O persoal do comercio irá de novo á folga o luns 11 de maio para rexeitar o convenio ARTE
A CIG ten convocada unha nova xornada de folga para o luns 11 de maio no comercio téxtil e de calzado das catro provincias galegas, no marco da loita contra o convenio ARTE (Asociación Retail Textil de España), a través do que a gran patronal busca recortar dereitos e centralizar as relacións laborais. A xornada coincide, ademais, cunha nova xuntanza da mesa de negociación en Madrid, prevista para ás 11:30h.
As traballadoras e os traballadores do sector dan así continuidade ao intenso calendario de mobilizacións e paros para rexeitar o preacordo asinado o 23 de marzo pola asociación ARTE (que agrupa ás grandes multinacionais como Inditex, H&M, Mango, Primark ou Tendam) e os sindicatos CCOO e Fetico.
Con motivo da folga, realizaranse as seguintes mobilizacións:
- A Coruña: ás 12:00 horas, manifestación dende a Praza de Lugo até o CC Catro Camiños.
- Compostela: ás 09:30 horas, manifestación dende a Praza Roxa até a Praza de Galiza e ás 12:30 horas manifestación dende a Praza de Galiza até As Cancelas.
- Ferrol: ás 12:00 horas, manifestación dende a porta principal do CC Odeón.
- Lugo: ás 12:00 horas, concentración no CC As Termas.
- Ourense: ás 11:00 horas, mobilización dende a Casa Sindical até Zara da rúa do Paseo.
- Pontevedra: ás 11:00 horas, concentración diante de Mango Muller.
- Vigo: ás 11:00 horas, manifestación dende o Cruce de Gran Vía até Príncipe e ás 17:30 horas, manifestación dende Vialia até Príncipe.
Demanda dun acordo interprofesional galego
A CIG-Servizos advirte que a sinatura definitiva deste convenio estatal significaría a desaparición ou a redución ao mínimo das negociacións provinciais; conxelar durante anos as condicións laborais e salariais do persoal que xa está contratado; e a precarización daquelas persoas que se vaian incorporando ao sector, xerando condicións dispares entre persoas da mesmo centro que realizan as mesas funcións.
Polo tanto, o convenio impulsado por ARTE non só afectará ao persoal das grandes empresas do téxtil e do calzado, senón que terá consecuencias sobre as condicións laborais das persoas empregadas no pequeno comercio, que verán como desaparecen aos poucos ou se negocian á baixa os seus convenios de referencia.
De aí que con este paro de 24 horas tamén se lle reclame á patronal galega do comercio que sente negociar un acordo interprofesional de ámbito autonómico que blinde os convenios provinciais e garanta a súa prioridade aplicativa sobre o marco estatal. A CIG-Servizos xa trasladou en dúas ocasións esta petición por escrito á CEG que, de maneira teimuda e na liña contraria á seguida pola patronal vasca, nega a posibilidade dun acordo galego.
Precisamente, no día de onte, a CIG solicitoulle por escrito ás catro asociacións patronais provinciais do comercio manter reunións con cada unha delas, abordar o estado da negociación colectiva e avanzar nun marco galego que protexa os dereitos conquistados polas traballadoras e traballadoras a través dos convenios provinciais.
E neste contexto, foi que un grupo de persoas delegadas do comercio permaneceron pechadas onte na sede da Confederación de Empresarios/as da Coruña para reiterarlles esta demanda; mais atopáronse de novo cunha negativa e mesmo co total desinterese da CEC por iniciar a negociación do convenio de comercio vario da Coruña, que caducou o 31 de decembro e hai que renovar.
Recorte de dereitos
Neste senso, a CIG-Servizos lembra que, con respecto aos actuais convenios provinciais, as condicións recollidas no preacordo ARTE suporían unha rebaixa salarial de entre 2000 e 3000 euros/ano -dependendo da categoría- na Coruña e Pontevedra; a desaparición do complemento de antigüidade para o persoal de Lugo e Ourense; e a perda do complemento de permanencia na Coruña.
Ademais, estabelécese a obrigatoriedade de traballar nos domingos e festivos de apertura; a planificación de horarios e calendarios redúcese a cinco semanas de antelación; recupérase a categoría de persoal axudante dependente durante 15 meses; autorízase a contratación fixa-descontinua a tempo parcial; e os 15 de minutos de descanso diarios deixarían de computar como tempo efectivo de traballo.
Na última reunión, ARTE trasladou o resto da súa proposta que contempla importantes recortes no completo de IT por enfermidade común e a creación de comités intercentros estatais en cada empresa, coa finalidade de reducir a capacidade reivindicativa en cada provincia.
Ámbito de afectación da folga
Na provincia da Coruña a convocatoria de folga atinxe ao conxunto do persoal do comercio vario, mentres que en Pontevedra, Ourense e Lugo afecta ao persoal das empresas asociadas á patronal ARTE, así como a todas as persoas que presten servizo naquelas compañías que estarán afectadas polo ámbito funcional establecido no preacordo asinado o pasado día 23 de marzo pola asociación ARTE e os sindicatos CCOO e Fetico. Isto é, as dedicadas principalmente ao comercio téxtil e de calzado que conten cun cadro de persoal superior a 400 persoas e unha superficie de venta física superior a 3500 metros cadrados no ámbito do convenio.
