• Nova

O xulgado condena o Grupo Hotusa a readmitir dous traballadores por vulnerar a súa liberdade sindical

Declara nulas as extincións ao entender que a empresa só buscaba eliminar o persoal afín á CIG
Chantada - 09 Nov 2020

O Xulgado do Social nº3 de Lugo vén de condenar a H24 Reservation Services e Agate Hotels SL (do Grupo Hotusa) a readmitir de inmediato dous traballadores aos que despediu en represalia pola súa filiación sindical e pola súa proximidade coas/os representantes do persoal. A xustiza considera que non existe causa obxectiva dos despedimentos e que o único fin do Grupo Hotusa era eliminar o persoal sindicado e máis activo, xa que ademais destes dous traballadores a empresa tamén despediu a varias/os delegadas/os e outras persoas afíns á CIG.

Para xustificar a extinción do contrato, a filial de Hotusa segue o procedemento habitual e acusa os traballadores de baixo rendemento voluntario para aplicarlles así un despedimento disciplinario. Non obstante, nas dúas sentenzas sublíñase que "fronte ao indicio de vulneración do dereito de liberdade sindical non existe xustificación obxectiva e razoábel da decisión adoptada pola empresa". Aínda máis, nunha as resolucións xudiciais insístese no feito de que estes dous traballadores foron os únicos que se atreveron a sentar na mesa das/os representantes sindicais durante a cea de nadal e que ambos os dous foron despedidos.

Para o secretario comarcal da CIG de Lugo-A Mariña, Antonio Niño, fica claro que a decisión de despedir a estes compañeiros forma parte da estratexia de persecución sindical iniciada pola compañía contra da CIG tras gañar as eleccións sindicais celebradas o pasado ano no centro de traballo de Chantada. Non hai que esquecer que, pouco antes de declararse o estado de alarma en marzo, a empresa aplicou despedimentos moi selectivos, xa que na meirande parte afectaron a persoas que a empresa vincula coa CIG, pero que pretendeu camuflar baixo a escusa da baixada das reservas e as cancelacións provocadas pola Covid19.

Tampouco cómpre perder de vista que Restel promoveu unha asemblea entre o persoal para revogar as tres delegadas da CIG, xusto o día despois de saíren elixidas. Unha actuación antisindical que a xustiza anulou.

Neste senso, Niño lamenta que as empresas poidan seguir aproveitándose das facilidades introducidas pola reforma laboral para aplicar este tipo de despedimentos, pois a pesar das múltiples promesas do Goberno de coalición, as reformas de 2010 e de 2012 continúan plenamente vixentes.