Medra o desemprego en Galiza en todas as provincias e todos os sectores

O mes de outubro rematou en Galiza cun total de 181.307 persoas rexistradas como desempregadas no SEPE, un 2,68% máis que no mes de setembro, o que equivale a 4.733 novos parados e paradas. Chama a atención que porén, con respecto a febreiro, mes anterior ao confinamento, hai rexistradas 15.078 persoas desempregadas máis. Na media do Estado o medre foi inferior, do 1,31%, o que equivale a 49.558 persoas paradas máis, situándose o total en 3.826.043 persoas paradas.

Para a CIG estamos diante dunha situación moi preocupante porque o desemprego non deixa de se incrementar sen que se articulen medidas que permitan reverter a situación e paliar o medre da pobreza e da exclusión social.

Neste sentido, o secretario confederal de emprego, Fran Cartelle considera que mesmo o subsidio de 430 euros para persoas desempregadas que esgotaron as prestacións entre marzo e xuño é “claramente insuficiente” porque “non se ten en conta ás traballadoras e traballadores con contratos eventuais que foron despedidas ao comezo do estado de alarma, nin os fogares con todos so seus membros en paro”.

Renda de inserción laboral e social

Cartelle denuncia tamén o fracaso do chamado ‘ingreso mínimo vital’ e demanda a creación dunha renda de inserción laboral e social, na contía do SMI, para as persoas maiores de 18 anos que non cobren ningún tipo de prestación económica. Unha medida que se recolle no documento de “Propostas para facer fronte á crise para unha saída galega xusta” elaborado pola central sindical e que contempla facer un seguimento do itinerario persoal de orientación e formación profesional até a consecución dun posto de traballo no tempo máis breve posible.

A CIG defende ademais que, no caso de que a persoa cobrase unha prestación pública inferior ao SMI tería dereito a que se lle completase a diferenza.

O secretario confederal de Emprego insiste na urxencia de que se derroguen as reformas laborais e das pensións, “máis nun contexto como este”, para “evitar que as consecuencias económicas da pandemia non se intenten superar saqueando, novamente, á clase traballadora”.

Do mesmo xeito Cartelle reclama a inmediata recuperación das prestacións e subsidios por desemprego nos termos anteriores á reforma de 2012 porque “doutro xeito a pobreza seguirá medrando, cebándose especialmente coas persoas desempregadas”.

Os datos falan

O desemprego medrou en todas as provincias galegas aínda que Pontevedra foi a que sufriu o maior incremento neste último mes. Porén se comparamos co mes de febreiro, anterior xusto ao confinamento, é a provincia de A Coruña a que rexistra un volume maior no medre de desempregados/as.

En todos os sectores medrou tamén o desemprego neste último mes. O de Construción é o que presenta un mellor comportamento e Servizos onde se rexistra o medre maior. De feito, con respecto a febreiro, tan só na construción hai anotadas menos persoas paradas que antes do inicio da pandemia.

O medre da afiliación na provincia da Coruña en 2.229 persoas neste último mes, compensa a perda de afiliación no resto das provincias e fai que remate o mes con 218 persoas afiliadas de media neste último mes.

Con respecto ao mes de febreiro, a caída da afiliación é de 554 persoas.

Se ben neste último mes medrou máis o paro entre os homes que entre as mulleres, desde o inicio da pandemia, son as mulleres as que están sufrindo, en maior media, a lacra do desemprego.

No que atinxe a contratación, rexistráronse 73.100 novos contratos, dos cales tan só o 9,2% o fixeron baixo algunha das modalidades de contratación indefinida. Se se comparan os datos co mesmo mes do ano anterior, a caída da contratación foi do 31%; o que dá unha idea da menor actividade neste momento que fai un ano.

Malia este desolador panorama a Xunta de Galiza “segue ausente, sen arbitrar medida algunha de protección diante do gravísimo deterioro das condicións de vida das galegas e galegos e incapaz de articular políticas que freen a destrución de emprego consecuencia do alarmante desmantelamento de sectores industriais claves para o noso país e do abandono do noso sector primario”, conclúe Cartelle.

• 2020
• outubro
• paro rexistrado