Descenso da afiliación, baixa taxa de cobertura e elevada eventualidade reflicten a precariedade do mercado laboral

Descenso da afiliación á Seguridade Social e máis contratos asinados a pesar da evidente caída da actividade. Estes son algúns dos datos do paro rexistrado que reflicten a elevada precariedade e eventualidade que as reformas laborais instalaron no mercado do traballo e que as medidas adoptadas dende o inicio da pandemia están a afondar.

Os últimos datos do paro rexistrado sitúan o número de persoas en situación de desemprego en Galiza en 176.574, un 0,2% menos que no mes anterior -na media estatal o descenso foi do 0,69-; o que en termos absolutos significa 26.329 persoas menos.  Porén hai que ter en conta que o goberno segue sen contabilizar como desempregadas as persoas que están en situación de ERTE, polo que para ter unha imaxe máis acertada da realidade sociolaboral teríamos que sumarlle a esas 176.574 desempregadas/os, as 218.758 persoas que están nunha regulación.

Deste xeito, salienta o secretario confederal de Emprego e Industria da CIG, Francisco Xabier Cartelle, estaríamos falando de 395.392 galegas e galegos que nestes intres non están traballando e destas persoas tan só 127.390 perciben algunha prestación do SEPE. Neste punto fai especial fincapé na baixada do 1,6% na contía da prestación contributiva media, que nestes momentos está nos 792,3€/mes.

"As medidas tardías e inxustas postas en marcha polo goberno diante da pandemia teñen deixado no desemprego a gran cantidade de persoas, condenadas a subsistir na precariedade e na eventualidade", advirte. Cartelle denuncia, ademais, que é a propia clase traballadora a que ten que sufragar, vía cotizacións e impostos, as coberturas sociais, mentres que as empresas gozan de enormes bonificacións.

Xunto a isto, pon a atención nos miles de traballadores e traballadoras eventuais que dende o inicio da pandemia están no desemprego e que xa remataron a prestación, mais aos que non se lle dan solucións nin se lles aplican as condicións máis beneficiosas aprobadas para as persoas en ERTE. Ao tempo, continúan os problemas para o cobro das prestacións do persoal en ERTE, que nalgúns casos xa comezaron a consumir o tempo de desemprego.

Situación anómala do mercado laboral

Para avaliar os datos do paro rexistrado, hai que ter en conta tamén que a  situación anómala que estamos padecendo non permite unha comparación rigorosa dos datos con anos anteriores. Sirva como exemplo a evolución do sector servizos que, de maneira habitual, no mes de setembro sofre un forte repunte no desemprego a consecuencia da fin das contratacións ligadas ao período estival.

Como neste verán o número de contratacións foi moi escaso, agora a perda de emprego tamén resulta moito menor. De feito, a nivel sectorial o desemprego descendeu na industria (-4,46) e na construción (-2,79%), mentres que no sector servizos sufriu un leve incremento do 0,15%.

Como vén sendo habitual, a contratación rexistrada segue a ser maioritariamente temporal e dos 83.162 contratos rexistrados no mes de setembro tan só un 8,3% se rexistrou baixo algunha das modalidades de contratación indefinida.

É ás mulleres a quen máis está prexudicando no mercado laboral a nova situación, probabelmente pola falta de políticas de conciliación, pois as mulleres seguen a ser de xeito maioritario as que asumen as tarefas de coidados.

E malia o elevado número de contratos asinados e o descenso do paro rexistrado, a afiliación á Seguridade Social segue en caída, perdéndose 1.314 persoas afiliadas.

A nivel estatal a evolución é similar, incluso continuou descendendo o desemprego no sector servizos durante o mes de  setembro (-0,50%), cando tradicionalmente anotaba un importante incremento. Probablemente a maior contratación de persoal nalgunhas comunidades para reforzar o sistema sanitario e educativo por mor da covid19, compensou a caída na hostalería.

Un feito que non se está a dar en Galiza, "xa que a Xunta non está a contratar os efectivos de reforzo necesarios para afrontar a situación extraordinaria que vivimos, en ámbitos tan sensíbeis como a sanidade, o ensino, a atención á dependencia ou os servizos de limpeza, primando como sempre os criterios economicistas sobre o servizo público".

Necesidade dun Plan industrial e de aproveitamento dos recursos

Neste contexto, Francisco Cartelle reitera a necesidade de contar cun Plan Industrial para Galiza que garanta a actividade produtiva e xere emprego de calidade "e iso pasa por dar viabilidade a fábricas como Alcoa e Alu Ibérica, por adoptar medidas que garantan o futuro para as empresas electrointensivas, o sector naval ou do automóbil, e ofrecer alternativas claras ao proceso de descarbonización que vai camiño de ser un proceso de desmantelamento e destrución de emprego".

Xunto a isto, reclama a posta en marcha dun plan de aproveitamento sostíbel dos recursos naturais do país de xeito que creen valor engadido e que xeren emprego de calidade. Dúas medidas para reverter o traballo en precario xerado a consecuencia dunha lexislación laboral "que as últimas reformas foron flexibilizando e arrimando os intereses da patronal".

"Pero nin o goberno do Estado nin o da Xunta contan con estes plan para Galiza. E só tendo a soberanía precisa para dispor dos recursos e pensando no ben da maioría social poderemos recuperar dereitos para avanzar no benestar da clase obreira galega", conclúe.

• desemprego
• economía
• ERTE
• mercado laboral
• paro rexistrado
• reforma laboral