiago.
![](imaxes/adaptadas/780/files/novas/2020/12/11/supermercados/20-12-11_ConcentracionContratacions_FroizBurgo_03.jpg)
A CIG-Servizos denuncia que a pesar do inmenso beneficio que están obtendo este ano as cadeas de alimentación e de que as traballadoras e traballadores do sector teñen consideración de esenciais, "as empresas en ningún momento garantiron un número suficiente de persoal nas tendas para atender como deberíamos esta gran responsabilidade. Tampouco tivemos acceso a formación axeitada, nin equipos de protección eficaces en todo momento, nin protocolos que se aplicasen correctamente ante o risco ao que estamos hiperexpostas", subliña María López, delegada da CIG no sector.
A representante sindical destaca que o persoal do comercio de alimentación ten cinco veces máis posibilidades de contaxiarse de Covid-19 pola contacto continuado coa clientela e ademais os aforos dos establecementos desbórdanse continuamente "pero as empresas non fan absolutamente nada por solucionalo".
![](imaxes/adaptadas/780/files/novas/2020/12/11/supermercados/20-12-11_ConcentracionContratacion_MercadonaAlvedro_03.jpg)
López critica que as empresas estean "escamoteando na contratación de novo persoal só para acumular máis ganancia", mentres as traballadoras e os traballadores teñen que facer "xornadas infinitas, con horarios alterados constantemente, descansos moitas veces inexistentes e soportando o brutal incremento do volume de funcións".
Un esforzo, engade María López, que afecta directamente á saúde física e psicolóxica das traballadoras, mais que tampouco se ve recompensado cunha mellora salarial "xa que as empresas queren todo o beneficio para elas".
Por iso, nas protestas deste venres lanzouse unha chamada á clientela para que apoien as reivindicacións do persoal "e se visibilice o noso sufrimento, deixen de seguir someténdonos a condicións laborais abusivas e que as empresas contraten o persoal de reforzo suficiente. Non cobramos de acordo o esforzo que facemos pero polo menos non queremos ter que perder a saúde no traballo".
Por un convenio digno no sector
![](imaxes/adaptadas/780/files/novas/2020/12/11/supermercados/20-12-11_ConcentracionContratacions_Eroski_Oleiros_2.jpg)
Con estas mobilizacións tamén se quere reivindicar un convenio de alimentación digno e que recolla melloras salariais e laborais, posto que no novo convenio provincial a patronal negouse a introducir ningunha mellora nas categorías e grupos profesionais, establecer descansos de fin de semana reais, establecer xornadas continuadas, rebaixar a xornada anula, reforzar a contratación indefinida, mellorar as vacacións ou incluír melloras salariais dignas de tal nome.
Para a negociación deste convenio, polo que se rexen grandes empresas como Gadis ou Froiz, acordárase unha plataforma reivindicativa conxunta que finalmente UGT e USO abandonaron para asumir a proposta da patronal.