Folga e mobilización en dinahosting pola readmisión dun compañeiro despedido

O comité de empresa denuncia que a empresa pretende mandar un “aviso a navegantes”

Compostela -

O persoal de dinahosting secundaba esta mañá a xornada de folga, que daba comezo as 7:00 horas de hoxe e remata ás 7:00 horas de mañá, convocada polo comité de empresa en demanda da readmisión dun compañeiro cun despedimento disciplinario que consideran “absolutamente arbitrario e inxusto”. A folga fíxose sentir, sobre todo, no departamento de Soporte, precisamente no que desenvolvía a súa actividade este traballador.

“A empresa quería enviar un aviso a navegantes co despedimento deste compañeiro”, afirma o presidente do comité de dinahosting, Alexandre Espinosa. E é que o comité considera que o que levou á empresa a adoptar esta medida foi a recente loita polo convenio colectivo de empresa que esta decidiu deixar decaer unilateralmente, “unha loita na que o compañeiro se significou claramente”, mais tamén porque ía formar parte da candidatura da CIG para as eleccións sindicais.

Espinosa considera ademais que se o despedimento non se produciu antes foi porque o compañeiro estaba de baixa por ansiedade e agardaron a que regresara –el mesmo solicitou a alta- para efectivizala.

Sen reunión coa empresa

A pasada semana o comité de empresa solicitou unha reunión con dinahosting para tratar especificamente deste asunto pero dinahosting “simplemente contestou que estaba ben despedido”, explica o presidente. “A empresa non quere falar co comité deste tema, cando era vox populi que ía ir nas listas da CIG”.

Para Espinosa a actitude da empresa é “inadmisíbel” polo carácter “exemplarizante” deste despedimento e cualifica de “surrealista e falsa” nas súas conclusións a forma de xustificalo.

A esta xornada de folga chégase tras da convocatoria de numerosas mobilizacións convocadas polo comité, composto na súa totalidade por membros da central nacionalista, en demanda da inmediata readmisión do traballador.

Volver